អានតួអត្ថបទ
ប៉ាគីស្តង់-​អឺរ៉ុប

សម្ពាធ​តានតឹង នៃ​ដំណើរ​ទស្សនកិច្ច របស់​ប្រធានាធិបតី​ប៉ាគីស្តង់​នៅ​អឺរ៉ុប

ប្រធានាធិបតី​បារាំង សាកូហ្ស៊ី (ឆ្វេង) និង​សមភាគី​ប៉ាគីស្តង់ លោក ហ្សាដារី ថ្ងៃ​ទី​២​ សីហា ២០១០ នៅ​វិមាន​Elysée
ប្រធានាធិបតី​បារាំង សាកូហ្ស៊ី (ឆ្វេង) និង​សមភាគី​ប៉ាគីស្តង់ លោក ហ្សាដារី ថ្ងៃ​ទី​២​ សីហា ២០១០ នៅ​វិមាន​Elysée REUTERS
ដោយ៖ អៀង សុខម៉ិញ
១៨ នាទី

បន្ទាប់​ពី​ប៉ារីស នៅ​ថ្ងៃ​ពុធ​ទី ៤ សីហា ស្អែក​នេះ លោកប្រធានាធិបតី​ប៉ាគីស្តង់ អាស៊ីហ្វ អាលី ហ្សាដារី នឹង​​បន្ត​ដំណើរ​ទស្សនកិច្ចរបស់​លោក​​ នៅ​ប្រទេស​អង់គ្លេស។ សម្រាប់​ក្រុង​អ៊ីស្លាមាបាត ទស្សនកិច្ច​នៅ​ទីក្រុង​ឡុងដ៍ ​ប្រព្រឹត្ត​ទៅ​ក្រោម​សម្ពាធ​​មួយដ៏តាន​តឹង​ ​ ដ្បិត​​នាយក​រដ្ឋមន្ត្រី​អង់គ្លេស លោក ដេវីត កាមឺរ៉ូន ដែល​លោក​ ហ្សាដារី នឹង​ត្រូវ​ជួប​សន្ទនា បាន​ចោទ​ប្រកាន់​ប៉ាគីស្តង់​​ថា​ បាន​គាំទ្រ​ពួក​ភេរវនិយម​តាលីបង់។ ហើយ​​ពេលជួប​ជាមួយ​នឹង​ប្រធានាធិបតី​បារាំង ​​ក្រុង​ប៉ារីស​និង​អ៊ីស្លាម៉ាបាត ហាក់ពុំ​មាន​ពិភាក្សា​លើ​សំណុំ​រឿង​អ្វី​ជា​ដុំ​កំភួន​ទេ។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

បារាំង​ប្រាថ្នា​ចង់​ឃើញ​​ប៉ាគីស្តង់ ក្លាយ​ជា​ភ្ញៀវ​ដ៏​ល្អមួយ​របស់​បារាំង មាន​កិច្ច​សហប្រតិបត្តិការ​ល្អ ដើម្បី​សុវត្ថិភាព​នុយក្លេអ៊ែរ និង​ជា​អ្នក​​​ទទួល​ទិញ​បច្ចេកវិទ្យា​នុយក្លេអ៊ែរ​ស៊ីវិល ដែល​ប្រទេស​​បារាំង​ជា​អ្នក​នាំ​ចេញ​ដ៏​ធំមួយ។ យោង​តាម​អ្នក​នាំពាក្យ​​បារាំង លោក នីកូឡា សាកូហ្ស៊ី ​ ប្រធានាធិបតី​បារាំង បាន​ផ្តល់​កម្លាំង​ចិត្ត​ និង​សន្យា​នឹង​ពង្រឹង​ភាព​ជា​ដៃ​គូ ក្នុង​ការ​​ប្រយុទ្ធប្រឆាំង​នឹង​អំពើ​ភេរវនិយម។ តែ​​ជោគ​វាសនា​​របស់​អ្នក​កាសែត​បារាំង​ពីរ​​រូប​ដែល​ត្រូវ​គេ​ចាប់​ខ្លួន​អាហ្វហ្កានិស្តង់ និង​ភេរវកម្ម​សម្លាប់​ជនជាតិ​បារាំង​១១​នាក់ នៅ​ក្រុង​ ការ៉ាហ្ស៊ីត កាលពី​ឆ្នាំ​២០០២ មិន​បានត្រូវ​លើកយក​ពិភាក្សា​ទេ។ ជំនួប​រវាង​លោក​ សាកូហ្ស៊ី និង​ លោក​ ហ្សាដារី ម្សិលមិញ ក៏​មិន​បាន​លើក​ឡើង​អំពី​សំណុំ​រឿង​រកាំរកូស​ពាក្យ​សំដី​រវាង​អង់គ្លេស​និង​ប៉ាគីស្តង់​ដែរ។

ប៉ុន្តែ​ដំណើរ​ទស្សនកិច្ច​នៅ​ក្រុង​ឡុងដ៍​ នៅ​ថ្ងៃស្អែក ទំនង​ជា​នឹង​មានសភាព​ស្មុគស្មាញ​ជាង។ ពីរ​បី​ថ្ងៃ​មក​ហើយ ដែល​នយោបាយ​ក្រុង​អ៊ីស្លាម៉ាបាត ទទួល​រង​ការ​រិះគន់​យ៉ាង​ខ្លាំង​​។ ក្នុង​ពេល​ធ្វើ​ទស្សនកិច្ច​នៅ​ប្រទេស​ឥណ្ឌា លោក​នាយក​រដ្ឋមន្ត្រី​អង់គ្លេស បាន​ថ្លែង​ចោទ​ប្រកាន់​ប៉ាគីស្តង់​ខ្លាំងៗ​ ខុស​ពី​ទម្លាប់​ ថា ប៉ាគីស្តង់​កំពុង​លេង​ល្បិច​ចាប់​ត្រី​ដៃ​ពីរ ដោយ​ដៃ​ម្ខាង​ទទួល​ជំនួយ​ពី​អន្តរជាតិ​ដើម្បី​ប្រយុទ្ធ​ប្រឆាំង​នឹង​អំពើ​ភេរវនិយម តែ​ដៃ​ម្ខាង​ទៀត​ហុច​ឲ្យ​ពួក​តាលីបង់។

សំណើ​នេះ​បាន​ធ្វើ​ឲ្យ​ក្រុង​អ៊ីស្លាម៉ាបាត​ខឹង​សម្បារ តែ​លោក​ ដេវីត កាមឺរ៉ូន មិន​ផ្លាស់​ប្តូរ​ពាក្យ​សំដី​ឡើយ។ ដើម្បី​​បង្ហាញ​ពី​ការ​មិន​ពេញ​ចិត្ត ប្រមុខ​ស៊ើប​ការ​សម្ងាត់​ប៉ាគីស្តង់ បាន​សម្រេច​​មិន​បន្ត​ដំណើរ​​ទស្សនកិច្ច​ជាមួយ​ប្រធានាធិបតី​ទៅ​កាន់​​ប្រទេស​អង់គ្លេស​ទេ។ ចំណែក​ឯកអគ្គរដ្ឋទូត​អង់គ្លេស ប្រចាំ​ក្រុង​អ៊ីស្លាម៉ាបាត ​ត្រូវ​បាន​ប្រមុខ​ការ​ទូត​ប៉ាគីស្តង់​កោះ​ហៅ​ឲ្យ​ចូល​ជួបដែរ កាលពី​ម្សិលមិញ។

ម្យ៉ាង​វិញ​ទៀត ដំណើរ​ទស្សនកិច្ចរបស់​ប្រធានាធិបតី​ប៉ាគីស្តង់​នៅ​បារាំង និង​អង់គ្លេស​នេះ​ ធ្វើ​ឡើង​ជួន​ចំ​ពេល​ដែល​ឯកសារ​សម្ងាត់​អាមេរិក បាន​ធ្លាយ​ចេញ​តាម​អ៊ីនធឺណែត បញ្ជាក់​ពី​ទំនាក់​ទំនង​រវាង​ប៉ាគីស្តង់ និង​ពួក​ភេរវនិយម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ