ម៉ាលី

មួក​ខៀវ​អង្គការ​សហប្រជាជាតិ​​រងការ​វាយប្រហារ​នៅ​ភាគ​ខាងជើង​ម៉ាលី

ទាហាន​មួក​ខៀវ​អង្គការ​សហប្រជាជាតិរង​ការ​វាយប្រហារ​នៅ​ភាគ​ខាង​ជើងម៉ាលី។ ថ្ងៃទី ៨ មីនា ២០១៥
ទាហាន​មួក​ខៀវ​អង្គការ​សហប្រជាជាតិរង​ការ​វាយប្រហារ​នៅ​ភាគ​ខាង​ជើងម៉ាលី។ ថ្ងៃទី ៨ មីនា ២០១៥ AFP PHOTO / KENZO TRIBOUILLARD

មាន​ស្លាប់​ស៊ីវិល​ពីរ​នាក់ និង​ទាហាន​មួក​ខៀវ​​របស់​អង្គការ​សហប្រជាជាតិ​ម្នាក់ នៅ​ថ្ងៃ​អាទិត្យ​ទី ៨ មីនា នេះ ​ក្នុង​ការ​វាយប្រហារ​ដោយ​រ៉ុកកែត​ និង​គ្រាប់​ផ្លោង នៅ​ក្រុង​គីដាល់ ភាគ​ខាង​ជើង​ប្រទេស​ម៉ាលី។ ការ​វាយប្រហារ​នេះ​បាន​កើត​ឡើង​មួយ​ថ្ងៃ​ក្រោយ​ភេរវកម្ម​មរណៈ​ប្រឆាំង​បស្ចឹម​ប្រទេស នៅ​ទីក្រុង​បាម៉ាកូ ដែល​ជា​ស្នាដៃ​របស់​ពួក​អ៊ីស្លាម​ជ្រុល​និយម​អាហ្វ្រិក។

ផ្សាយពាណិជ្ជកម្ម

ថ្ងៃ​រះ​មិន​ទាន់​ស្រួល​បួល​ផង គ្រាប់​ផ្លោង​ គ្រាប់​កាំ​ភ្លើង​ត្បាល់​ និង​គ្រាប់​រ៉ុកកែត​ជាង​៣០​គ្រាប់ បាន​បាញ់​រះ​ធ្លាក់​ប្រសាច​លើ​មូលដា្ឋន​ឈរ​ជើង​របស់​កង​កម្លាំងរក្សា​សន្តិសុខ​​មួក​ខៀវ​របស់​អង្គការសហប្រជាជាតិ​​នៅ​ម៉ាលី​ ដែល​ទីតាំង​ក្នុង​ក្រុង​គីដាល់។ ស្ងប់​បាន​បន្តិច​ ការ​វាយ​ប្រហារ​បែប​នេះ​បាន​ផ្ទុះ​ឡើង​មួយ​សា​ទៀត។

 
នៅ​ពេលរក​ឃើញ​ទីតាំងរបស់​ក្រុម​វាយប្រហារ​ហើយ ​កង​ទ័ព​មួយ​ខៀវ ដែល​ជា​សម្ព័ន្ធ​មិត្ត​របស់​ទាហាន​បារាំង​ ក្នុង​ប្រតិបត្តិការ​ជួយ​ម៉ាលី​លើ​សមរភូមិ បាន​បាញ់​តប​ត​វិញ។ ការ​ប្រយុទ្ធ​គ្នា​ ត​ទល់​ដោយ​គ្រាប់​កាំភ្លើង​បាន​ធ្លាក់​ដល់​តំបន់​រស់​នៅ​របស់​ជន​ស៊ីវិល ដែល​ស្ថិត​នៅ​ចម្ងាយ​ប្រមាណ​បី​គីឡូម៉ែត្រ​ពី​មូលដ្ឋាន​ទ័ព​អង្គការ​សហប្រជាជាតិ។ ជា​តុល្យការ មាន​ស្លាប់​ជន​ស៊ិវិល​ពីរ​នាក់ និង​របួស​បួន​នាក់។ ខាង​អ.ស.ប.វិញ មាន​ស្លាប់​ទាហាន​មួក​ខៀវ​ម្នាក់ និង​របួស​៨​នាក់។
តើ​ជន​ស៊ីវិល​ស្លាប់​ព្រោះ​គ្រាប់​កាំភ្លើង​ទាហាន​មួក​ខៀវ ឬ​ព្រោះ​គ្រាប់​កាំភ្លើង​ពួក​អ៊ីស្លាម​ជ្រុល​និយម​ ? ជា​សំណួរ​ដែល​ពុំ​ទាន់​មាន​ចម្លើយ​ច្បាស់​លាស់​នៅ​ឡើយ។ តាម​ប្រភពព័ត៌មាន​ទាហាន​អង្គការ​សហប្រជាជាតិ​​ គ្រាប់​រ៉ុកកែត​ខ្លាំង​ធ្លាក់​នៅ​ជំរំ​ប្រជាជន​តែ​ម្តង ទើប​មាន​ជន​ស៊ីវិល​ស្លាប់​ដូច្នេះ។

​មិន​ឃើញទាន់​​មាន​​ក្រុម​ណា​ចេញ​មុខទេ ! ខុស​ពី​ភេរវកម្ម​នៅ​ក្រុង​បាម៉ាកូ​ម្សិលមិញ ដែល​​ពួក​​អ៊ីស្លាម​ជ្រុល​និយម Al-Mourabitoune បាន​ប្រកាស​ទទួល​ស្គាល់​ស្នាដៃ​របស់ខ្លួនភ្លាម​។ ប្រឈម​មុខ​នឹង​ភេរវកម្ម​មរណៈ​មិន​ធ្លាប់​មាន​ប្រឆាំង​នឹង​លោក​ខាង​លិច​នៅក្រុង​បាម៉ាកូ​នេះ កងកម្លាំង​អង្គការ​សហប្រជាជាតិ​ដែល​មាន​ទាហាន​និង​ប៉ូលិសប្រមាណ​១ម៉ឺន​នាក់ នៅពេញ​ផ្ទៃ​ប្រទេស​ម៉ាលី បាន​ប្រកាស​ផ្តល់​កម្លាំង​តាម​តម្រូវការ​អាជ្ញាធរ​ម៉ាលី ក្នុង​ការ​ស្រាវជ្រាវ​ស្វែងរកភេរជន​បាញ់​ប្រហារ​​ក្នុង​ភោជ្ជនីដ្ឋាន​កាលពី​យប់​ថ្ងៃ​សុក្រ។

ភាគ​ខាង​ជើង​ម៉ាលី បាន​ធ្លាក់​ក្នុង​ដៃ​ពួក​អ៊ីស្លាម​ជ្រុលនិយម​ជីហាត​ស្និទ្ធ​នឹង​អាល់កៃដា នៅ​ឆ្នាំ​២០១២ ដែល​ជំរុញ​ឱ្យ​បារាំង​បើក​ប្រតិបត្តិការ​យោធា​នៅ​ដើម​ឆ្នាំ​២០១៣ រួច​ទម្លាក់​ភារកិច្ច​ទៅ​កង​កម្លាំង​អង្គការ​សហប្រជាជាតិ​ជា​អ្នក​ទទួល​ខុស​ត្រូវ​​បន្ត​នៅ​ខែ​សីហា​២០១៤​។ រដ្ឋាភិបាល​ម៉ាលី គ្រប់​គ្រង​តំបន់​ភាគ​ខាង​ជើង​មិន​ជុំ ពួក​ជីហាត​តែង​បង្ក​អសន្តិសុខ​និង​វាយប្រហារ​លើ​កងទ័ព​មួក​ខៀវ​ជា​ញយៗ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI