វេណេស៊ុយអេឡា-អាមេរិក

ប្រទេស​វេណេស៊ុយអេឡា​បណ្តេញ​មន្ត្រីការទូត​អាមេរិក​៣រូប​ ចេញពី​ទឹកដី​ខ្លួន​

ប្រធានាធិបតី​​​វេណេស៊ុយអេឡា Nicolas Maduro
ប្រធានាធិបតី​​​វេណេស៊ុយអេឡា Nicolas Maduro REUTERS/Miraflores Palace/Handout via Reuters

កាលពី​ថ្ងៃ​ចន្ទ​ម្សិលមិញ​នេះ ប្រធានាធិបតី​វេណេស៊ុយអេឡា នីកូឡា ម៉ាឌុយរ៉ូ បាន​ប្រកាស​​បណ្តេញ​មន្ត្រីការទូត​អាមេរិក​៣រូប ចេញពី​ទឹកដី​វេណេស៊ុយអេឡា​។ លោកម៉ាឌុយរ៉ូ​ បាន​ចោទ​ពួកគេ​ទាំង៣ ថា​បាន​​ធ្វើសកម្មភាព​ខុសច្បាប់ ក្នុង​ទិសដៅ​បង្ក​មហន្តរាយ​ក្នុង​ទឹកដី​វេណេស៊ុយអេឡា។ គណបក្ស​ប្រឆាំង​ បាន​ចោទ​​រដ្ឋាភិបាល​ ថា​បាន​បណ្តេញ​មន្ត្រី​ទូតអាមេរិក ដើម្បី​បិទបាំងភាព​សមត្ថភាព​​​​របស់ខ្លួន​ ក្នុង​​ការ​​គ្រប់គ្រង​ប្រទេស​តែប៉ុណ្ណោះ។

ផ្សាយពាណិជ្ជកម្ម

ក្នុង​ចំណោម​មន្ត្រីការទូត​អាមេរិក​៣រូប​ ដែល​ត្រូវ​បាន​ប្រធានាធិបតី​វេណេស៊ុយអេឡា ប្រកាសបណ្តេញ​ចេញពី​ប្រទេស​ នៅថ្ងៃ​ចន្ទ​ម្សិលមិញ​នេះ មានភារធារីអាមេរិកមួយរូប​ គឺ​​លោក Kelly Keiderling ស្ថិត​ក្នុង​ជួរ​​អ្នកការទូត​​ខ្ពស់ជាងគេ​ នៅ​វេណេស៊ុយអេឡា។ គួររំលឹកថា សហរដ្ឋអាមេរិក​គ្មាន​ឯកអគ្គរដ្ឋទូត​​ក្នុង​ប្រទេស​នេះទេ។ លោក Keiderling ត្រូវបាន​តែងតាំង​ជា​ប្រធាន​បេសកម្ម​ជំនួយ កាលពី​ឆ្នាំ​២០១១ នៅក្រុង​ការ៉ាកាស​។​

មន្ត្រី​ទូត​អាមេរិក​ទាំងបីរូប​ មានពេល​តែ​៤៨ម៉ោង ប៉ុណ្ណោះ បន្ទាប់​ពីការប្រកាស​​របស់​រដ្ឋាភិបាល​ ដើម្បីចាកចេញ​ពី​វេណេស៊ុយអេឡា។

ប្រធានាធិបតីវេណេស៊ុយអេឡា នីកូឡា ម៉ាឌុយរ៉ូ ​​​បាន​ចោទជនជាតិ​អាមេរិក​ទាំងបីរូប​ ថាបាន​ជំរុញអោយ​មាន​សកម្មភាព​វិច្ឆេទកម្ម ក្នុងប្រទេស។ លោក ម៉ាឌុយរ៉ូ លើកឡើងថា ពួកគេ​ទាំងនេះ​បាន​ទាក់ទង​ជាមួយ​ក្រុមស្តាំនិយម​ជ្រុល​ក្នុង​ប្រទេស ហើយ​បាន​​ផ្តល់​ថវិកា និង​ជំរុញ​លើកទឹកចិត្ត​ក្រុមនោះ​អោយ​បំផ្លាញ​​ប្រព័ន្ធ​អគ្គិសនី និង​សេដ្ឋកិច្ចជាតិ​វេណេស៊ុយអេឡា។​ លោក ម៉ាឌុយរ៉ូ លើកឡើងទៀតថា លោក​មាន​ភស្តុតាង​ចោទប្រកាន់​ទាំងនេះ នៅក្នុង​ដៃ។ ហើយថែមទាំង​ប្រាប់ទៀត​ថា លោក​មិន​ខ្ចី​ខ្វល់​ពី​សកម្មភាព​របស់​រដ្ឋាភិបាល​លោកអូបាម៉ា​ នោះទេ។

កាលពី​កន្លះឆ្នាំ​មុន វេណេស៊ុយអេឡា​​ក៏​ធ្លាប់​បាន​បណ្តេញ​​សេនានុព័ន្ធ​យោធា​​អាមេរិក​ពីររូប​​ រួច​មកហើយដែរ។ ប្រធានាធិបតី​ម៉ាឌុយរ៉ូ តែងតែ​ចោទប្រកាន់​​អាមេរិក ថា​​បាន​ធ្វើ​សង្គ្រាម​សេដ្ឋកិច្ច​ ​​បង្ក​អោយ​វេណេស៊ុយអេឡា​រង​ការ​ខ្វះខាត​ និង​ធ្វើអោយ​មាន​ការ​​កាត់ផ្តាច់​ចរន្ត​អគ្គិសនី​​ក្នុង​ប្រទេស​​ទៀតផង។

ដោយឡែក លោក ម៉ាឌុយរ៉ូ ក៏ធ្លាប់​បង្ហាញ​ការ​សង្ស័យ​ថា ​អាមេរិកប្រហែល​​ជា​បាន​​បង្ក​អោយ​អតីប្រធានាធិបតី​វេណេស៊ុយអេឡា អ៊ុយហ្កូ ឆាវេស ស្លាប់បាត់បង់ជីវិត។ ក្រុង​វ៉ាស៊ីនតោន​​បាន​តបទៅវិញថា ការចោទប្រកាន់​នេះ​មិន​ទំនង​អ្វី​បន្តិច​សោះឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI