អាមេរិក

អាមេរិក៖ អត្រា​អ្នក​អត់​ការងារធ្វើ​ធ្លាក់ចុះ​ខ្លាំង តែ​ក៏​មិនត្រូវ​សប្បាយចិត្ត​ពេក​ដែរ

ពលរដ្ឋ​អាមេរិក​ដែល​អត់ការងារធ្វើ​​កំពុង​រកមើល​ដំណឹង​ស្វែងរក​បុគ្គលិក។ នៅខែ​វិច្ឆិកា​នេះ មាន​អ្នកអត់ការងារ​ធ្វើ​ចំនួន ៣១៥ ០០០​នាក់ ដែល​អស់សង្ឃឹម​លែងរវីរវល់​ស្វែងរក​ការងារ​ធ្វើ​តទៅទៀត។
ពលរដ្ឋ​អាមេរិក​ដែល​អត់ការងារធ្វើ​​កំពុង​រកមើល​ដំណឹង​ស្វែងរក​បុគ្គលិក។ នៅខែ​វិច្ឆិកា​នេះ មាន​អ្នកអត់ការងារ​ធ្វើ​ចំនួន ៣១៥ ០០០​នាក់ ដែល​អស់សង្ឃឹម​លែងរវីរវល់​ស្វែងរក​ការងារ​ធ្វើ​តទៅទៀត។ REUTERS/Tami Chappell

នៅក្នុងពេល​ដែល​អឺរ៉ុប​កំពុង​ប្រឈមមុខ​នឹង​វិបត្តិ​ប្រាក់​បំណុល តំបន់​​មជ្ឈិមបូព៌ា ដែល​ជា​ជង្រុក​ប្រេង​កំពុង​ឆ្លងកាត់​អស្ថិរភាព ហើយ​សូម្បី​តែ​ចិន​ក៏​កំពុង​បារម្ភ​អំពី​ស្ថានភាព​សេដ្ឋកិច្ច​របស់ខ្លួន​ដែរ​នោះ ស្រាប់តែ​នៅអាមេរិក​ឯណោះវិញ អត្រា​អ្នកអត់ការងារ​ធ្វើ​បាន​ធ្លាក់ចុះ​ដល់​កម្រិត​មួយទាប​បំផុត​មិនធ្លាប់​ឃើញមាន ក្នុងរយៈពេល​ជាង​ពីរឆ្នាំ​កន្លង​ទៅនេះ។

ផ្សាយពាណិជ្ជកម្ម

យោងតាម​តួលេខ​របស់​ក្រសួង​ការងារ​អាមេរិក អត្រា​អ្នក​អត់ការងារធ្វើ​នៅអាមេរិក នៅ​ក្នុង​ខែ​វិច្ឆិកា​កន្លងទៅនេះ​បាន​ធ្លាក់​ចុះ​​មក​នៅ​ត្រឹម​ ៨,៦% ដែល​ជា​អត្រា​ទាបបំផុត​មិនធ្លាប់​មាន​ ចាប់តាំង​ពី​ខែ​មីនា ឆ្នាំ​២០០៩​មក។ កាលពី​ខែ​តុលា ២០១១ អត្រា​អ្នកអត់​ការងារ​ធ្វើ​នៅអាមេរិក​មាន​រហូតដល់​ទៅ ៩%។ ដូច្នេះ ក្នុងរយៈពេល​តែ​មួយខែសោះ​ អត្រា​អ្នក​អត់ការងារ​ធ្វើ​បាន​ធ្លាក់ចុះ​រហូតដល់​ទៅ ០,៤%។

តើសេដ្ឋកិច្ច​របស់​អាមេរិក​កំពុង​តែ​ស្ទុះឡើងវិញឬ? មិនប្រាកដ​ទេ! តាមការពិត​ ការធ្លាក់ចុះ​ដ៏​ខ្លាំងខ្លា​​នៃ​អត្រា​អ្នក​អត់ការងារធ្វើ​នេះ ភាគច្រើន​បាន​មក​ដោយសារ​តែ​អ្នកអត់ការងារ​ធ្វើ​លែង​រក​ការធ្វើ​តទៅទៀត។ ក្នុងចន្លោះ​ពី​ខែ​តុលាការ ដល់​ខែ​វិច្ឆិកា អ្នក​អត់ការងារ​ធ្វើ​រហូតដល់​ទៅ ៣១៥ ០០០​នាក់ បាន​សម្រេច​ចិត្ត​ឈប់​ស្វែងរក​ការងារតទៅទៀត។ អ្នក​ដែល​មិន​ស្វែងរក​ការងារ​ធ្វើ មិនត្រូវ​បាន​​គេ​ចាត់​បញ្ចូល​ក្នុង​កម្លាំង​ពលករ​សកម្ម​នោះទេ ដូច្នេះ គេ​ក៏​មិន​រាប់បញ្ចូល​ក្នុង​តួលេខ​នៃ​អ្នកអត់ការងារ​ធ្វើ​ដែរ។

និយាយ​បែបនេះ​មិនមែន​មានន័យថា ស្ថានភាព​សេដ្ឋកិច្ច​អាមេរិក​មិន​រីកចម្រើន​ទៅមុខ​សោះ​នោះទេ។ ចំនួនការងារ​ដែល​បង្កើត​ថ្មី​ក៏​បាន​កើនឡើង​​រហូតដល់​ទៅ ១២​០ ០០០​នាក់​ ពោលគឺ កើនឡើង​ហួស​ពី​ការព្យាករ​របស់​អ្នក​សេដ្ឋកិច្ច​ភាគច្រើន​ផង។ ក៏ប៉ុន្តែ បើ​ពឹងតែ​ទៅលើ​​ចំនួន​អ្នក​រកការងារ​បាន​ធ្វើ ហើយ​មិនមាន​អ្នក​អស់សង្ឃឹម​ឈប់​រវីរវល់​ស្វែងរក​ការងារ​ធ្វើ​ដ៏​ច្រើន​សន្ធឹកសន្ធាប់ទេនោះ អត្រា​អ្នក​អត់ការងារ​ធ្វើ​នៅអាមេរិក​ធ្លាក់ចុះ​តិចតួច​ប៉ុណ្ណោះ (ពោលគឺ ពី​៩% មក​នៅត្រឹម ៨,៩% ប៉ុណ្ណោះ មិនដល់ ៨,៦%​ ទេ)។

ដើម្បី​ឲ្យ​ទីផ្សារ​ការងារ​នៅ​អាមេរិក​ងើបឡើង​មក​ដល់កម្រិត​មុន​ពេល​ផ្ទុះវិបត្តិ​សេដ្ឋកិច្ចវិញ គេ​ចាំបាច់​ត្រូវ​បង្កើតការងារ​ឲ្យ​បាន​រហូតដល់​ទៅ​ ជិត ១១លាន​នាក់​ឯណោះ ដើម្បី​បំពេញ​តម្រូវការ​របស់​អ្នក​ដែល​បាត់បង់​ការងារ​ដោយសារ​វិបត្តិផង និង​យុវជន​ដែល​ទើប​នឹង​ដល់​អាយុ​ធ្វើការផង។ ដូច្នេះ បើ​សិន​អាមេរិក​បង្កើតការងារ​ថ្មី​បាន​ត្រឹម​តែ ១២០ ០០០​នាក់ ក្នុងមួយខែ ដូចជា​ពេលនេះ ទោះបី​ជា​ ១០​ឆ្នាំ​ទៀត ក៏​អត្រា​អ្នក​អត់ការងារ​ធ្វើ​មិន​ធ្លាក់ចុះ​មក​ដល់​កម្រិត​ដើមវិញ​ដែរ។

ទោះជាយ៉ាងណា តួលេខ​ស្តីពី​ការធ្លាក់ចុះ​នៃ​អត្រា​អ្នក​អត់ការងារ​ធ្វើ នៅ​ខែ​វិច្ឆិកា​នេះ ប្រាកដ​ជា​ធ្វើ​ឲ្យ​លោក​អូបាម៉ា និង​គណបក្ស​ប្រជាធិបតេយ្យ​បាន​ធូរចិត្ត​មិនតិចទេ ពីព្រោះ​ការបោះឆ្នោត​អាណត្តិ​ថ្មី​កំពុង​តែ​ជិត​ឈាន​ចូលមកដល់។ បើសិន​ជា​អត្រា​អ្នក​អត់​ការងារធ្វើ​​មិនធ្លាក់ចុះទេ លោក​អូបាម៉ា​​ប្រាកដ​ជា​​​នឹង​មិនងាយ​​រក​សំឡេងឆ្នោត សម្រាប់​អាណត្តិ​ទីពីរ​នោះទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI