អានតួអត្ថបទ
សហរដ្ឋអាមេរិក​-អឺរ៉ុប

ភេរវនិយម ៖ អាមេរិក​ធ្វើ​យុទ្ធនាការ​រក្សា​​សុវត្ថិភាព​នៅ​តាម​រថភ្លើង

ទាហានបារាំង​ល្បាត​នៅ​ Tour Eiffel ថ្ងៃ​ទី​ 3 តុលា ២០១០
ទាហានបារាំង​ល្បាត​នៅ​ Tour Eiffel ថ្ងៃ​ទី​ 3 តុលា ២០១០ AFP/Thomas Coex
ដោយ៖ អៀង សុខម៉ិញ
១៦ នាទី

នៅ​សប្តាហ៍​នេះ ប៉ូលិស​​​អាមេរិក នឹង​ចេញ​ធ្វើយុទ្ធនាការ​ នៅ​តាម​បណ្តាញ​មធ្យោបាយ​ធ្វើ​តាម​ផ្លូវ​ដែក​សំខាន់ៗ ក្នុង​ក្រប​ខ័ណ្ឌ​​​ពង្រឹង​សន្តិសុខ​។ លំហាត់​សុវត្ថិភាព​នៅ​តាម​ស្ថានីយ៍រថភ្លើង​ និង​ក្នុង​រថភ្លើង នេះ​ធ្វើ​ឡើង​​ជួន​ចំ​ពេល​ដែល​អាជ្ញាធរ​អាមេរិក​ទើប​​បាន​ប្រកាស​ណែ​នាំ​ដល់ ​បណ្តាជន​អាមេរិក​ឲ្យ​ប្រុង​ប្រយ័ត្ន​ ពេល​ធ្វើ​ដំណើរ​ទៅ​អឺរ៉ុប ព្រោះ​ការ​គំរាម​កំហែង​ធ្វើ​ភេរវកម្ម​ នៅ​ទី​នោះ​ មាន​កំរិត​គួរ​ឲ្យ​ព្រួយ​បារម្ភ។

ផ្សាយពាណិជ្ជកម្ម

សេចក្តីរាយការណ៍​របស់ អៀង សុខម៉ិញ

យុទ្ធនាការ​​​សុវត្ថិភាព​ផ្លូវដែក “Railsafe” នឹងត្រូវ​បាន​ក្រុម​ហ៊ុន​អយស្ម័យយាន អាមេរិក Amtrack ​រៀប​ចំ​​ធ្វើ​ឡើង​ នៅថ្ងៃ​សុក្រ​ខាងមុខ​នេះ ដោយ​មាន​ប៉ូលិស​ពាក់​ឯកសណ្ឋាន​ ល្បាត​នៅ​តាម​ខ្សែ​រទេះ​ភ្លើង​សំខាន់ៗ​​របស់​អាមេរិក។ បើ​យោង​តាម​អ្នក​ទទួល​ខុស​ត្រូវ​ អាមេរិកម្នាក់ ក្រុម​ហ៊ុន​ផ្លូវ​ដែក​អឺរ៉ុប មាន​ជាអាទិ៍​ក្រុម​ហ៊ុន​អង់គ្លេស ក៏​នឹង​បើក​យុទ្ធនាការដូច​សហរដ្ឋ​អាមេរិក នៅ​ថ្ងៃ​សុក្រ​សប្តាហ៍​នេះ​ដែរ។

​អ្នក​ទទួល​ខុសត្រូវ​សុវត្ថិភាព​ផ្ទៃក្នុង​អាមេរិក បាន​អះអាង​ថា​ គម្រោង​ធ្វើ​យុទ្ធនា​ការ​នេះ​មិន​មាន​ពាក់​ព័ន្ធ​នឹង​ការ​គំរាម​កំហែង​ធ្វើ​ភេរវកម្ម​នៅ​អឺរ៉ុប​ទេ ព្រោះ​អាមេរិក​មាន​ផែនការ​បែប​នេះ​ជា​យូរ​មក​ហើយ។

តើ​នេះ​ពិត​ជា​ការ​ចៃដន្យ​ឬ ? សូម​ជម្រាប​ថា​ តាំង​ពី​ថ្ងៃ​អាទិត្យ​ទី ៣​តុលា​មក អាជ្ញាធរ​អាមេរិក​បាន​អំពាវ​នាវ​ឲ្យ​ប្រជាជន​អាមេរិក​ទាំង​អស់ ដែល​មាន​ចេតនា​ធ្វើ​ដំណើរ​កំសាន្ត​មក​អឺរ៉ុប ឲ្យ​រក្សា​ខ្ជាប់​នូវ​ភាព​ប្រុង​ប្រយ័ត្ន ជាពិសេស​នៅ​តាម​មណ្ឌល​ទេសចរណ៍​សំខាន់ៗ ដូច​ជា Tour Eiffel, វិហារ​Notre Dame ឬ​ទី​ប្រជុំ​ជន​មាន​មនុស្ស​ច្រើន។ ប្រទេស​ជប៉ុន​ និង​អង់គ្លេស​ក៏​បាន​ចេញ​សេចក្តី​ណែនាំ​នេះ​ដល់​ប្រជាជន​ខ្លួន​ដែរ។

អឺរ៉ុប ដែល​កំពុង​ប្រឈម​នឹង​គំរាម​​ភេរវកម្ម​នេះ បាន​ចាត់​វិធានការ​ពង្រឹង​សន្តិសុខ និង​សុវត្ថិភាព​គ្រប់​ទី​កន្លែង និង​ទទួល​ស្គាល់​ថា​គ្រោះ​ភេរវកម្ម​ពិតជា​ទំនង​អាច​កើត​មាន​មែន​។ ម្យ៉ាង​វិញ​ទៀត បើតាម​របាយ​ការណ៍​ថ្មីៗ​ចុង​ក្រោយ​របស់​ភ្នាក់ងារ​ស៊ើប​ការ​សម្ងាត់​អាមេរិក និង​អឺរ៉ុប ពួក​ភេរវជន​អាល់កៃដា និង​សម្ព័ន្ធ​មិត្ត​ ប៉ុន​ប៉ង​ធ្វើ​ភេរវកម្ម​នៅ​តាម​ទីក្រុង​ធំៗ​របស់​អឺរ៉ុប ដែល​មាន​លក្ខណៈ​ស្រដៀង​នឹង​ភេរវកម្ម​នៅ​ទីក្រុង​ប៊ុមបេ​ ប្រទេស​ឥណ្ឌា​កាលពី​ឆ្នាំ​២០០៨ ពោល​គឺ​ក្រុម​ភេរវជន​ចង់​ប្រើ​យុទ្ធវិធី​​​ណា​ដែល​ធ្វើ​ឲ្យ​មាន​ការ​បាត់​បង់​ជា​អតិបរិមាណ និង​គួរ​ឲ្យ​ភ័យ​រន្ធត់​បំផុត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ