ម៉ាលី

ស្លាប់​៥​នាក់​ក្នុង​ភេរវកម្ម​កុំម្មង់ដូ​​កណ្តាល​ក្រុង​បាម៉ាកូ​ប្រទេស​ម៉ាលី

ផ្លូវ​ «Princesse»  នៅ​ក្រុង​បាម៉ាកូ ប្រទេស​ម៉ាលី ដែល​រង​ភេរវកម្ម​យប់​ថ្ងៃ​សុក្រ​ទី ៦ មីនា ២០១៥
ផ្លូវ​ «Princesse» នៅ​ក្រុង​បាម៉ាកូ ប្រទេស​ម៉ាលី ដែល​រង​ភេរវកម្ម​យប់​ថ្ងៃ​សុក្រ​ទី ៦ មីនា ២០១៥ RFI / David Baché

មាន​ស្លាប់​យ៉ាង​ហោច​ណាស់​៥​នាក់ បី​នាក់​ជា​អឺរ៉ុប និង​ពីរ​​នាក់​ជា​ជនជាតិ​ម៉ាលី ព្រមទាំង​​របួស​ជា​នាក់ នៅ​ក្នុង​ភេរវកម្ម​បាញ់​ប្រហារ​ក្នុង​ភោជ្ជនីដ្ឋាន​មួយ កណ្តាល​ក្រុង​បាម៉ាកូ។ នៅ​វេលា​ម៉ោង​រំលង​អាធ្រាត្រ​ទៅ​ហើយ ជនប្រដាប់​អាវុធ​កុំម្មង់ដូ​​ម្នាក់​ បាន​លេញ​មុខ​​មក​បាញ់​រះ​ លើ​ហ្វូង​មនុស្ស។ ជន​សង្ស័យ​ពីរ​នាក់​ត្រូវ​ចាប់​ខ្លួន​បាន​ និង​កំពុង​សាក​សួរ​ចម្លើយ។ប្រធានាធិបតី​បារាំង បាន​ថ្កោល​ទោស​ភេរវកម្មនេះ និង​ស្នើ​ចូល​ជួយ​ដល់​រដ្ឋាភិបាល​ម៉ាលី។

ផ្សាយពាណិជ្ជកម្ម

ការ​វាយប្រហារ​ភេរវកម្ម មាន​ច្រើន​ដំណាក់។ បន្ទាប់​ពី​បាន​គប់​គ្រាប់​បែក​ តាម​ផ្លូវ​កណ្តាល​ក្រុង​បាម៉ាកូ ខ្លះ​មិន​បាន​ផ្ទុះ​ទេ ជន​ប្រដាប់​អាវុធ​​ម្នាក់​ក៏​បាន​ស្ទុះ​ចូល​ទៅ​ក្នុង​ភោជ្ជនីដ្ឋាន La Terrasse រួច​ឡើង​ទៅ​ជាន់​ទី​មួយ លើក​កាំភ្លើង​ស្វ័យប្រវត្តិ​​​បាញ់​រះ​ លើហ្វូង​មហាជន​កំពុង​ទទួល​ទាន ហើយ​ក៏​រត់​គេច​ខ្លួន​ ដោយ​ជិះ​រថយន្ត​​មួយ​គ្រឿង​មាន​អ្នក​បើក​រង់​ចាំ​ជា​ស្រេច។ ជន​ទាំង​ពីរ​សុទ្ធ​តែ​ពាក់​មុខ​ ដើម្បី​បិទ​បាំង​អត្តសញ្ញាណ​របស់​ខ្លួន​។ ប៉ុន្តែ​ពេល​បើក​រត់​គេច​​ផុត​កន្លែង​កើត​ហេតុ​បន្តិច រថយន្ត​ប៉ូលិស​ក៏​មក​ដល់ ទើប​មាន​ការ​បាញ់​ត​ទៅ​វិញ​ទៅ​មក​មួយ​ប្រាវ​ទៀត។

 
សាក្សី​ជា​អ្នក​រស់​នៅ​ក្បែរ​នោះ បាន​អះអាង​ការ​បាញ់​តប​ត​គ្នា​មាន​រយៈ​ពេល​ប្រមាណ​ជា​១០​នាទី។ មនុស្ស​នាំ​គ្នា​ផ្អើល​ស្លន់​ស្លោ​ រត់​គេច​ចេញ​ពី​កន្លែង​កើត​ហេតុ​ទាំង​ព្រលឹង​ចុង​សក់។ ជា​សរុប បើ​តាម​តុល្យការ​បណ្តោះ​អាសន្ន ជនជាតិ​ស្បែក​ស​​អឺរ៉ុបបី​នាក់ ៖​ ​បារាំងម្នាក់​ ប៊ែលហ្សិក​ម្នាក់ និង​ម្នាក់​ទៀត​មិន​ទាន់​ស្គាល់​សញ្ជាតិ ព្រមទាំង​ជនជាតិ​ម៉ាលី​ពីរ​នាក់​ផ្សេង​ទៀត​បាន​ស្លាប់​។ អ្នក​របួស​​មាន​ជាង​១០​នាក់​ ភាគ​ច្រើន​ជា​របួស​ធ្ងន់។

ជន​សង្ស័យ​ពីរ​នាក់​ ត្រូវ​បាន​ចាប់​ខ្លួន​។ សង្កាត់កណ្តាល​ក្រុង​បាម៉ាកូ​​ដែល​មាន​សកម្មភាព​រស់​រវើក​ខ្លាំង​​ មាន​ទេសចរ​បរទេស​ចូល​ចិត្ត​​ទៅ​ជួប​ជុំ​គ្នា​នៅ​ពេល​រាត្រី ជាពិសេស​រាត្រី​ថ្ងៃ​សុក្រ ត្រូវ​បាន​ការពារ​ដោយ​វិធានាការ​សន្តិសុខ​ពិសេស​។ ប៉ូលិស​ម៉ាលី កំពុង​ប្រញឹក​ខ្លាំង ព្រោះ​មិនដឹង​​ថា​មាន​គ្រាប់​បែក​ប៉ុន្មាន​គ្រាប់​មិន​ទាន់​ផ្ទុះ និង​មិន​ទាន់​រក​ឃើញ។ ភ្នាក់ងារ​ស៊ើប​ការណ៍​ក៏​បាន​មក​ដល់​កន្លែង​កើត​ហេតុ។ គេ​មិន​ដឹង​ថា​តើ​នរណា​ជា​ឃាតករ ជា​សកម្មភាព​ភេរវកម្ម​ឬ​យ៉ាងណា។

លោកប្រធានាធិបតី​បារាំង​ ហ្វ្រង់ស័រ​ហូឡង់  បាន​​ថ្កោល​ទោស​យ៉ាង​ដាច់​អហង្ការ​អំពើ​ភេរវកម្ម​ដ៏​កំសាក​ស្មោកគ្រោក និង​បាន​ប្រកាស​ផ្តល់​ជំនួយ​​បារាំង​ដល់​ប្រធានាធិបតី​ម៉ាលី។ ស្ថានទូត​បារាំង​ប្រចាំ​បាម៉ាកូ បាន​ចេញ​អនុសាសន៍​​ណែនាំ​ពលរដ្ឋ​បារាំង​ឱ្យ​មាន​ស្មារតី​ប្រុង​ប្រយ័ត្ន។
 

ប៊ែលហ្សិក តាម​រយៈ​រដ្ឋមន្ត្រី​បរទេស​ក៏​បាន​ចេញ​សារ​ថ្កោល​ទោស​អំពើ​ភេរវកម្ម​​នៅ​បាម៉ាកូ​នេះ ថា​កំសាក ងងឹត​ងងុល និង​បាន​សម្តែង​ការ​សោក​ស្តាយ​ចំពោះ​ការ​បាត់​បង់​ជីវិត​ជនជាតិ​ប៊ែលហ្សិក​ម្នាក់។​ ជន​រង​គ្រោះ​ប៊ែលហ្សិក​ជា​បុគ្គលិក​ ​សហភាព​អឺរ៉ុប បំរើការ​នៅ​ប្រទេស​ម៉ាលី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI