រុស្ស៊ី-អ៊ីស្រាអែល

ទស្សនកិច្ច​​របស់​លោក​នាយក​រដ្ឋមន្ត្រី​អ៊ីស្រាអែល នៅ​ក្រុង​ម៉ូស្គូ

នាយក​រដ្ឋមន្ត្រី​អ៊ីស្រាអែល លោក Benyamin Nétanyahou
នាយក​រដ្ឋមន្ត្រី​អ៊ីស្រាអែល លោក Benyamin Nétanyahou Reuters / /Jim Hollander

បើ​គោលដៅ​ចំបង​ចោទ​ដោយ​លោក​Netanyahu គឺ​បញ្ហា​ទំនាក់ទំនង​ទ្វេ​ភាគី​ជាមួយ​រុស្ស៊ី នៅ​តាម​ទិស​ឲ្យ​រុស្ស៊ី​ចូលរួម​ក្នុង​ការ​ជីក​បូម​ឧស្ម័ន​ដែល​មាន​រក​ឃើញ នៅ​តាម​បាត​ឆ្នេរ​សមុទ្រ​អ៊ីស្រាអែល នោះ​សម្រាប់​រុស្ស៊ី​វិញ គឺ​ឆ្លៀត​ឱកាស​នេះ​ដើរ​ជា​ថ្មី​តួនាទី​ខ្លួន ជា​អន្តរការី​ជួយ​ដោះស្រាយ​អធិករណ៍​រ៉ាំរ៉ៃ រវាង​គូ​សត្រូវ​ប៉ាឡេស្ទីន​-អ៊ីស្រាអែល។ ជាពិសេស ទាំង​មេដឹកនាំ​រដ្ឋ​អំណាច​ប៉ាឡេស្ទីន​លោក Abbas ​ក៏​កំពុង​ស្ថិត​នៅ​ម៉ូស្គូ​ដែរ។

ផ្សាយពាណិជ្ជកម្ម

សេចក្តី​រាយការណ៍​របស់ កែវ ឆាយា ពីទីក្រុង​ម៉ូស្គូ

មូលហេតុ​មួយ​នៃ​​ការ​ធ្វើ​ដំណើរ​លើក​នេះ របស់​លោក​នាយក​រដ្ឋមន្ត្រី​អ៊ីស្រាអែល Netanyahu មក​កាន់​ក្រុង​ម៉ូស្គូ គឺ​ដើម្បី​លើក​ឡើង​វិញ​ទំនាក់ទំនង​ជាមួយ​រុស្ស៊ី​ក្នុង​ជាន់​ថ្នាក់​កំពូល​ ក្រោយ​ពី​លោក​ប្រធានាធិបតី​រុស្ស៊ី Medvedev មិន​បាន​បំពេញ​បាន​ដូច​ចិត្ត​ឯណា ទស្សនកិច្ច​ដែល​មាន​គ្រោង​ប្រព្រឹត្ត​ទៅ​នៅ​អ៊ីស្រាអែល កាលពី​ខែ​មករា​ឆ្នាំ​នេះ ដោយ​មកពី​បុគ្គលិក​ក្រសួង​ការបរទេស​អ៊ីស្រាអែល​កាលណោះ បាន​ធ្វើ​កូដកម្ម​ទាមទារ​ដំឡើង​ប្រាក់ខែ ហើយ​គ្មាន​នរណា​រៀបចំ​ពិធីការ​សំរាប់​ទទួល​ភ្ញៀវ​ជាន់​ខ្ពស់​រុស្ស៊ី។

 
ក្នុង​ក្របខ័ណ្ឌ​នៃ​ទស្សនកិច្ច​ការងារ ដែល​ប្រព្រឹត្ត​ទៅ​តែ​មួយ​ថ្ងៃ​នេះ​គត់ លោក Netanyahu ត្រូវ​ជួប​ចរចា​ជាមួយ​លោក​នាយក​រដ្ឋមន្ត្រី Pouutine​ផង​ លោក​ប្រធានាធិបតី Medvedev​ផង។

នាកិច្ចចរចា​ជាមួយ​លោក​នាយក​រដ្ឋមន្ត្រី​រុស្ស៊ី Pouutine ​តាម​ដែល​កាសែត​ក្រុង​ម៉ូស្គូ លេខ​ថ្ងៃ​នេះ ចុះ​ផ្សាយ​ឲ្យ​ដឹង លោក Netanyahu​នឹង​ផ្តោត​ការ​យក​ចិត្ត​ទុក​ដាក់​ទៅ​លើ​បញ្ហា​ទាក់ទាញ​រុស្ស៊ី​ដែល​សម្បូណ៌​ពិសោធន៍​ខាង​ជីក​បូម​ឧស្ម័ន ឲ្យ​ចូលរួម​ក្នុង​ការ​ជីក​បូម​នេះ ពី​អណ្តូង​ឧស្ម័ន ដែល​មាន​រក​ឃើញ​តាំង​ពី​ប៉ុន្មាន​ឆ្នាំ​មុន​ម៉្លេះ នៅ​តាម​បាត​សមុទ្រ​បណ្តោយ​ឆ្នេរ​ប្រទេស​អ៊ីស្រាអែល ក្នុង​សមុទ្រ​មេឌីទែរ៉ាណេ។ ​សាច់រឿង គឺ​អំពី​ការ​តថ្លៃ​គ្នា​ជុំ​វិញ​ទំហំ​ប្រាក់​ពន្ធ ដែល​ក្រុមហ៊ុន​រុស្ស៊ី​ត្រូវ​បង់​ទៅ​ក្នុង​ថវិកា​អ៊ីស្រាអែល ចំពោះ​អាជីវកម្ម​នេះ ពីព្រោះ​ភាគី​អ៊ីស្រាអែល​រមែង​ទារ​ឲ្យ​បង់​ពន្ធ​នោះ​ខ្ពស់​ជ្រុល ទាល់​តែ​ក្រុមហ៊ុន​រុស្ស៊ី​គ្មាន​ផលប្រយោជន៍​ធ្វើការ​ជីក​បូម​ឧស្ម័ន​នោះ​ឡើយ។

រីឯ​នៅ​ពេល​ទទួល​ជួប​លោក​នាយក​រដ្ឋមន្ត្រី​អ៊ីស្រាអែល Netanyahu តាម​ដែល​វិមាន​ក្រេមឡាំង​ប្រកាស​ឲ្យ​ដឹង លោក​ប្រធានាធិបតី​រុស្ស៊ី Medvedev ​នឹង​សង្កត់​ធ្ងន់​ទៅ​លើ​តួនាទី​រុស្ស៊ី ជា​អន្តរការី​មួយ ក្នុង​ការ​រៀប​រយ​អធិករណ៍​រ៉ាំរ៉ៃ រវាង​អ៊ីស្រាអែល និង​ប៉ាឡេស្ទីន ក្នុង​ផ្ទៃ​នៃ​ព្រឹត្តិការណ៍​ដែល​កំពុង​បោក​កញ្ជ្រោក​នៅ​តំបន់​ដើមបូព៌ា និង​នៅ​ទ្វីប​អាហ្វ្រិក​ខាង​ជើង​ជា​ពិសេស​នៅ​ប្រទេស​លីប៊ី។ ពួក​នយោបាយវិទូ នៅ​ទីនេះ កត់​សំគាល់​ថា ឥឡូវ​ជា​ឱកាស​ល្អ​សម្រាប់​រុស្ស៊ី​ដើរ​តួ​នេះ កាល​ដែល​អន្តរការី​៣​ទៀត ពោល​គឺ​ស.រ.អា សហភាព​អឺរ៉ុប និង អ.ស.ប.​កំពុង​ជាប់​ដៃ​​រវល់​នឹង​ស្ថានការណ៍​នៅ​លីប៊ី។

ក្នុង​ដំណោះស្រាយ​នេះ ទីក្រុង​ម៉ូស្គូ​បាន​បញ្ជាក់​ជា​ថ្មី ពី​គោលជំហរ​ខ្លួន​ដូច​តទៅ គឺ​ថា ៖
- សំរាប់​អ៊ីស្រាអែល គឺ​ត្រូវ​បញ្ឈប់​ការសាងសង់​ភូមិដ្ឋាន​អាណានិគមJuif នៅ​លើ​ទឹកដី​ប៉ាឡេស្ទីន
- សំរាប់​ប៉ាឡេស្ទីន គឺ​កុំ​អាល​ប្រកាស​ជា​ឯកតោ​ភាគី​អី​នូវ “រដ្ឋ​ប៉ាឡេស្ទីន​ឯករាជ្យ” ដរាប​ណា​ដែល​កិច្ចចរចា​ជាមួយ​អ៊ីស្រាអែល​ពុំ​ទាន់​ចប់​សព្វ​គ្រប់​នៅ​ឡើយ ហើយ​រដ្ឋ​បែប​នេះ នៅ​មិន​ទាន់​ទទួល​ស្គាល់​ដោយ​មហាសន្និបាត​អង្គការ​សហប្រជាជាតិ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI