កម្ពុជា

ធនាគារ​អភិវឌ្ឍន៍​អាស៊ី​រក្សា​ការ​ព្យាករ​កំណើន​សេដ្ឋកិច្ចកម្ពុជា ៧,២ %ក្នុង​ឆ្នាំ ២០១៣

អ្នក​តំណាង​ធនាគារ​អភិវឌ្ឍន៏អាស៊ី (ADB) នៅ​កម្ពុជា។
អ្នក​តំណាង​ធនាគារ​អភិវឌ្ឍន៏អាស៊ី (ADB) នៅ​កម្ពុជា។ ©meng hour/RFI

ធនាគារ​អភិវឌ្ឍន៍​អាស៊ី (ADB) បាន​រក្សា​ការ​ព្យាករ​កំណើន​សេដ្ឋកិច្ច​រប​ស់​ខ្លួន​ឲ្យ​នៅ​ត្រឹម ៧,២ ភាគរយ​ដដែល​ក្នុង​ឆ្នាំ ២០១៣​នេះ។ យោង​តាម​សេចក្តីប្រកាស​ព័ត៌មាន​មួយ​ដែល​ចេញ​ផ្សាយ​នៅ​ថ្ងៃ​ពុធ​នេះ ធនាគារ​អភិវឌ្ឍន៍​អាស៊ី​បញ្ជាក់​ថា ការ​រក្សា​កំណើន​សេដ្ឋកិច្ច​ខ្ពស់​នេះ​ដោយសារ​តែ​កំណើន​នៃ​ការ​នាំ​ចេញ និង​សន្ទុះ​ដ៏​រឹងមាំ​នៃ​វិស័យ​សំណង់ និង​សេវាកម្ម។

ផ្សាយពាណិជ្ជកម្ម

សេដ្ឋកិច្ច​កម្ពុជា​ក្នុង​ឆ្នាំ ២០១៣ មាន​កំណើន ៧,២ ភាគរយ។ នេះ​បើ​យោង​តាម​ការ​ព្យាករ​របស់​ធនាគារ​អភិឌ្ឍន៍​អាស៊ី (ADB)។ កំណើន​នៃ​ការ​នាំ​ចេញ និង​សន្ទុះ​ដ៏​រឹង​មាំ​នៃ​វិស័យ​សំណង់ និង​សេវាកម្ម គឺ​ជា​មូលដ្ឋាន​នៃ​កំណើន​សេដ្ឋកិច្ច​របស់​កម្ពុជា។ 

យោងតាម​ធនាគារ​អភិវឌ្ឍន៍​អាស៊ី នៅ​ឆ្នាំ ២០១៤​ខាងមុខ កំណើន​សេដ្ឋកិច្ច​កម្ពុជា​អាច​នឹង​ឡើង​ដល់ ៧,៥ ភាគរយ​ដោយសារ​តែ​សេដ្ឋកិច្ច​នៅ​អាមេរិក និង​អឺរ៉ុប​ងើប​ឡើង​វិញ។

នាយក​ប្រចាំ​កម្ពុជា​របស់ ADB លោក លោក Eric Sidgwick បាន​មាន​ប្រសាសន៍​តាមរយៈ​សេចក្តី​ប្រកាស​ព័ត៌មាន​នៅ​ថ្ងៃ​ពុធ​នេះ​ថា ក្នុង​រយៈពេល​២​ឆ្នាំ​ខាង​មុខ កំណើន​សេដ្ឋកិច្ច​កម្ពុជា​នៅ​តែ​មាន​សន្ទុះ​រឹងមាំ ដែល​បាន​ឆ្លុះ​បញ្ចាំង​ពី​កំណែ​ទម្រង់​ស្ថិរស្ថេរ និង​ការ​ងើប​ឡើង​វិញ​នៃ​ទីផ្សារ​សាកល។ ធនាគារ​អភិវឌ្ឍន៍​អាស៊ី​បន្ត​ឲ្យ​ដឹង​ទៀត​ថា ការ​នាំចេញ​សម្លៀក​បំពាក់ និង​ស្បែក​ជើង​ទៅ​កាន់​សហរដ្ឋអាមេរិក និង​អឺរ៉ុប​បាន​កើន​ឡើង​ជាង ១១ភាគរយ​ធៀប​នឹង​ឆ្នាំមុន​ពោលគឺ​កើន​ដល់ ២,៣ ពាន់​លាន​ដុល្លារ ខណៈដែល​ការ​នាំ​ចេញ​អង្ករ​បាន​កើន​ឡើង​ទ្វេដង​ពោលគឺ​ឡើងដល់ ១២២ លាន​ដុល្លារ​ក្នុង​ឆមាស​ទី១ ឆ្នាំ ២០១៣ ។

សេចក្តីថ្លែងការណ៍​រប​ស់ ADB ឲ្យ​ដឹង​ទៀតថា ការអនុម័ត​គម្រោង​សាងសង់​បាន​កើនឡើង​យ៉ាងគំហុក​រហូតដល់​ជិត ២ពាន់​លាន​ដុល្លារ។ ដោយឡែក ឥណទាន​វិស័យ​សំណង់​បាន​កើនឡើង៤៦ ភាគរយ​នៅក្នុង​ខែមិថុនា។ ចំនួន​អ្នកទេសចរ​ឡើងដល់​ជាង ២លាន​នាក់​ក្នុង​រយៈពេល៦ខែ​ដំបូង​ពោលគឺ​កើនឡើង​ជាង១៩ ភាគរយ​ធៀប​នឹង​ឆ្នាំមុន។ ចំណែកឯ​វិស័យ​សេវាកម្ម​វិញ ត្រូវបាន​គេ​ព្យាករណ៍​ថា​នឹង​កើនឡើង៧ភាគរយ និង​វិស័យ​កសិកម្ម​កើន ៤ ភាគរយ។

ធនាគារ​អភិវឌ្ឍន៍​អាស៊ី​បន្ត​ឲ្យ​ដឹង​ទៀតថា ឱនភាព​គណនី​ចរន្ត​មាន​កម្រិត​ជាង ១១ ភាគរយ នៃ​ផលិតផល​ក្នុងស្រុក​សរុប (GDP)។ ចំណែកឯ​អតិផរណា​មធ្យម​ប្រចាំឆ្នាំ​ត្រូវបាន​កាត់បន្ថយ​មក​ត្រឹម ២,៥ ភាគរយ​ធៀប​នឹង​ការព្យាករណ៍​កាល​ពី​ខែ​មេសា​ដែលមាន​កម្រិត ៣ភាគរយ៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI