លីប៊ី

ក្រុម​អ្នកប្រឆាំង​លីប៊ី​កេណ្ឌគ្នា​រៀបចំខ្លួន​ កាដាហ្វី​តាំងខ្លួនជា​អ្នកតទល់​នឹងពួក​អាល់កៃដា​

មេដឹកនាំ​​របប​ផ្តាច់ការ​​លីប៊ី​ Mouammar​ Kadhafi​
មេដឹកនាំ​​របប​ផ្តាច់ការ​​លីប៊ី​ Mouammar​ Kadhafi​ © AFP/ Mahmid Turkia

នៅ​ប្រទេស​លីប៊ី​ ​ នៅ​ថ្ងៃទី១៩​នៃ​ការបះបោរ​ប្រឆាំង​នឹង​មូអាម៉ារ​កាដាហ្វី​ ​ ក្រុម​អ្នក​ប្រឆាំង​លីប៊ី​បាន​ក្តោប​ក្តាប់​កាន់កាប់​ប៉ែកខាង​កើត​នៃ​ប្រទេស​ ហើយ​នៅ​ថ្ងៃសៅរ៍​ម្សិលមិញ​ក្រុម​អ្នក​ប្រឆាំង​លីប៊ី​បាន​ធ្វើ​សង្គ្រាម​នៅ​លើ​សមរភូមិ​ពីរ៖​ ទី១-​ប្រយុទ្ធ​តទល់នឹង​កងកម្លាំង​ស្មោះស្ម័គ្រ​នឹង​កាដាហ្វី​ ​ ជាពិសេស​នៅ​ប៉ែក​ខាងកើត​នៃ​ទីក្រុង​ទ្រីប៉ូលី​ដែល​រថក្រោះ​ចាប់មាន​សកម្មភាព​នៅ​ទីក្រុង​Zaouïa និងបាន​បាញ់​ទៅលើ​ប្រជា​ពល​រដ្ឋ។​​ ទី២-​សមរភូមិ​ឃោសនា​ផ្តល់​ពត៌មាន​ដែល​កាដាហ្វី​បាន​ចាប់​ធ្វើការ​វាយលុក​ ដោយបាន​ធ្វើ​កិច្ច​សម្ភាសន៍​ជាមួយ​សារពត៌មាន​បារាំង​ឈ្មោះ​Journal du dimanche។

ផ្សាយពាណិជ្ជកម្ម

សេចក្តីរាយការណ៍របស់​ សៀក សារិន

នៅក្នុង​បទ​សម្ភាសន៍​ជាមួយ​សារពត៌មាន​បារាំង​ឈ្មោះ​Journal du dimanche​ ​ កាដាហ្វី​បាន​ប្រកាស​យល់ព្រម​ឲ្យ​មាន​ការ​បញ្ជូន​គណៈកម្មការ​អង្កេត​ “នៃ​អង្គការ​សហប្រជាជាតិ​ឬ​សហភាព​អាហ្វ្រិក”​ ទៅ​កាន់​ប្រទេស​លីប៊ី​ ​ ហើយ​កាដាហ្វី​យល់ព្រម​ឲ្យ​គណៈកម្មការ​អង្កេត​ទាំងនោះ​ទៅ​បំពេញ​កាតព្វកិច្ច​របស់​ខ្លួន​ដល់​ទីកន្លែង។​ មេដឹកនាំ​របប​ផ្តាច់ការ​លីប៊ី​បាន​ថ្លែង​ឲ្យដឹង​ទៀតថា ​ ​ “​ក្រុម​ប្រឹក្សា​សន្តិសុខ​នៃ​អ ស ប ​គ្មាន​អំណាច​អ្វី​នឹង​លូកដៃ​ចូល​បញ្ហា​ផ្ទៃក្នុង​នៃ​ប្រទេស​ណាមួយ​ឡើយ។”​ ដូច្នេះ​សេចក្តី​សម្រេច​ចិត្ត​ថ្កោលទោស​ជាឯកច្ឆ័ន្ទ​ទៅលើ​ការ​វាយ​បង្ក្រាប​ការបះបោរ​នៅ​លីប៊ី​គឺ​ជា​សេចក្តី​សម្រេច​ចិត្ត​ឥត​ផល​ប្រយោជន៍។

 
ពាក់ព័ន្ធ​នឹង​ការបះបោរ​នៅ​ប្រទេស​លីប៊ី​វិញ​ ​ មូអាម៉ារ​កាដាហ្វី​បាន​ព្រមាន​ថា​ “​បើ​ប្រសិន​ជា​គេ​គំរាម​ប្រទេស​លីប៊ី​ ធ្វើឲ្យ​បាត់បង់​ស្ថិរភាព​ ​ បង្កើត​ឲ្យ​មាន​ភាពវឹកវរ​ ​ គេ​ច្បាស់ជា​ជួយ​បើកទ្វារ​ចំហ​ឲ្យ​ពួក​អ៊ីស្លាម​ជ្រុល​និយម​ប្រដាប់​អាវុធ​អាល់កៃដា​ជា​ពុំខាន។​ ពួកនេះ​នឹង​បង្កើត​ឲ្យ​មាន​djihad​ឬ​សង្គ្រាម​សាសនា​នៅ​តំបន់​Méditerranée ហើយ​ធ្វើការ​វាយ​ប្រហារ​ទៅលើ​កងកម្លាំង​នាវា​6è flotte របស់​ស រ អា​ ហើយនិង​បង្កើត​ឲ្យ​មាន​សកម្មភាព​ចោរសមុទ្រ​ដែល​ឋិត​នៅតែ​ប្រមាណ​៥០គ,ម,​ប៉ុណ្ណោះ​ពី​ព្រំដែន​នៃ​ប្រទេស​អឺរ៉ុប”​​ មូអាម៉ារ​កាដាហ្វី​បាន​ថ្លែង​បញ្ជាក់​ទៀតថា​ “​ខ្ញុំ​នឹង​ពុំ​បណ្តែត​បណ្តោយ​ឲ្យ​គេ​ធ្វើ​យ៉ាងនេះ​ឡើយ”។

នៅលើ​សមរភូមិ​យោធា
 
បើយោងតាម​ប្រជាពលរដ្ឋ​និង​វេជ្ជបណ្ឌិត​ ​ នៅ​ថ្ងៃសៅរ៍​ម្សិលមិញ​មាន​ការ​សម្លាប់​រង្គាល​និង​វាយ​ប្រហារ​គ្នា​យ៉ាង​សាហាវ​នៅ​ទីក្រុង​Zaouïa​ដែល​ឋិត​នៅ​ក្រោម​ការ​កាន់កាប់​របស់​ក្រុម​អ្នក​បះបោរ​លីប៊ី​ហើយ​ដែល​ឡោម​ព័ទ្ធ​ដោយ​ទាហាន​របស់​កាដាហ្វី។
សូម​បញ្ជាក់ថា​ ​ ទីក្រុង​Zaouïa​នេះ​ជា​ទីក្រុង​ដែល​ឋិត​នៅ​ក្រោម​ការ​កាន់កាប់​របស់​ក្រុម​អ្នក​បះបោរ​លីប៊ី ​ហើយ​ឋិត​នៅ​ជិត​រដ្ឋធានី​​ទ្រីប៉ូលី​ជាងគេ​ដែល​មាន​ចម្ងាយ​តែ​៦០​ប្លាយ​គ,ម,​ប៉ុណ្ណោះ។

នៅ​សមរភូមិ​ប៉ែកខាងកើត​ ​ ក្រុម​អ្នក​បះបោរ​លីប៊ី​បាន​បន្ត​ការរុល​ទៅមុខ​របស់​ខ្លួន​ ​ ដោយបាន​ឈាន​ដល់​ទីក្រុង​Ben Jawad ដែល​ឋិតនៅ​ចម្ងាយ​ប្រមាណ​១០០ប្លាយ​គ,ម,​ពី​ទីក្រុង​Syrte​ដែល​ជា​ទីក្រុង​កំណើត​របស់​មូអាម៉ារ​កាដាហ្វី។​ ក៏​ប៉ុន្តែ​នៅ​ពេញ​មួយ​ថ្ងៃ​សៅរ៍​ គេកត់​សម្គាល់​ឃើញ​មាន​យន្តហោះ​របស់​កាដាហ្វី​បាន​ហោះហើរ​ពីលើ​ទីក្រុង​Ben Jawad និង​ទីក្រុង​Ras Lanouf។

បក្ស​ប្រឆាំង​រៀបចំ​ខ្លួន​ផ្នែក​នយោបាយ
 
នៅ​លើ​វិស័យ​នយោបាយ​ បក្ស​ប្រឆាំង​លីប៊ី​បាន​ខិតខំ​កេណ្ឌ​គ្នា​រៀបចំ​ខ្លួន។​ “ក្រុមប្រឹក្សា​ជាតិ​”​មួយ​បាន​ត្រូវ​រៀបចំ​ប្រជុំ​ជាលើក​ទីមួយ​នៅ​ទីក្រុង​បេនហ្កាហ្ស៊ី​ ហើយ​បាន​ធ្វើការ​ប្រកាស​ថា​ ជា​ “អ្នក​តំណាង​តែ មួយ​គត់​របស់​ប្រទេស​លីប៊ី”​។

“ក្រុមប្រឹក្សា​ជាតិ​”​នេះ​ឋិត​នៅ​ក្រោម​ការ​ដឹកនាំ​របស់​អតីត​រដ្ឋមន្ត្រី​ក្រសួង​យុត្តិធម៌​លោក​Moustapha Abdeljalil ​ហើយ​មាន​លោក​Omar al-Hariri ជា​អ្នក​ទទួល​ខុសត្រូវ​ផ្នែកយោធា​ ​ និងលោក​Ali Abdelaziz al-Issaoui អតីត​ឯកអគ្គរដ្ឋទូត​ប្រចាំប្រទេស​ឥណ្ឌា​ជាអ្នក​ទទួល​បន្ទុក​ខាង​កិច្ចការ​បរទេស៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI