បារាំង-អាហ្វ្រិកកណ្តាល

ទស្សនកិច្ច​ប្រមុខ​ការទូត​បារាំង​ នៅ​អាហ្វ្រិក​កណ្តាល​

លោក Laurent Fabius រដ្ឋមន្ត្រីការបរទេស​បារាំង​
លោក Laurent Fabius រដ្ឋមន្ត្រីការបរទេស​បារាំង​ REUTERS/Brendan McDermid

រដ្ឋមន្ត្រី​ការបរទេស​បារាំង Laurent Fabius បាន​បំពេញ​ទស្សនកិច្ច​នៅ​សាធារណរដ្ឋ​អាហ្វ្រិកកណ្តាល​ នៅថ្ងៃ​អាទិត្យ​នេះ ដើម្បី​បន្ត​​​​គោលដៅ​​បារាំង​ក្នុង​ការ​ទាក់ទាញ​សហគមន៍​អន្តរជាតិ​អោយ​ចាប់អារម្មណ៍​​លើ​​​វិបត្តិ​សន្តិសុខ​ និង​មនុស្សធម៌​ដែល​កំពុង​តែ​វាយប្រហារ​ប្រទេស​មួយនេះ។ ទស្សនកិច្ច​របស់​ប្រមុខការទូត​បារាំង​ធ្វើឡើង​តែ​ប៉ុន្មានថ្ងៃ​ប៉ុណ្ណោះ បន្ទាប់​ពី​អង្គការ​សហប្រជាជាតិ​បាន​បោះឆ្នោត​លើ​​សេចក្តីសំរេច​ស្នើឡើង​ដោយ​រដ្ឋាភិបាល​បារាំង អោយអង្គការ​សហប្រជាជាតិ​ពង្រឹង​វត្តមាន​ខ្លួន​នៅអាហ្វ្រិកកណ្តាល និង​​បញ្ជូន​កងទ័ព​មួកខៀវ​ទៅ​អាហ្វ្រិកកណ្តាល ក្នុង​ពេល​ខាងមុខ។

ផ្សាយពាណិជ្ជកម្ម

ក្នុង​ទស្សនកិច្ច​នៅសាធារណរដ្ឋ​អាហ្វ្រិកកណ្តាល​នៅថ្ងៃ​អាទិត្យ​នេះ លោក Laurent Fabius រដ្ឋមន្ត្រីការបរទេស​បារាំង​ ជួបជាមួយ​ប្រធានាធិបតី​​បណ្តោះអាសន្ន​ Michel Djotodia នាយករដ្ឋមន្ត្រី​ Nicolas Tiangaye និង​ប្រធានក្រុមប្រឹក្សា​ជាតិ​អន្តរកាល Alexandre-Ferdinand N’Guendet។ ​លោក Laurent Fabius និង​ពិភាក្សា​ជាមួយ​​ប្រមុខដឹកនាំ​នយោបាយ​ទាំងអស់​នេះ ពីស្ថានភាព​សន្តិសុខ និង​ប្រក្រតិទិន​បោះឆ្នោត ដែល​រដ្ឋាភិបាល​បណ្តោះអាសន្ន​អាហ្វ្រិកកណ្តាល​ត្រូវតែ​គោរព។ ប្រក្រតិទិន​នេះ ចែងថា រដ្ឋាភិបាល​អន្តរកាល​​មាន​រយៈពេលគ្រប់គ្រង​ប្រទេស​​១៨ខែ មុន​ពេលបោះឆ្នោត។

ប្រមុខការទូត​បារាំង​ចង់ទាក់ទាញ​ការចាប់អារម្មណ៍​ពីសហគមន៍​អន្តរជាតិ ទៅលើ​ប្រទេស​អាហ្វ្រិក​ដែល​កំពុង​​ស្ថិត​ក្បែរ​ជ្រោះ​មហន្តរាយមួយនេះ។ គួររំលឹកថា សាធារណរដ្ឋ​អាហ្វ្រិកកណ្តាល​កំពុង​ស្ថិត​ក្នុង​នយោបាយ​អន្តរកាល បន្ទាប់​ពី​សម្ព័ន្ធ​ក្រុមឧទ្ទាម​ឈ្មោះថា សេឡេកា Séléka បាន​ផ្តួល​​អតីត​ប្រធានាធិបតី​ François Bozizéមក។ ប្រធានាធិបតី Djotodia បច្ចុប្បន្ន​ គឺ​ជា​ប្រធាន​អតីត​សម្ព័ន្ធ​ក្រុមឧទ្ទាម​សេឡេកា​នេះឯង ហើយ​នៅពេល​នេះ លោកបាន​ព្យាយាម​​ស្ថិតនៅឆ្ងាយ​ពី​សម្ព័ន្ធឧទ្ទាម​នេះ។  

ជាច្រើន​ឆ្នាំ​​មកនេះ អសន្តិសុខ និង​វិបត្តិ​មនុស្សធម៌ ដូច​ជា​ការ​ឆក់ប្លន់ ឃាតកម្ម ការរំលោភ​ផ្លូវភេទ​ជាដើមនោះ បានវាយប្រហារ​​សាធារណរដ្ឋ​អាហ្វ្រិកកណ្តាល​ ​​ជំរុញ​អោយ​ប្រជាជន​៤សែននាក់​ភៀសខ្លួន។ ប្រជាជន​មួយភាគបី នៃ​ប្រជាជន​សរុប​ជិត​បួនលានកន្លះ កំពុងត្រូវការ​ជំនួយ​មនុស្សធម៌​​បន្ទាន់។

ប្រមុខការទូតបារាំង Laurent Fabius ចង់អោយ​សហគមន៍​អន្តរជាតិ​ទាំងមូល ចូលរួម​ដោះស្រាយ​បញ្ហា​នៅអាហ្វ្រិកកណ្តាល។ បារាំង​មិន​ចង់ចេញ​មុខ​តែម្នាក់ឯង ក្នុង​ការ​ដោះស្រាយ​នោះទេ។

កាលពី​ប៉ុន្មានថ្ងៃ​មុននេះ​ ​អង្គការ​សហប្រជាជាតិ​បាន​បោះឆ្នោត​លើ​សេចក្តីសំរេច​ស្នើឡើង​ដោយ​រដ្ឋាភិបាល​បារាំង អោយមានការ​​បញ្ជូន​កងទ័ព​មួកខៀវ​ទៅ​អាហ្វ្រិកកណ្តាល ក្នុង​ដំណើរ​​ប្រត្តិបត្តិការ​​​ការពារ​សន្តិភាព។

ដោយឡែក នៅ​ភាគ​ពាយព្យអាហ្វ្រិកកណ្តាល ការប្រឈម​រវាង​អតីត​សម្ព័ន្ធ​ឧទ្ទាម​សេឡេកា និង​ក្រុមប្រដាប់អាវុធ​មួយ បាន​សម្លាប់​មនុស្ស​ប្រមាណ​៥០នាក់ កាលពីថ្ងៃ​អង្គារ​​ដើមសប្តាហ៍​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI