ភូមា

អំពើ​ហិង្សា​នៅ រដ្ឋរ៉ាគីន​ធ្វើ​ឲ្យ​ភូមា​រង​សម្ពាធ​ជា​ថ្មី​ពី​សហគមន៍​អន្តរជាតិ

ប្រជាជន​អ៊ីស្លាម ឬ​ហៅថា Rohingyas បាន​រត់គេច​ពី​អំពើ​ហិង្សា​សាសនា​​នៅភូមា តែ​ត្រូវ​ឆ្មាំ​ទន្លេ​បង់ក្លាដែស​ចាប់​ស្ទាក់​បញ្ជូន​ចូល​ភូមាវិញ
ប្រជាជន​អ៊ីស្លាម ឬ​ហៅថា Rohingyas បាន​រត់គេច​ពី​អំពើ​ហិង្សា​សាសនា​​នៅភូមា តែ​ត្រូវ​ឆ្មាំ​ទន្លេ​បង់ក្លាដែស​ចាប់​ស្ទាក់​បញ្ជូន​ចូល​ភូមាវិញ © REUTERS

សហគមន៍​អន្តរជាតិ និង​អង្គការ​ការពារ​សិទ្ធិ​មនុស្ស​បាន​ដាក់គំនាប នៅថ្ងៃ​អង្គារនេះ​ទៅលើ​រដ្ឋាភិបាល​ភូមា ឲ្យ​បញ្ចប់​អំពើហិង្សា ដែល​ផ្ទុះ​ឡើង​រវាង​សហគមន៍​អ៊ីស្លាម និង​អ្នកកាន់​ពុទ្ធ​សាសនា នៅរដ្ឋ​រ៉ាគីន។ នៅបង់ក្លាដែសវិញ ឆ្មាំ​សមុទ្រ​បាន​ស្ទាក់ និង​បំបែរ​ទូកដឹក​ប្រជាជន​អ៊ីស្លាម​មក​ពី​រដ្ឋ​រ៉ាគីន ឲ្យ​ត្រលប់​ចូល​ទៅ​ភូមា​វិញ។  

ផ្សាយពាណិជ្ជកម្ម

ទូក​បីគ្រឿង​ដឹក​ប្រជាជន​អ៊ីស្លាម​ប្រមាណ​១០០​នាក់ ត្រូវ​ពួកឆ្មាំ​ទន្លេ​បង់ក្លាដែស ស្ទាក់ នៅ​ព្រលឹម​ថ្ងៃ​អង្គារនេះ មិន​ឲ្យ​បើក​ចូល​ទៅចត​នៅច្រាំង ក្នុង​ទឹកដី​បង់ក្លាដែស។ តាំងពី​ថ្ងៃ​ចន្ទ​មក ឆ្មាំទន្លេ​បង់ក្លាដែស​បាន​ពង្រឹង​ការយាម​សន្តិសុខ​ នៅក្នុង​ទន្លេ Naf ដែល​ជា​ព្រំដែន​ទឹក​រវាង​ភូមា និង​បង់ក្លាដែស ដោយ​បាន​ឃាត់​ទូក ១១គ្រឿង​របស់​ប្រជាជន​អ៊ីស្លាម និង​បាន​បញ្ជា​ឲ្យ​ពួកគេ​បើក​ត្រលប់​ចូល​ទៅ​ភូមា​វិញ។ តាមអាជ្ញាធរ​បង់ក្លាដែស ពួក​ប្រជាជន​អ៊ីស្លាមទាំងនេះ​ដែល​ភាគច្រើន​ជា​ស្ត្រី និង​កុមារ​បាន​រត់គេច​ចេញ​ពី​អំពើ​ហិង្សា​ដែល​កំពុង​ផ្ទុះ​ឡើង នៅរដ្ឋ​រ៉ាគីន ភាគខាងលិច​ប្រទេស​ភូមា។

អំពើ​ហិង្សា​សាសនា​ដែល​ផ្ទុះ​នៅរដ្ឋ​រ៉ាគីន កាលពីថ្ងៃ​សុក្រ​បាន​សម្លាប់​មនុស្ស ៧នាក់ និង​ធ្វើ​ឲ្យ​របួស​មនុស្ស​១៧នាក់។ ផ្ទះជាច្រើន​រយខ្នង​ត្រូវ​បាន​ដុតបំផ្លាញ។ កាលពីថ្ងៃ​អាទិត្យ ប្រធានាធិបតី​ភូមា លោក​ថេន សេន​បាន​ប្រកាស​ដាក់​រដ្ឋ​រ៉ាគីន​របស់​ភូមា​ទៅក្នុង​ស្ថានភាព​ប្រកាសអាសន្ន និង​ប្រកាស​ប្រើ​ច្បាប់​អាជ្ញាសឹក​ដើម្បី​រៀបចំ​សណ្តាប់ធ្នាប់​ឡើង​វិញ។

ទាហាន​ភូមា​អនុវត្ត​ច្បាប់​សឹក​ដើម្បី​បញ្ចប់​អំពើ​ហិង្សា​សាសនា​នៅ​រដ្ឋ​រ៉ាគីន
ទាហាន​ភូមា​អនុវត្ត​ច្បាប់​សឹក​ដើម្បី​បញ្ចប់​អំពើ​ហិង្សា​សាសនា​នៅ​រដ្ឋ​រ៉ាគីន ©Reuters

កាល​ពីថ្ងៃ​សុក្រ ជម្លោះ​ដ៏​ហិង្សា រវាង​សហគមន៍​អ្នកកាន់​ពុទ្ធសាសនា និង​អ៊ីស្លាម​បាន​រីករាលដាល​ចូល​ទៅរដ្ឋធានី​Sittwe និង​ភូមិជិតខាង រហូត​ធ្វើ​ឲ្យ​អង្គការ​សហប្រជាជាតិ​សម្រេច​ដក​មន្រ្តី​របស់ខ្លួន​ជាបណ្តោះអាសន្ន ចេញ​ពី​តំបន់​គ្រោះថ្នាក់។ សហរដ្ឋអាមេរិក​វិញ តាមរយៈ​លោកស្រី​រដ្ឋមន្រ្តី​ការបរទេស ហ៊ីឡារី គ្លីនតុន បាន​បង្ហាញ​ក្តីព្រួយបារម្ភ​ពី​អំពើហិង្សា​សាសនា​នៅក្នុង​ប្រទេស​ភូមា ទាមទារ​ឲ្យ​រដ្ឋាភិបាល​ស៊ីវិល​ភូមា​ថ្មី​ចាត់វិធានការ​បន្ទាន់​ដើម្បី​បញ្ចប់​អំពើហិង្សា​សាសនា។

អំពើហិង្សា​នៅរដ្ឋ​រ៉ាគីន​បាន​ផ្ទុះ​ឡើង បន្ទាប់ពី​អ្នកកាន់ពុទ្ធសាសនា​មួយក្រុម​បាន​វាយសម្លាប់​ប្រជាជន​អ៊ីស្លាម​១០​នាក់ កាលពីថ្ងៃ​ទី ៣​មិថុនា ដើម្បី​សងសឹក​ឲ្យ​ក្មេងស្រី​កាន់សាសនា​ព្រះពុទ្ធ​ម្នាក់ ដែល​បាន​ត្រូវ​គេ​សន្និដ្ឋាន ថា បាន​រំលោភ និង​សម្លាប់​ដោយ​បុរស​អ៊ីស្លាម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI