កម្ពុជា

អាមេរិក​ស្វែង​យល់​ពី​ការសុំ​កូន​ចិញ្ចឹម​នៅ​កម្ពុជា

អាមេរិក​គិតគូរ​រឿង​ស្វែង​រក​កូន​ចិញ្ចឹម​ពី​កម្ពុជា
អាមេរិក​គិតគូរ​រឿង​ស្វែង​រក​កូន​ចិញ្ចឹម​ពី​កម្ពុជា © លី ម៉េងហួរ

ស្ថានទូត​អាមេរិក​ប្រចាំ​កម្ពុជា បាន​ប្រកាស​នៅ​ថ្ងៃ​សុក្រ​ទី ១៨ មីនាថា លោកស្រី​ឯកអគ្គរដ្ឋទូត​អាមេរិក Susan Jacobs ទីប្រឹក្សា​ពិសេស​សម្រាប់​បញ្ហា​កុមារ បាន​ធ្វើ​ទស្សនកិច្ច នៅ​ប្រទេស​កម្ពុជា រយៈពេល​ពីរ​ថ្ងៃ ចាប់ពី​ថ្ងៃ​ទី​១៧​មីនា​ម្សិលមិញ។ ជា​ដំណើរ​ទស្សនកិច្ច ដើម្បី​ចូលរួម​ប្រជុំ​ស្វែងរក​ការពិត ស្តីពី ការសុំ​កូនចិញ្ចឹម​ទៅ​បរទេស។ សេចក្តីប្រកាស​បញ្ជាក់ថា សហរដ្ឋអាមេរិក មិន​ទាន់​កំណត់​ថ្ងៃ​ខែ សម្រាប់​ការបន្ត​ឡើងវិញ នូវ​ការសុំ​កូនចិញ្ចឹម​បរទេស ពី​ប្រទេស​កម្ពុជា​នៅឡើយ​ទេ។

ផ្សាយពាណិជ្ជកម្ម

សេចក្តី​រាយការណ៍​របស់​លី ម៉េងហួរ​ពី​ទីក្រុង​ភ្នំពេញ

សេចក្តីប្រកាស​របស់​ស្ថានទូត​អាមេរិក បាន​លើកឡើង​ថា ក្នុង​ដំណើរ​ទស្សនកិច្ច​នៅ​កម្ពុជា​រយៈពេល​ពីរ​ថ្ងៃ លោកស្រី​ឯកអគ្គរដ្ឋទូត Susan Jacobs បាន​ជួប​ជាមួយ​មន្ត្រី​រដ្ឋាភិបាល​កម្ពុជា និង​តំណាង​មក​ពី​ស្ថានទូត​ដទៃទៀត ដើម្បី​ពិភាក្សា​ពី​ស្ថានភាព​នៃ​ការអនុវត្ត​ប្រកាស និង​កំរិត​នៃ​ការគោរព​តាម​អនុសញ្ញា​ក្រុងឡាអេ ស្តីពី ការសុំ​កូនចិញ្ចឹម។

សេចក្តីប្រកាស​ដដែល បាន​កត់សម្គាល់​ថា សហរដ្ឋអាមេរិក​សង្ឃឹម​ថា នឹង​បាន​ធ្វើការ​ជាមួយ​រដ្ឋាភិបាល​ប្រទេស​កម្ពុជា ក្នុងពេល​ដែល​រដ្ឋាភិបាល​កម្ពុជា បង្កើត​ប្រព័ន្ធ​សុខមាលភាព​កុមារ និង​ធ្វើ​ការ​ពិនិត្យ​យ៉ាង​ហ្មត់ចត់​លើ​បទ​បញ្ញតិ សម្រាប់​អនុវត្ត​ទាក់ទង​នឹង​ច្បាប់​ថ្មី​ស្តីពី ការសុំ​កូនចិញ្ចឹម​ទៅ​បរទេស។

ជាមួយគ្នា​នោះ សហរដ្ឋអាមេរិក ក៏​បាន​សម្តែង​ការកោតសរសើរ​រាជរដ្ឋាភិបាល​កម្ពុជា ចំពោះ​ជោគជ័យ​សំរេច​បាន​កន្លងមក ក្នុង​ការបង្កើន​ការការពារ​ដល់​កុមារ​ងាយ​រងគ្រោះ។ ក៏ប៉ុន្តែ​អាមេរិក មិន​ទាន់​កំណត់​ថ្ងៃ​ខែ សម្រាប់​ការបន្ត​ឡើងវិញ នូវ​ការសុំ​កូនចិញ្ចឹម​បរទេស​ពី​ប្រទេស​កម្ពុជា​នៅឡើយ​ទេ។

លោកស្រី Susan Jacobs ក៏​នឹង​ត្រូវ​ធ្វើដំណើរ​ទៅកាន់​ប្រទេស​វៀតណាម រហូត​ដល់​ថ្ងៃ​ទី​២៣​មីនា ដើម្បី​ពិភាក្សា​ឡើងវិញ​ពី​កិច្ចការ​ទទួល​យក​កូន​ចិញ្ចឹម។ ​សហរដ្ឋអាមេរិក បាន​ផ្អាក​សុំ​កូនចិញ្ចឹម​ពី​ប្រទេស​កម្ពុជា កាលពី​ឆ្នាំ​២០០១។

លោកស្រី Susan Jacobs បាន​ជួបពិភាក្សា​ការងារ​ជាមួយ លោក ឡុង វិសាលោ រដ្ឋលេខាធិការ​ក្រសួងការបរទេស និង​ជួប​ជាមួយ​មន្ត្រី​ក្រសួង​សង្គមកិច្ច លើ​បញ្ហា​សុំ​កូនចិញ្ចឹម។

អ្នកនាំពាក្យ​ក្រសួងការបរទេស លោក កុយ គួង លើកឡើងថា នីតិវិធី​នៅក្នុង​ច្បាប់ ស្តីពី ការសុំ​កូនចិញ្ចឹម​អន្តរប្ររទេស របស់​ប្រទេស​កម្ពុជា នឹងត្រូវ​​ចាប់ផ្តើម​អនុវត្ត ចាប់ពី​ថ្ងៃ​ទី​១ ខែ​មេសា ឆ្នាំ​២០១១។

លោកស្រី​ឯកអគ្គរដ្ឋទូត Susan Jacobs ទីប្រឹក្សា​ពិសេស​សម្រាប់​បញ្ហា​កុមារ របស់​សហរដ្ឋអាមេរិក អះអាងថា អាមេរិក​នឹង​រង់ចាំ​មើល​ការអនុវត្ត​ច្បាប់​នេះ មុននឹង​សម្រេច​លើ​ការសុំ​កុមារ​កម្ពុជា ទៅ​ចិញ្ចឹម​ឡើងវិញ។

ច្បាប់​ស្មុំ​កូន​អន្តរប្រទេស មាន ១០ ជំពូក និង ៥៨ មាត្រា ត្រូវបាន​រដ្ឋសភា​អនុម័ត កាលពី​ចុងឆ្នាំ​២០០៩ ដើម្បី​ទប់ស្កាត់​ការជួញដូរ​មនុស្ស និង​ការរត់ពន្ធ​កុមារ​កម្ពុជា។ ច្បាប់​នេះ ក៏​មាន​បំណង​ធ្វើ​យ៉ាងណា​ឱ្យ​កុមារ​កម្ពុជា ដែល​មានអាយុក្រោម ៨ ឆ្នាំ និង​ករណី​ពិសេស​អាច​មាន​អាយុ​ក្រោម ១៨ ឆ្នាំ ទៅ​រស់នៅ​ជាមួយ​ម្តាយ​ឪពុក​ចិញ្ចឹម​នៅ​បរទេស មាន​ជីវភាព​រស់នៅ​សមរម្យ និង​ពិតជា​បានរស់នៅ ក្នុង​លក្ខណ្ឌ​ថ្លៃថ្នូរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI