អានតួអត្ថបទ
ស.រ.អា.

ការបើក​កកាយ​កម្មវិធី​ស៊ើប​ការណ៍​មហា​សម្ងាត់​របស់​អាមេរិក

Facebook  បាន​បដិសេធ​ ​​ថាមិន​បាន​បើក​ផ្លូវ​ឱ្យ​ក្រុម​ស៊ើបការណ៍​អាមេរិកចូល​ក្នុង​វិបសៃតិ៍​ខ្លួន​​ទេ
Facebook បាន​បដិសេធ​ ​​ថាមិន​បាន​បើក​ផ្លូវ​ឱ្យ​ក្រុម​ស៊ើបការណ៍​អាមេរិកចូល​ក្នុង​វិបសៃតិ៍​ខ្លួន​​ទេ Reuters/路透社
ដោយ៖ អៀង សុខម៉ិញ
១៥ នាទី

រឿង​អាស្រូវ​​ទាក់ទង​នឹង​ការ​ងារ​ស៊ើប​ការណ៍សម្ងាត់​កំពុង​​តែ​ធ្វើ​ឱ្យ​រដ្ឋបាល​អូបាម៉ា ទើស​ទាល់​ខ្លាំង និង​ទំនង​ក្លាយ​ជា​ប្រធាន​បទ​ដ៏​សំខាន់​នៅ​ទំព័រមុខ​​របស់​កាសែត​អាមេរិក​ចេញ​ផ្សាយ​នៅ​ថ្ងៃ​សុក្រ​ទី​៧​មិថុនា​ឆ្នាំ​២០១៣ផង។ រឿង​អាស្រូវ​ដែល​សារព័ត៌មាន​ Washington Postនិង The Guardian បាន​បង្ហើប​ឱ្យ​ដឹង​នៅ​ល្ងាច​មិញនូវ​ព័ត៌មាន​ទាំង​ឡាយ​ទាក់ទង​នឹង ​កម្មវិធី​ស៊ើបការណ៍​សម្ងាត់​ ទ្រង់ទ្រាយ​ធំ​ មាន​ឈ្មោះ​ថា Prism ដែល​អាច​​​ចូល​​យក​ការណ៍​​តាម​ប្រព័ន្ធ​​ទូរស័ព្ទ និង​តាម​ទិន្នន័យ​ព័ត៌មានវិទ្យា របស់​ក្រុមហ៊ុន Google ឬ Facebook។

ផ្សាយពាណិជ្ជកម្ម

ឈ្មោះរបស់​កម្មវិធី​ គឺ « Prism » ! ​កាសែត​ Washintong Post និង​The Guardian បានបញ្ជាក់​ឱ្យ​ដឹង​នៅ​ល្ងាច​ថ្ងៃ​ព្រហស្បតិ៍ ទី ៦ មិថុនា ២០១៣ ដោយ​បោះផ្សាយ​ផ្នែក​មួយ​នៃ​ ការ​បង្ហាញ​ Powerpoint ទំនង​សម្រាប់​បំពាក់បំប៉ន​ដល់​ក្រុម​អ្នក​វិភាគ​​ព័ត៌មាន​របស់​ភ្នាក់ងារ​សន្តិសុខ​ជាតិ​ នៃ​ប៉ូលិស​សហព័ន្ធ​អាមេរិក FBI។  Prism គឺ​ជា​កម្មវិធី​មហា​សម្ងាត់​ ដែល​ភ្នាក់ងារ​ស៊ើប​ការណ៍​​អាមេរិក ដោយ​ត្រូវរ៉ូវ​​ជាមួយ​ក្រុមហ៊ុន​អ៊ីនធ័រនែត​អាមេរិក ​អាច​ចូល​ទៅ​រុក​រក​ ​យក​ព័ត៌មាន​សម្ងាត់​ដោយ​ផ្ទាល់​​ពី​​ក្រុមហ៊ុន​ជា​ដៃគូ ចំនួន​៩​ មាន​ជាអាទិ៍ ក្រុមហ៊ុន Microsoft, Apple, Yahoo, Google, Facebook ឬក៏​ Skype ផង។

 
ភ្នាក់ងារ​​​នេះ អាច​ អាន​​​អ៊ីមែល ​ស្តាប់​ឬ​អាន​ការ​ជជែក​តាម​អ៊ីនធ័រនែត (ឆាត) អាច​មើល​រូបថត​ មើល​វីដេអូ​ និង​គ្រប់​ប្រភេទ​ឯកសារលើ​បណ្តាញ​ ប្រព័ន្ធ​ព័ត៌មានវិទ្យា​ទាំង​អស់​។ អត្តសញ្ញាណ​ ពេល​ ម៉ោង ខ្លឹមសារ​ តាម​​​ទូរស័ព្ទ តាម​ប្រព័ន្ធ​អេឡិចត្រូនិច របស់​អ្នក​ប្រើប្រាស់​​ទូទៅ​ ត្រូវ​​បាន​ក្រុម​អ្នក​ស៊ើបការណ៍​ចូល​យក​បាន​ ដោយ​មិន​បាច់​​មាន​បញ្ជា​ ឬ​ដីកាអី្វ​ ពី​តុលាការ​ទេ !

ច្បាប់​នៅ​សហរដ្ឋ​​អាមេរិក​ បាន​ហាម​ឃាត់​រដ្ឋាភិបាល​អាមេរិក​ មិន​ឱ្យ​ធ្វើ​ការ​ស៊ើប​អង្កេត​បែប​នេះ​លើ​​បណ្តា​ជន​អាមេរិក​ ឬ​ក៏​​បរទេស​រស់​នៅ​សហរដ្ឋ ដោយគ្មាន​​ពាក់ព័ន្ធ​ឬ​ភស្តុតាង​​សង្ស័យ​ធ្វើ​សកម្មភាពឧក្រិដ្ឋ​ទេ។ ជា​ផ្លូវការ​កម្មវិធី​ ​​« Prism » នេះ​ គឺ​សំដៅ​តែ​លើជន​បរទេស​ ប៉ុន្តែ​សមាគម​ការពារ​សេរីភាព​ស៊ីវិល​ បាន​សម្តែង​ការ​ប្រឆាំង​នឹង​គ្រោះ​ថ្នាក់​នៃ​ការជ្រៀត​ជ្រែកជីវិត​ឯកជន តាម​រយៈ​កម្មវិធី​នេះ ដែល​អនុវត្ត​តាំង​ពី​សម័យ​លោក George Bush ក្រោយ​ភេរវនិយម១១​កញ្ញា​២០០១​ ប៉ុន្តែ​ទើប​ត្រូវ​បាន​សភា​អាមេរិក ក្រោម​អាណត្តិ​លោក​អូបាម៉ា ​អនុម័ត​ឱ្យ​មាន​សុពលភាព​ជា​ថ្មី​ កាលពី​ពេល​ថ្មីៗ​នេះ។

គ្រាន់​តែ​បាន​ឮ​ដំណឹង​នេះ​ភ្លាម ទាំង​Google Facebook ឬ​Appel​ សុទ្ធ​តែ​នាំ​គ្នា​​បដិសេធ ​និង​អះអាង​មិន​ដែល​ឮ​មិន​ដែល​ស្គាល់​ឈ្មោះ​កម្មវិធី Prismនេះ​ឡើយ។ ដោយ​មិន​ប្រកាស​ជា​ផ្លូវការ​វត្តមាន​កម្មវិធី Prism សេតវិមាន​ត្រឹម​បដិសេធ​​ថា​មិន​បាន​តាម​លួច​យកការណ៍​ពី​ប្រជាជននៅ​អាមេរិកទេ ប៉ុន្តែបាន​​បញ្ជាក់ភាព​ចាំ​បាច់​នៃ​​ការ​ប្រយុទ្ធ​ប្រឆាំង​ភេរវនិយម​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ