កម្ពុជា

ADB៖ វិស័យ​សេវាកម្ម​បង្កើន​ប្រាក់​ចំណូល​ច្រើន​ដល់​សេដ្ឋកិច្ច​កម្ពុជា​

សន្និសីទ​របស់​ធនាគារ ADB នៅ​ព្រឹក​ថ្ងៃទី១២វិច្ឆិកា ២០១៣
សន្និសីទ​របស់​ធនាគារ ADB នៅ​ព្រឹក​ថ្ងៃទី១២វិច្ឆិកា ២០១៣ RFI/សួង សុខភារី
១៣ នាទី

ធនាគារអភិវឌ្ឍន៏​អាស៊ី ហៅ​កាត់​ថា ADB បានបើក​សម្ពោធ​សៀវភៅ​មួយដែល​និយាយ​ទាក់​ទង​នឹង​ការ​អភិវឌ្ឍវិស័យ​សេវាកម្មឲ្យ​ក្លាយ​ជា​ចលករ​កំណើន​សម្រាប់​អាស៊ីក្នុង​នោះ​ក៏​មាន​រាប់​បញ្ជូល​ទាំង​ប្រទេសកម្ពុជាផង​ដែរ។ កម្ពុជា​ជា​ប្រទេសមួយដែល​គេ​បាន​ស្រាវជ្រាវ​ឃើញ​ថា វិស័យ​សេវាកម្ម​ បាន​ជួយ​បង្កើន​ប្រាក់​ចំនូលប្រមាណជា​៤០ភាគរយ នៃ​ផលិតផល​ក្នុង​ស្រុក​សរុប GDP។

ផ្សាយពាណិជ្ជកម្ម

វិស័យ​សេវាកម្ម ដែល​ទាក់​ទង​ច្រើន​ទៅ​នឹង​វិស័យ​ទេសចរណ៏ ជា​កត្តាលិករ​មួយ​ ដែល​ជម្រុញ​កម្ពុជា មាន​លំហូរ​សេដ្ឋកិច្ច​បាន​ប្រមាណ​ជា ៤០​ភាគរយ នៃ​ផលិតផល​ក្នុង​ស្រុក​សរុប GDP។ នេះ​បើ​តាម​ធនាគារ​អភិវឌ្ឍន៏​អាស៊ី ADB​ដែល​បាន​បង្ហាញ​នៅ​ក្នុង​សន្នីសីទ​កាសែត​មួយ នៅ​ព្រឹក​ថ្ងៃ​អង្គារ​ទី ១២​វិច្ឆិកា​នេះ។

 
របាយ​ការណ៏​របស់ ADB បាន​រក​ឃើញ​ថា វិស័យ​សេវាកម្ម​ កំពុង​តែ​មាន​សន្ទុះ​កំណើន​ទៅ​មុខ ប៉ុន្តែ​ក៏​ត្រូវ​ចាំ​បាច់​ដោះស្រាយ​ឧបសគ្គ​ជា​ច្រើន​ផ្សេង​ទៀត ដើម្បី​ឲ្យ​កម្ពុជា​កាន់​តែ​មាន​សក្តានុពល​ក្នុង​ការ​ច្បាម​យក​ប្រយោជន៏​ពី​វិស័យ​នេះ​ផង​ដែរ។

លោក Peter Brimble តំណាង​ធនាគារ ADB ប្រចាំ​នៅ​ប្រទេសកម្ពុជា បាន​ឲ្យ​ដឹង​ថា គិត​ចាំពី​ឆ្នាំ ២០០៩ រហូត​ដល់​ឆ្នាំ ២០១១២ វិស័យ​សេវាកម្ម​តែងតែមាន​ការ​កើន​ឡើងជានិច្ច។ លោក​ Peter បន្ត​ថា អនុវិស័យ​នៃ​វិស័យ​សេវាកម្ម ​វិស័យ​ទេសចរណ៏ ដែល​រួម​មាន​ដូចជាសេវាកម្ម​សណ្ឋាគារ ភោជនីយដ្ឋាន សេវាកម្ម​ដឹក​ជញ្ជូន ជាដើម ដែលសុទ្ធ​តែផ្តល់​ប្រាក់​ចំនូល​ដោយផ្ទាល់​ចូល​ក្នុង​កញ្ចប់​ថវិកាជាតិ។

តំណាង​ធនាគារ ADB រូបនេះ បានឲ្យ​ដឹង​ទៀតថា គ្រាន់តែ​សេវា​ដឹក​ជញ្ជូន និង​ទេសចរណ៏ បាន​បង្កើត​ការងារដល់​ប្រជាជន​ជាង ១លាន​៨សែន​នាក់ ក្នុង​ឆ្នាំ ២០១២ ឬស្មើ​នឹង​ជាង ២២ភាគរយ នៃ​ចំនួន​និយោជិត​ទាំងអស់​ក្នុង​ប្រទេស។ ក្នុង​ឆ្នាំ ២០១៣ ចំនួន​អ្នក​ធ្វើ​ការ​ក្នុង​វិស័យ​សេវាកម្មបាន​កើន​រហូត​ដល់ ១លាន​៩សែន​នាក់។ គេ​ក៏រំពឹង​ថា នៅ​ឆ្នាំ ២០២៣ និយោជិត​ដែល​បម្រើ​ការ​ងារ​សេវាកម្ម នឹង​មាន​ចំនូន​ ២លាន​៦​សែន​នាក់។

ជាមួយ​គ្នា​នោះ ធនាគារអភិវឌ្ឍអាស៊ី បាន​បញ្ជាក់ថា ដើម្បី​ឲ្យ​សមាហរណកម្ម​អាស៊ាន ក្នុង​ឆ្នាំ ២០១៥​ដំណើរ​ការ​ទៅរលូន​ ដោយ​គ្មាន​ឧបសគ្គ វិនិយោគិន​នៅ​ក្នុង​ប្រទេសកម្ពុជា គួរ​តែភ្ជាប់​ការ​ធ្វើ​វិនិយោទុន​ជាមួយ​បណ្តា​ប្រទេសក្នុង​តំបន់​អាស៊ាន​ ឲ្យ​កាន់តែខ្លាំងក្លាថែម​ទៀត ហើយ​ត្រូវ​ពង្រឹង​​សមត្ថភាព​ផលិតកម្ម ឲ្យ​កាន់​តែ​ប្រសើរជាងមុន។ សូម​បញ្ជាក់​ថា កាល​ពី​ពេល​កន្លង​ទៅ ធនាគារ​អភិវឌ្ឍន៏​អាស៊ី ក៏​បាន​ព្យាករដែរ​ថា សេដ្ឋកិច្ច​ប្រទេស​កម្ពុជា មាន​កំណើន ៧ភាគរយ​ ក្នុង​ឆ្នាំ ២០១៣៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI