ថៃ

ជិត​​ដល់​ពេល​បោះឆ្នោត​ លោក​អាភីស៊ីត​ធ្វើការ​វាយ​បក​គូបដិបក្ស​នយោបាយ​ខ្លួន

នាយករដ្ឋមន្ត្រីថៃ Abhisit Vejjajiva អមការពារដោយក្រុមទាហានការពារសន្តិសុខ​និង​បក្ស​ព័ន្ធ​គាំទ្រ​លោក នៅទីស្នាក់ការ​នៃ គណបក្ស​ប្រជាធិបតេយ្យនៅទីក្រុង​បាងកក។​
នាយករដ្ឋមន្ត្រីថៃ Abhisit Vejjajiva អមការពារដោយក្រុមទាហានការពារសន្តិសុខ​និង​បក្ស​ព័ន្ធ​គាំទ្រ​លោក នៅទីស្នាក់ការ​នៃ គណបក្ស​ប្រជាធិបតេយ្យនៅទីក្រុង​បាងកក។​ REUTERS/Kerek Wongsa

នាយក​រដ្ឋមន្ត្រី​ថៃ​ លោក ​អាភីស៊ីត​វាចាជីវ៉ា​ (Abhisit Vejjajiva ) នៅ​ថ្ងៃ​ព្រហស្បតិ៍​ម្សិលមិញ​ បាន​​ធ្វើ​​ការ​​វាយ​​បក​ដោយ​ប្រមាថ​មើលងាយ​​ទៅ​លើ​គូបដិបក្ស​នយោបាយ​​របស់​ខ្លួន​ ជា​ពិសេស​​​ទៅ​​លើ​​អតីត​​នាយក​​រដ្ឋមន្ត្រី​ថៃ​ថាក់ស៊ីន​ស៊ីណាវ៉ាត្រ​ដើម្បី​ប៉ុនប៉ង​ ផ្តល់​សន្ទុះ​​យុទ្ធនាការ​​ឃោសនា​​បោះឆ្នោត​​​របស់​លោក​នា​មុន​​​ថ្ងៃ​បោះឆ្នោត​ ទី​ ៣​ កក្កដា។

ផ្សាយពាណិជ្ជកម្ម

 

គណបក្ស​ប្រជាធិបតេយ្យ របស់លោកនាយករដ្ឋមន្ត្រីបច្ចុប្បន្ន អាភីស៊ីតវេចាជីវ៉ា ​នៅ​ថ្ងៃ​ព្រហស្បតិ៍​​​ម្សិលមិញ​​ បានធ្វើ មីទ្ទិញមួយក្នុងយុទ្ធនាការឃោសនា​បោះឆ្នោតទ្រង់ទា្រយធំ​​មួយ​​​នៅ​​ចំ​កណ្តាល​​​ទីក្រុង​​បាងកក ទីកន្លែង ដែល​​ក្រុមបាតុករអាវក្រហម ធ្លាប់​ បាន​កាន់​កាប់​នៅ​ខែ​មេសា​​​ឆ្នាំ​២០១០ ​។ ក៏​នៅទីនោះហើយ- ដែល​​មាន​ការ ប្រឈមមុខ​គ្នា​យ៉ាង​កាច​សាហាវ​បំផុត  រវាង​ពួក​ទាហាន​ថៃនិង​​ក្រុមបាតុករ​ប្រឆាំង​រដ្ឋាភិបាល​អាភីស៊ីត​ដែល​បណ្តាល​​​ឲ្យមនុស្សស្លាប់​ជាង៩០នាក់និង​របួស​១៩០០នាក់។

នៅចំពោះមុខបក្សព័ន្ធគណបក្សប្រជាធិបតេយ្យ​ជាង​៣​ម៉ឺន​នាក់ លោក​អាភីស៊ីត បាន​ថ្លែង​ការពារ​​ចំណាត់ការ​របស់​លោក ​នៅ​ក្នុង​អំពើ​ហិង្សា​នយោបាយ កាលពី​ខែ​មេសា​ឆ្នាំ​​២០១០ នោះ និង​បាន​ធ្វើ​ការ​វាយប្រហារ​ចំៗ ទៅ​លើ​លោក ថាក់ស៊ីន​ដែល​​ជា​វីរជន​​របស់​ក្រុម​អាវ​ក្រហម ដោយ​បាន​អំពាវនាវ​អ្នក​បោះឆ្នោត ជម្រះ​ចិត្ត​ឲ្យ​អស់​ពី​ឥទ្ធិពល​លោក​ថាក់ស៊ីន។​ មិនតែប៉ុណ្ណោះ លោក​អាភីស៊ីត បាន​សង្កត់​ធ្ងន់​ទៀត​ថា ​“បើ​អ្នក​បោះឆ្នោត​ មិន​គាំទ្រ​គណបក្ស​ប្រជាធិបតេយ្យ​ដែល​កំពុង​គ្រប់គ្រង​រដ្ឋ​អំណាច​នោះ​ទេ” នៅ​ពេល​អនាគត ពលរដ្ឋថៃ នឹង​ក្លាយ​ទៅ​​​ជា​ចំណាប់​ខ្មាំង របស់​ពួក​ជន​ដែល​ស្រឡាញ់​អំពើ​ហិង្សា។

ដោយហេតុតែ​បច្ចុប្បន្ន​នេះ គណបក្ស​ភឿថៃ ឬ ក្រុម​អាវក្រហម មាន​​ប្រជាប្រិយភាព​​ខ្លាំងក្លា ទើប​​ពួក​ប្រជាធិបតេយ្យ​ ខិតខំ​ធ្វើ​ការ​វាយសម្រុក​​ដាក់​សម្ពាធ​​​ទៅ​លើ​​បក្ស​ប្រឆាំង​ថៃ ដោយ ចោទ​ប្រកាន់​ថា ជាប់​ពាក់ព័ន្ធ​នឹង​អំពើ​ហិង្សា​នយោបាយ​ដ៏​ធ្ងន់ធ្ងរ​​​កាលពី​​ឆ្នាំ​មុន​ដែល​​ប្រទេស​ថៃ​ទំនើប​នេះ ​ពុំ​ធ្លាប់​ឆ្លង​កាត់។

ស្របគ្នា​នេះ​ដែរ នៅ​ថ្ងៃ​ព្រហ្បតិ៍​២៣​មិថុនា​ម្សិលមិញ ឧបនាយក​រដ្ឋមន្ត្រី​ថៃ ទទួល​បន្ទុក​ផ្នែក​សន្តិសុខ លោក Suthep Thaugsuban បាន សង្កត់​ពាក្យ​ដដែលៗ​ថា “ បោះឆ្នោត​ឲ្យ​គណបក្ស​​ភឿថៃ គឺ មានន័យថា បាន​ជ្រើស​យក ពួក​ភេរវជន មក​ធ្វើ​ជា​អ្នក​តំណាងរាស្រ្ត” !។ ពាក្យ​សំដី​នេះ គឺ​លោក​ស៊ូថេប ចង់​លេបខាយ​សំដៅ​ទៅ​លើ ពួក​មេដឹក​នាំ​អាវ​ក្រហម​ដែល​ជាប់​ចោទ​ពី​បទភេរវកម្ម​និង​ទៅ​លើ បេក្ខជន​នៃ​គណបក្ស​ប្រឆាំង​ដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI