អាហ្វហ្គានីស្ថាន

អាហ្វហ្គានីស្ថាន៖ ផ្ទុះគ្រាប់បែកអត្តឃាត ស្លាប់មនុស្សជាង៤០នាក់

ភេរវកម្ម​អត្តឃាត នៅ​ក្រុង​កាប៊ូល ថ្ងៃទី២៨ ធ្នូ ២០១៧
ភេរវកម្ម​អត្តឃាត នៅ​ក្រុង​កាប៊ូល ថ្ងៃទី២៨ ធ្នូ ២០១៧ REUTERS/Mohammad Ismail
ដោយ៖ ហេង ឧត្តម
១១ នាទី

នៅ​អាហ្វហ្គានីស្ថាន យ៉ាងហោចណាស់ ស្លាប់​មនុស្ស​៤០នាក់ និង​របួស​​ច្រើន​នាក់​ទៀត ដោយ​សារ​ការ​បំ​ផ្ទុះ​គ្រាប់​បែក​អត្តឃាតមួយ​ ​នៅថ្ងៃព្រហស្បតិ៍​ ទី​២៨ធ្នូនេះ​។ ជន​រងគ្រោះស្លាប់​និង​របួស​ភាគ​ច្រើន​គឺយុវជននិង​និស្សិត។ ហេតុការណ៍សោកនាដកម្ម​នេះ បាន​កើត​​ឡើង​នៅ​បរិវេណមជ្ឈ​មណ្ឌល​វប្បធម៌និង​សាសនាអ៊ីស្លាម​និកាយ​ឈីអ៊ីត នៅ​ប៉ែក​​ខាង​លិច​ទីក្រុង កាប៊ូល។

ផ្សាយពាណិជ្ជកម្ម

ភ្លាមៗក្រោយ​កើត​ហេតុ ពួក​អង្គការ​រដ្ឋ​អ៊ីស្លាម​ជីហាត បាន​ចេញ​មុខប្រកាសទទួល​ស្គាល់​ថា​ជា​ទង្វើ​របស់ពួក​គេ។ ពួកគេ​​និយាយថា​បក្សពួក​ខ្លួន​បាន​​បំផ្ទុះ​គ្រាប់បែក៣គ្រាប់ ដោយ​២គ្រាប់គឺ​ផ្ទុះ​បន្ថែមពីក្រោយ​ឲ្យ​ផ្ទុះ​ជាប់ៗគ្នា បន្ទាប់​ពី​ការ​វាយ​ប្រហារបំផ្ទុះ​​គ្រាប់បែក​អត្តឃាត​។

គ្រាប់​បែកទាំងនោះ​គឺ​បាន​ផ្ទុះ​ឡើង​​នៅក្នុង​ពេល​ដែល​មាន​ការ​ជួប​ជជែក​ពិភាក្សា​តុ​មូល​មួយ​ ដែល​សម្បូរ​ដោយ​ក្រុម​និស្សិត​ចូលរួម។ ជំនួប​​នេះគឺធ្វើឡើង​ក្នុង​​​ឱកាស​រម្លឹក​​ខួបលើកទី​៣៨ឆ្នាំ​នៃ​ការឈ្លានពាន​របស់​រុស្ស៊ី ទៅ​លើអាហ្វ​ហ្គានីស្ថាន។

បើ​តាម​អាជ្ញា​ធរ​មូលដ្ឋាន ឧប្បតិហេតុ​បំផ្ទុះ​គ្រាប់​​នេះ គឺ​មាន​គោល​ដៅ​ប្រឆាំង​នឹង​ទីភ្នាក់​ងារ​ព័ត៌មានមួយ​ ឈ្មោះថា សំឡេង​ពលរដ្ឋ​អាហ្វហ្គានីស្ថាន។ ទីភ្នាក់​ងារ​ព័ត៌មាននេះ មាន​ទំនោរផ្សព្វ​ផ្សាយឲ្យ​សាសនា​អ៊ីស្លាម​ឈីអ៊ីត ដែល​ជាក្រុម​ភាគតិច​នៅ​​អាហ្វហ្គានីស្ថាន។​ ក្នុង​ចំណោម​អ្នក​ស្លាប់​និង​របួស​ជាច្រើន​នោះ ក៏​មាន​ស្លាប់​​អ្នក​រាយការណ៍ព័ត៌មាន​ម្នាក់​ ហើយ​អ្នក​កាសែត​មួយ​រូប​ទៀត រងរបួស​ធ្ងន់។

អ្នក​នាំពាក្យ​ប្រធានាធិបតីអាហ្វហ្គានីស្ថាន បាន​ចេញ​សេចក្តីថ្លែងការណ៍​ថ្កោល​ទោស​អំពើភេរវកម្ម​បំផ្ទុះ​គ្រាប់​បែក​​អត្តឃាត​នេះ ដោយចាត់ទុកថា ជា​អំពើ​ដែល​ពុំ​អាច​អត់ឱន​ឲ្យ​បានឡើយ ហើយ​និងថា អាហ្វហ្គានីស្ថានសន្យាប្តេជ្ញា​កម្ទេច​ក្រុម​​ភេរវជន។

សូម​រម្លឹកជូន​​ថា ប៉ុន្មាន​ខែថ្មីៗនេះ ទីក្រុង​កាប៊ូល គឺ​ជាគោល​ដៅ​នៃ​ការ​បំផ្ទុះ​ភេរវកម្ម​របស់​ពួក​ជីហាត​។ កាលពីខែ​តុលា​​កន្លងទៅ ក៏​មាន​ការ​បំផ្ទុះ​គ្រាប់​បែក​សម្លាប់​មនុស្ស​អស់​ជិត​៤០នាក់ដែរ​ នៅ​វិហារ​សាសនារបស់​ក្រុម​និកាយ​ឈីអ៊ីត។​ ​កាលពី​ខែ​ឧសភា គឺការ​បំផ្ទុះឡាន​កាំមីញ៉ុងមួយ​បណ្តាល​ឲ្យ​ស្លាប់​មនុស្ស​ជាង​១៥០នាក់ និង​របួស​ជាង​៤០០នាក់​។ ចំណែក​ប្រព័ន្ធផ្សព្វ​​ផ្សាយណា​ដែល​ស្និត​នឹង​ក្រុមអ៊ីស្លាម​ឈីអ៊ីត​ គឺក៏​​ជា​ផ្ទាំង​ស៊ីប​មួយ​​ដែរ។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI