រុស្ស៊ី

រុស្ស៊ី​បន្តឹង​ទណ្ឌកម្ម​ចំពោះ​គ្រោះថ្នាក់​ចរាចរណ៍​ដែល​បង្ក​ដោយ​ភាព​ស្រវឹង​

រុស្ស៊ីបន្តឹងទណ្ឌកម្មចំពោះគ្រោះថ្នាក់ចរាចរណ៍ដែលបង្កដោយភាពស្រវឹង
រុស្ស៊ីបន្តឹងទណ្ឌកម្មចំពោះគ្រោះថ្នាក់ចរាចរណ៍ដែលបង្កដោយភាពស្រវឹង RFI/Keo Chhaya

បញ្ហា​នេះ​​ ឥឡូវ ​ជា​កម្មវត្ថុ​ចម្បង​នៃ​ការ​ពិភាក្សា​របស់​រដ្ឋអំណាច​គ្រប់​ជាន់ថ្នាក់ គឺ​ទាំង​នាយក​រដ្ឋមន្ត្រី ទាំង​វិមាន​ក្រេមឡាំង ទាំង​សភា​ឌូម៉ា។ មូលហេតុ មក​ពី​នៅ​រុស្ស៊ី ចេះ​តែ​កើត​មាន​​គ្រោះថ្នាក់​ចរាចរណ៍ បណ្តាល​មក​ពី​ភាព​ស្រវឹង។ នាំ​ឲ្យ​សង្គម​រន្ធត់​មែនទែន គឺ​កាល​ពី​ថ្ងៃ​សៅរ៍​កន្លង​ទៅ នៅ​តាម​វិថីមួយ​នៃ​ក្រុង​ម៉ូស្គូ អ្នក​បើកឡាន​ម្នាក់​ដែល​ស្រវឹង​ជោគ បាន​បើក​ទៅ​បុក​ចំណតរថយន្ត Bus សម្លាប់​មនុស្ស​អស់​៧នាក់​តែ​ម្តង ពេល​គេ​កំពុង​ឈរ​ចាំ​ឡាន Bus។

ផ្សាយពាណិជ្ជកម្ម

 

ពិរុទ្ធជន​នេះ ក្រោយ​ពី​ត្រូវ​ប៉ូលីស​ឃាត់​ខ្លួន បាន​សារភាព​ថា គាត់​បាន​ផឹក​ស្រា​អស់ ពីរថ្ងៃ​ជាប់ ដោយ​ក្តៅចិត្ត​នឹង​ប្រពន្ធ​លែង​ក្បាល​ចោល។ ការ​ធ្វើ Test បង្ហាញ​ឲ្យ​ឃើញ​ថា មុន​នឹង​បើក​ឡាន Toyota ដែល​គាត់​ជាន់​ដល់​ល្បឿន ២០០គ.ម. ក្នុង១ម៉ោង គាត់​បាន​ផឹកស្រា Vodka មិនតិចជាង​១លីត្រ​ឡើយ។ ពិត​ជា​ល្បឿន​នេះ​ឯង ដែល​បាន​បុក​ចំណត​រថយន្ត Bus ឲ្យ​ខ្ទាត​ទៅ​ចម្ងាយ​រាប់​សិបម៉ែត្រ ហើយ​ក្នុង​ចំណោម​មនុស្ស​១១នាក់ ដែល​ឈរ​ចាំ​ឡាន Bus មាន​៧នាក់ ធ្លាក់​ខ្លួន​ស្លាប់​នៅ​នឹង​កន្លែង ចំណែក​៤នាក់​ទៀត​របួស​ធ្ងន់។

ថ្លែង​ម្សិលមិញ ក្នុង​កិច្ចប្រជុំ​ឧទ្ទិស​ដល់​បញ្ហា​នេះ លោក​នាយក​រដ្ឋមន្ត្រី មេដវេដេវ កត់សម្គាល់​ថា ច្បាប់​សព្វ​ថ្ងៃ​ដែល​ថ្កោលទោស​ពួក​អ្នកបើក​រថយន្ត​ស្រវឹង​បែប​នេះ ចំពោះ​ការ​បង្ក​ឲ្យ​មាន​គ្រោះថ្នាក់​រហូត​ដល់​ស្លាប់ គឺ​នៅ​ធូររលុង​នៅ​ឡើយ។ គប្បី​ធ្វើ​វិភាគ ហើយ​យោង​ទៅ​លើ​ការ​អនុវត្តន៍​នៅ​តាម​ប្រទេស​ឯទៀត​ផង​ដែរ សម្រាប់​ធានា​ឲ្យ​មាន​សុវត្ថិភាព​យ៉ាង​កក់ក្តៅ នៅ​តាម​ផ្លូវ ក្នុង​ន័យ​ថា រឹតបន្តឹង​មែនទែន ទណ្ឌកម្ម​ទៅ​លើ​ពួក​បើក​រថយន្ត​ណា​ដែល​បង្ក​ឲ្យ​មាន​គ្រោះថ្នាក់​ចរាចរណ៍ រហូត​ដល់​ផ្តាច់​ជីវិត​មនុស្ស។ ដ្បិត ទង្វើ​គេ តាម​ធាតុ​ពិត​ដែល​មាន គឺ​ជា​ឧក្រិដ្ឋកម្ម​តាម​បទព្រហ្មទណ្ឌ ឥត​ប្រកែក​បាន។ សំនើ​នេះ​របស់​ប្រមុខ​រដ្ឋាភិបាល​រុស្ស៊ី នៅ​ថ្ងៃ២៤ កញ្ញា​ដដែល តាមរយៈ​អ្នកនាំពាក្យ​ផ្លូវការ​របស់​ប្រធានាធិបតី​រុស្ស៊ី​បាន​ទទួល​ការ​គាំទ្រ​ពេញទី ពី​ខាង​វិមាន​ក្រេមឡាំង។

គួរ​និយាយ​ថា ច្បាប់​រុស្ស៊ី​សព្វថ្ងៃ​ថ្កោលទោស​អ្នកបើក​រថយន្ត​ស្រវឹង ចំពោះ​ករណី​ដែល​បណ្តាល​ឲ្យ​មាន​មនុស្ស​ធ្លាក់​ខ្លួន​ស្លាប់ គឺ​ឲ្យ​ជាប់​ពន្ធនាគារ យ៉ាង​យូរ​ណាស់​ត្រឹម ៩ ឆ្នាំ។ ម៉្លោះ​ហើយ បាន​ជា​ពួក​អ្នកតំណាងរាស្ត្រ មាន​ភាគច្រើន​ដាច់ខាត​ខាង​បក្ស​កាន់អំណាច​ដល់​ទៅ ២៣៨សម្លេង លើ ៤៥០ អាសនៈ​ក្នុង​ន័យ​មួលខ្ចៅ​បន្តឹង​នេះ នឹង​ដាក់​ជូន​សភា​ឌូម៉ា​អនុម័ត គឺ​គម្រោង​ច្បាប់​ដែល​ប្រមើល​បង្កើន​ការ​ថ្កោលទោស​នោះ ឲ្យ​ជាប់​ពន្ធនាគារ​ចាប់​ពី ១៥ឆ្នាំ​ឡើង​ទៅ រហូត​ដល់​មួយ​ជីវិត។ ជា​ឧទាហរណ៍ គេ​ថា​ច្បាប់​នៅ​ប្រទេស​ចិន និង​ប្រទេស​ថៃ ប្រមើល​ការ​ថ្កោលទោស​បែប​នេះ មិន​គ្រាន់​តែ​ឲ្យ​ជាប់​គុក​មួយ​ជីវិត​ប៉ុណ្ណោះ​ទេ តែ​គឺ​រហូត​ដល់​ប្រហារ​ជីវិត​តែ​ម្តង។ តាម​តួលេខ​មហាផ្ទៃ នៅ​រុស្ស៊ី គិត​ជា​មធ្យម​ក្នុង​១ថ្ងៃៗ មាន​មនុស្ស​ប្រមាណ ១០០នាក់ ធ្លាក់​ខ្លួន​ស្លាប់​នៅ​តាម​ផ្លូវ​នៃ​ប្រទេស។ ក្នុង​៨ឆ្នាំ​ចុងក្រោយ មាន​ស្លាប់​អស់ ៣០០.០០០នាក់ គឺ​ស្មើ​នឹង​បណ្តាជន​ក្រុង​មួយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI