រុស្ស៊ី-បារាំង

ការចរចា​ស្តាប់​គ្នា​មិន​បាន​ស្តីពី​វិបត្តិ​ស៊ីរី​

លោកប្រធានាធិបតីរុស្ស៊ី Vladimir Poutine (ឆ្វេង)និងលោកប្រធានាធិបតីបារាំង François Hollande នៅឱកាសសន្និសីទសាព័ត៌មាននៅl'Elyséeនៅថ្ងៃសុក្រ ១មិថុនា២០១២
លោកប្រធានាធិបតីរុស្ស៊ី Vladimir Poutine (ឆ្វេង)និងលោកប្រធានាធិបតីបារាំង François Hollande នៅឱកាសសន្និសីទសាព័ត៌មាននៅl'Elyséeនៅថ្ងៃសុក្រ ១មិថុនា២០១២ REUTERS/Philippe Wojazer

បារាំង​​និង​រុស្ស៊ី​​និយាយ​​ស្តាប់​គ្នា​មិន​បាន​​ស្តីពី​វិបត្តិ​​ស៊ីរី។​​នៅ​​ឱកាស​​​សន្និសីទ​​​សារព័ត៌មាន​​​​​​រួម​​គ្នា​​មួយ​​ជាមួយ​​ប្រធានាធិបតី​​រុស្ស៊ី ​​Vladimir Poutine​ នៅ​​ប៉ារីស​​កាលពី​​យប់មិញ​​ លោក​ប្រមុខ​រដ្ឋ​​បារាំង​បាន​​អះអាង​​ថា « វិបត្តិ​​ស៊ីរី​​អាច​​ដោះស្រាយ​​ទៅ​​រួច​លុះណា​​តែ​​លោក ​Bachar el Assad​​​ចាក​ចេញ​​​ពី​​មុខ​​តំណែង”។​រីឯ ​លោក​ពូទីន​វិញ​ដែល​គាំទ្រ​ប្រទេស​រុស្ស៊ី​ជានិច្ច​នោះ​​បាន​​ព្រមាន​​ថា​ រុស្ស៊ី​ប្រឆាំង​នឹង​ការ​ដាក់​ទណ្ឌកម្ម​និង​អន្តរាគមន៍​តាម​ផ្លូវយោធា​របស់​អន្តរជាតិ​ ប្រឆាំង​របប​​ទីក្រុង​​​ដាម៉ាស។​​

ផ្សាយពាណិជ្ជកម្ម

“បារាំង​​និង​រុស្ស៊ី​នៅ​មិន​ទាន់​និយាយ​ត្រូវ​រ៉ូវ​គ្នា​នៅឡើយទេ​ជា​អាទិ៍ ស្តីពី​ការ​ទទួល​ខុសត្រូវ​ចំពោះ​​​​វិបត្តិ​ស៊ីរី។ ប្រទេស​បារាំង​ចាត់​ទុក​របប​លោក Bachar el Assad ថា​ជា​អ្នក​ទទួល​ខុសត្រូវ​ទាំង​ស្រុង​ចំពោះ​ស្ថានការណ៍​នៅ​ក្នុង​ប្រទេស​ស៊ីរី។ របប​ លោក Bachar el Assad បាន​ប្រព្រឹត្ត​អំពើ​ដែល​​មិន​អាចឲ្យ​ទទួលយក​បាន​និង​ក៏​មិន​អាចឲ្យ​​អត់អោន​បាន​ជា​ដាច់​ខាត​-នេះ​ជា​សេចក្តី​ថ្លែង​របស់​លោក​ប្រធានាធិបតី​បារាំង​ François Hollande។​ រីឯលោក​ Vladimir Poutine ប្រធានាធិបតីរុស្ស៊ីវិញ បាន​លើកឡើង​​អំពី​មនុស្ស​ស្លាប់​​ជា​ច្រើន​រយ​នាក់​នៅ​​ប្រទេស​​ស៊ីរី​​ដែល​​បណ្តាល​មក​ពី​ចលនា​ឧទ្ទាម។

ការនិយាយ​មិនចុះសម្រុងគ្នា​វាង​បារាំង​និង​រុស្ស៊ី ជាពិសេស​ស្តីពី​ការ​រកដំណោះស្រាយ​មួយ​ដើម្បី​​​ឲ្យស៊ីរី អាច​​ចេញ​​ផុត​ពី​វិបត្តិបច្ចុប្បន្ន។ ប្រសិន​បើ​ម្នាក់ៗ​យល់​ឃើញ​ថា មាន​តែ​ដំណោះ​ស្រាយ​​តាម​ផ្លូវ​នយោបាយមួយ​ដែល​អាច​ជា​ដំណោះស្រាយ​ប្រសើរ​​នោះ រុស្ស៊ី ​វិញ​ ចាត់ទុក​ថា វា​ជា​ដំណោះស្រាយ​មានតែ​មួយ​គត់​ប៉ុណ្ណោះ។​

ផ្ទុយទៅវិញ​ បារាំងគិត​ថាក្នុង​ខណៈនេះគេ​ត្រូវ​តែ​ធ្វើ​សកម្មភាព​ជាអាទិ៍​ការ​ដាក់​ទណ្ឌកម្ម​ជា​បន្ថែម​ទៀតរបស់​អសប​ប្រឆាំង​របប​ស៊ីរី​។ ប៉ុន្តែលោកពូទីន​ អះអាងថា ការ​ដាក់​ទណ្ឌកម្ម​​កន្លង​មក ​​មិនដែលមានប្រសិទ្ធិភាពរាល់តែពេលនោះទេ។

 ប្រមុខរដ្ឋបារាំងនិងរុស្ស៊ី​ ក៏មានការ​​ខ្វែងគំនិតគ្នាដែរ អំពី​​ជោគវាសនារបស់​លោក Bachar el Assad។​ចំពោះលោក François Hollande  ការ​ចាក​ចេញពីអំណាច​​របស់​លោក​​ Bachar el Assad គឺជា​កត្តា​ចាំបាច់ដើម្បី​​ឲ្យមាន​​អន្តរកាល​នយោបាយមួយ។ រីឯលោក​ពូទីនវិញ​ បាន​ព្រមានតបវិញ​ថា​ លោក​ប្រឆាំង​ចំពោះ​ដំណោះស្រាយ​បែប​នេះដែលនឹង​បង្ក​​​អសន្តិសុខ​​កាន់​តែ​ធ្ងន់ធ្ងរថែមទៀតដូចគ្នា​នឹង​ហេតុការណ៍​ដែល​បាន​កើត​ឡើង​កន្លង​មក​​​នៅ​អ៊ីរ៉ាក់​និង​នៅ​លីប៊ី​។​

ទាក់ទងនឹងសំណួរស្តីពីលទ្ធភាពរបស់រុស្ស៊ីក្នុង​ការទទួលស្វាគមលោក​ Bachar el Assad នៅ​លើ​ទឹកដីរុស្ស៊ី លោកពូទីនបាន​ថ្លែង​​ចំអក​​ដោយ​ឥត​រួញរា​ថា អ្នក​ដឹកនាំ​ស៊ីរី បាន​មក​បំពេញ​ទស្សនកិច្ច​នៅ​ទីក្រុង​ប៉ារីស​ច្រើនដងជាងនៅម៉ូស្គូ។ ក្នុងសំនៀង​ដូចគ្នានេះ​លោក​ប្រមុខ​រដ្ឋ​បារាំង​ បាន​ឆ្លើយ​តប​វិញភ្លាម​ថា”​ទស្សនកិច្ច​របស់ លោក Assadឪពុក​និងAssad ​កូន​​ពុំមែន​ស្ថិត​នៅ​ក្រោមការ​ទទួល​ខុស​ត្រូវ​របស់​ខ្ញុំ​ទេ”​។

សូម​បញ្ជាក់​ថា ​លោក Hafez el Assad ដែលជាឪពុក​របស់លោក Bachar el Assad និង​ស្លាប់​នៅ​ឆ្នាំ២០០០ ធ្លាប់មកប៉ារីស​តាមសេចក្តីអញ្ជើញ​របស់អតីតប្រធានាធិបតី​បារាំង Jacques Chirac ​នៅ​ខែ​កក្កដា​ឆ្នាំ​១៩៩៨។ ចំណែក កូនប្រុស របស់គាត់គឺលោក Bachar el Assad ​ដែល​​បានបន្តស្នងតំណែងពីឪពុក បាន​មកប៉ារីសចំនួន​២ដង​តាម​ការអញ្ជើញ​របស់​អតីត​ប្រធានាធិបតីបារាំង នីកូឡាសាកូហ្ស៊ី​នៅខែ​កក្កដា២០០៨​និង​ខែ​វិច្ឆិកា២០០៩។

នៅឱកាសទស្សនកិច្ចរបស់លោកពូទីននៅប៉ារីសនេះ ក្រុមអ្នកប្រឆាំងលោក​Vladimir Poutine និងរបបលោក Bachar el Assad រាប់​សិបនាក់-បានមកជួបជុំគ្នា​នៅក្បែរ​រុក្ខវិថី​​ champs-Elyséesដើម្បីទិតៀនរិះគន់រដ្ឋបុរស​​​ទាំងពីរ​និងទំនាក់ទំនងដែលគេផ្សារ​ភ្ជាប់​ជាមួយគ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI