រុស្ស៊ី-ថៃ-អាមេរិក

ប្រទេស​ថៃ​ធ្វើ​បត្យាប័ន បញ្ជូន​ឈ្មួញ​លក់​អាវុធ​ជាតិ​រុស្ស៊ី​ទៅ​ឲ្យ​អាមេរិក

ប៉ូលិស​ថៃ​ដឹក​​ជនជាប់ចោទ​រុស្ស៊ី Viktor Bout ចេញ​ពី​ពន្ធនាគារ​ និង​ប្រគល់​ទៅ​ឲ្យ​ប៉ូលិស​អាមេរិក
ប៉ូលិស​ថៃ​ដឹក​​ជនជាប់ចោទ​រុស្ស៊ី Viktor Bout ចេញ​ពី​ពន្ធនាគារ​ និង​ប្រគល់​ទៅ​ឲ្យ​ប៉ូលិស​អាមេរិក ©Reuters

បន្ទាប់ពី​ចំណាយ​ពេល ជាង​២​ឆ្នាំ ឈឺក្បាល​លើ​សំណុំរឿង​ដ៏​ចម្រូងចម្រាស រដ្ឋាភិបាល​ថៃ​បាន​សម្រេច​បញ្ជូន​ឈ្មួញ​លក់​អាវុធ ជនជាតិ​រុស្ស៊ី ទៅ​អាមេរិក ទៅតាម​ការទាមទារ​ឲ្យ​ធ្វើ​បត្យាប័ន​ពី​រដ្ឋបាល​លោក​អូបាម៉ា។ នៅ​រសៀល​ថ្ងៃ​អង្គារ​នេះ Viktor Bout​ត្រូវ​ក្រៀកដំណើរ​ដោយ​ប៉ូលិស​ថៃ ចូលទៅ​ក្នុង​យន្តហោះ​ពិសេស​មួយ​សំដៅ​ទឹកដី​អាមេរិក។ តុលាការ​អាមេរិក​ដែល​ចង់យក​ ឈ្មួញ​លក់​អាវុធ ជនជាតិ​រុស្ស៊ី ទៅ​កាត់ទោស ពីបទ​លក់អាវុធ​ខុសច្បាប់ ទៅ​ឲ្យ​បណ្តា​អង្គការ​ភេរវនិយម​ក្នុង​ពិភពលោក។

ផ្សាយពាណិជ្ជកម្ម

សេចក្តី រាយការណ៍​របស់​ឈាង បុប្ផា

Viktor Bout ដែល​គេ​ដាក់​ឈ្មោះ​ថា ជា​ឈ្មួញ​មរណៈ បាន​ចាកចេញ​ពី​ទឹកដី​ថៃ នៅ​ម៉ោង​មួយ រសៀល​ថ្ងៃ​អង្គារ​នេះ។ ប្រតិបត្តិការ​ធ្វើ​បត្យាប័ន Viktor Bout ត្រូវ​បាន​ធ្វើ​ឡើង​បែប​បន្ទាន់ និង​ក្រោម​ការយាម​ដ៏​តឹងរ៉ឹង​ពី​ប៉ូលិស​ជាតិ​ថៃ។ ពោល​គឺ​បន្ទាប់​ពី ខុទ្ទកាល័យ​នាយក​រដ្ឋមន្រ្តី​ថៃ ចុះ​ហត្ថលេខា​បញ្ជូន​ចេញ​ភ្លាម Viktor Bout ត្រូវ​បាន​ដឹក​ចេញ​ពី​ពន្ធនាគារ ​មក​ទីស្នាក់ការ​អន្តោប្រវេសន៍ និង​បន្ទាប់មក ត្រូវ​គេ​ប្រគល់​ទៅ​ឲ្យ​ប៉ូលិស​អាមេរិក​ដែល​កំពុង​រង់ចាំ ក្នុង​យន្តហោះ​ធ្វើ​ដំណើរ​ពិសេស។ សូម្បី​ភរិយា​របស់​ជនជាប់ចោទ​ក៏​មិនមាន​ឱកាស​បាន​និយាយ​ពាក្យ​ចុងក្រោយ​ទៅកាន់​ប្តី​របស់​ខ្លួន​ដែរ។ មេធាវី Viktor Bout បាន​និយាយ​ថា គេ​ពិបាក​នឹង​និយាយ​ការពារ នៅ​ពេលViktor Bout ត្រូវ​គេ​បញ្ជូន​ទៅ​ដល់​ទឹកដី​អាមេរិក។

នៅពេលនេះ រដ្ឋាភិបាល​ថៃ​បាន​ប្រគល់​ភារៈ​ទៅ​ឲ្យ​អាមេរិក​ជា​អ្នកចាត់ចែង​បន្ត​សំណុំរឿង​ឈ្មួញ​រត់ពន្ធ​អាវុធ និង​ដកដៃ​ចេញ​ពី​សំណុំរឿង​ដែល​បង្ក​ឲ្យ​មាន​ការថ្នាំងថ្នាក់​ចិត្ត​ខ្លាំង​ពី​រុស្ស៊ី។ រុស្ស៊ី​ដែល​ធ្លាប់​បាន​ទាមទារ​ឲ្យ​តុលាការ​ថៃ​ដោះលែង Viktor Bout បាន​រិះគន់ និង​ចាត់ទុក​ការបញ្ជូន​ជនជាតិ​របស់ខ្លួន​ទៅ​អាមេរិក​ថា ជា​រឿង​ខុសច្បាប់។ រដ្ឋមន្រ្តី​ក្រសួង​ការបរទេស​រុស្ស៊ី​បាន​សន្យា នៅ​ថ្ងៃ​នេះ​ដែរ​ថា នឹង​ចាត់​គ្រប់​វិធានការ​ដើម្បី​ការពារ​តាមផ្លូវ​ច្បាប់​ប្រជាពលរដ្ឋ​របស់ខ្លួន។

គួរដឹងថា ទីក្រុងម៉ូស្គូ​មិនចង់​ឲ្យ​រដ្ឋាភិបាល​ក្រុង​បាងកក​ប្រគល់ Viktor Bout ទៅ​ឲ្យ​អាមេរិកទេ​ ព្រោះ​រុស្ស៊ី​បារម្ភ​ខ្លាច Viktor Bout និយាយ​ទំលាយ​រឿង​អាថ៌កំបាំង​ខ្លះ​ដែល​អាច​ពាក់ព័ន្ធ​នឹង​រុស្ស៊ី។

Viktor Bout ឬ​ឈ្មួញ​មរណៈ ដែល​អាមេរិក​ចោទ​ថា ជា​ឈ្មួញ​រត់ពន្ធអាវុធ​ដ៏​ធំ​ក្នុង​ពិភពលោក​​ត្រូវបាន​គេ​ចាប់​ខ្លួន​ក្នុង​ប្រទេស​ថៃ ក្នុង​ឆ្នាំ ២០០៨
Viktor Bout ឬ​ឈ្មួញ​មរណៈ ដែល​អាមេរិក​ចោទ​ថា ជា​ឈ្មួញ​រត់ពន្ធអាវុធ​ដ៏​ធំ​ក្នុង​ពិភពលោក​​ត្រូវបាន​គេ​ចាប់​ខ្លួន​ក្នុង​ប្រទេស​ថៃ ក្នុង​ឆ្នាំ ២០០៨ ©Reuters

Viktor Bout ឬ​ឈ្មួញមរណៈ​ត្រូវ​គេ​ចាប់ខ្លួន​បាន កាល​ពី​ឆ្នាំ ២០០៨ ក្នុង​អំឡុងពេល​ដែល ប៉ូលិស​សំងាត់​អាមេរិក សហការ​ជាមួយ​អាជ្ញាធរ​ថៃ បាន​បន្លំ​ខ្លួន​ធ្វើ​ជា​អតិថិជន​ទិញ​អាវុធ​សម្រាប់​ទ័ពព្រៃFarc នៅ​ប្រទេស​កូឡុំប៊ី។ ប៉ុន្តែ នៅខែ​សីហា​មុន​នេះ តុលាការ​ថៃ​បាន​សម្រេច​ធ្វើ​បត្យាប័ន ឈ្មួញ​រត់ពន្ធ​អាវុធ​រុស្ស៊ី ទៅ​ឲ្យ​អាមេរិក បន្ទាប់ពី​ខ្លួន​មិនមាន​ភស្តុតាង​គ្រប់គ្រាន់​ដើម្បី​ចោទពី​បទ​លាង​លុយ​កខ្វក់។

នៅ​អាមេរិក Viktor Bout អាយុ ៤៣ឆ្នាំ ដែល​ត្រូវ​អាមេរិក​ចោទ​ពី​បទ​លក់អាវុធ ​ទៅ​ឲ្យ​អង្គការ​ភេរវនិយម ជា​ពិសេស​លក់​ទៅ​ឲ្យ​ក្រុមទ័ពព្រៃ នៅអាហ្វ្រិក អាមេរិក​ខាងត្បូង និង​នៅ​ដើមបូព៌ា នឹង​ត្រូវ​ប្រឈមមុខ​នឹង​ការផ្តន្ទា​ទោស​ឲ្យ​ជាប់គុក​អស់​មួយ​ជីវិត។ ប៉ុន្តែ Viktor Bout អតីត​ទាហាន​កងទ័ព​អាកាស​សូវៀត​នៅតែ​និយាយ​ការពារ​ខ្លួន​ថា ជា​អ្នករកស៊ី​ត្រឹមត្រូវ​តាមច្បាប់ និង​មិនដឹង​លឺ​ពី​ការលក់​អាវុធ​អ្វី​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI