សម្តេចប៉ាប-សហរដ្ឋអាមេរិក

សម្តេចប៉ាប​លូកដៃ​ចូល​ក្នុង​ការ​បោះឆ្នោត​ប្រធានាធិបតី​អាមេរិក

រូមភាព​កាត់ត សម្តេចប៉ាប​ហ្វ្រង់ស័រ ទល់នឹង​ដូណាស់ ទ្រុមភ៍ បេក្ខភាព​ប្រធានាធីបតី​សហរដ្ឋ​អាមេរិក​ ដែល​មាននយោបាយ​ស្អប់ជន​បរទេស​
រូមភាព​កាត់ត សម្តេចប៉ាប​ហ្វ្រង់ស័រ ទល់នឹង​ដូណាស់ ទ្រុមភ៍ បេក្ខភាព​ប្រធានាធីបតី​សហរដ្ឋ​អាមេរិក​ ដែល​មាននយោបាយ​ស្អប់ជន​បរទេស​ REUTERS/Max Rossi/Lane Hickenbottom/Files TPX IMAGES OF THE DAY
ដោយ៖ ម៉ម ពិសី
១៨ នាទី

សម្តេច​ប៉ាប ហ្រ្វង់ស័រ ​ប្រមុខ​សាសនា​គ្រឹស្ត ​បាន​លូក​ដៃ​ចូល​ទៅ​ក្នុង​ការ​ឃោសនា​បោះឆ្នោត​ប្រធានាធិបតី​នៅ​សហរដ្ឋ​អាមេរិក ​ ដោយ​បាន​ថ្លែង​កាល​ពី​ថ្ងៃ​ព្រហស្បតិ៍​ទី​១៨ កុម្ភៈ​ថា ​លោក ​ដូណាល់ ទ្រុមភ៍ ​មិនមែន​ជា​អ្នក​កាន់​សាសនា​គ្រឹស្ត​ទេ។ ប្រសាសន៍​នេះ ​ ត្រូវ​បាន​បេក្ខភាព​ឈរ​ឈ្មោះ​ប្រធានាធិបតី​រូបនេះ​ មាន​ប្រតិកម្ម​ភ្លាមៗ​ ដោយ​បាន​ចោទ​សម្តេច​ប៉ាប​ថា​ជា​សម្តេច​សង្ឃ ​មិន​ត្រូវ​មក​ធ្វើ​នយោបាយ​ទេ។

ផ្សាយពាណិជ្ជកម្ម

មនុស្ស​ម្នាក់​ ដែល​មាន​ចិត្ត​ចង់​កសាង​ជញ្ជាំង ​ដើម្បី​ខណ្ឌចែក​មនុស្ស​ ជា​ជាង​ការ​កសាង​ស្ពាន​ដើម្បី​ចម្លង​មនុស្ស​ ​គឺ​មនុស្ស​ម្នាក់​នោះ​មិន​មែន​ជា​អ្នក​កាន់​សាសនា​គ្រឹស្ត​ទេ។ នេះ​គឺ​ជា​ប្រសាសន៍​ របស់​សម្តេច​ប៉ាប ​ហ្រ្វង់ស័រ ​ប្រមុខ​សង្ឃ​សាសនា​គ្រឹស្ត ​ដែល​បាន​ថ្លែង​ទៅ​កាន់​អ្នក​កាសែត ​នៅ​លើ​យន្តហោះ ​ដែល​បាន​ដឹក​ព្រះអង្គ​ត្រឡប់​ពី​ប្រទេស​មិកស៊ិកកូ។ សម្តី​នេះ ​ត្រូវ​បាន​គេ​ដឹង​យ៉ាង​ច្បាស់ ​ថា​សម្តេច​សង្ឃ​ ប្រាថ្នា​សំដៅទៅ​ដល់ ​លោក ​ដូណាល់ ​ទ្រុមភ៍ ​បេក្ខភាព​ឈរ​ឈ្មោះ​បោះឆ្នោត​ប្រធានាធិបតី​អាមេរិក ​មក​ពី​គណបក្ស​សាធារណៈរដ្ឋ។

 
លោក​មហាសេដ្ឋី ​ដែល​ជា​បេក្ខភាព​ប្រធានាធិបតី​រូបនេះ ​ធ្លាប់​បាន​ថ្លែង​ឃោសនា​ថា ​បើ​សិន​ជា​លោក​ជាប់ឆ្នោត​ជា​ប្រធានាធិបតី​សហរដ្ឋ​អាមេរិក ​លោក​នឹង​បញ្ជា​ឲ្យ​សាងសង់​ជញ្ជាំង​ថ្ម ​ដើម្បី​ខណ្ឌចែក​ព្រំដែន ​រវាង​សហរដ្ឋ​អាមេរិក ​និង​ប្រទេស​មិកស៊ិកកូ ​ដើម្បី​ទប់ស្កាត់​កុំ​ឲ្យ​ជន​អន្តោប្រវេសន៍​ នាំគ្នា​សម្រុក​មក​រស់​នៅ​ក្នុង​សហរដ្ឋ​អាមេរិក។ ភ្លាមៗ ​បន្ទាប់​ពី​ប្រសាសន៍​របស់​សម្តេច​ប៉ាប​ ត្រូវ​បាន​គេ​ផ្សព្វផ្សាយ ​ លោក ​ដូណាល់ ទ្រុមភ៍ ​បាន​មាន​ប្រតិកម្ម​ នៅ​តាម​កញ្ចក់​ទូរទស្សន៍ ​ដោយ​រិះគន់​សម្តេច​ប៉ាប​ ថា​ជា​ប្រមុខ​សង្ឃ​ដែល​ធ្វើ​នយោបាយ។ លោក​មហាសេដ្ឋី​សក់​ពណ៌​ទង់ដែង ​បន្ថែម​ថា​ សម្តេច​ប៉ាប ​ហ្រ្វង់ស័រ ​និយាយ ​ទាំង​គ្មាន​យល់​ ពី​បញ្ហា​ប្រឈម​របស់​សហរដ្ឋ​អាមេរិកទេ។

យ៉ាងណាមិញ ​សម្តេច​ប៉ាប​ហ្វ្រង់ស័រ ​ បាន​បញ្ជាក់​បក​ទៅ​វិញ​ថា ​ព្រះអង្គ​មិន​បាន​ទៅ​លូក​ដៃ​លូក​ជើង​ក្នុង​កិច្ចការ​បោះឆ្នោត​របស់​សហរដ្ឋ​អាមេរិក​ទេ។ មនុស្ស​គ្រប់គ្នា​មាន​សិទ្ធិ​បោះ ​រឺ​មិន​បោះ​រៀងៗ​ខ្លួន។ សម្រាប់​ព្រះអង្គ​ ព្រះអង្គ​គ្រាន់តែ​បាន​បញ្ចេញ​យោបល ​ក្នុង​នាម​ជា​សម្តេច​សង្ឃ​សាសនា។ ឆ្លើយតប​ទៅ​នឹង​សម្តី​ចោទ​ថា​ព្រះអង្គ​ជា​សង្ឃ​ធ្វើ​នយោបាយ ​សម្តេច​ប៉ាប​ បាន​ឆ្លើយ​បែប​ចំអក​ថា ​អ្នក​ប្រាជ្ញ​អារីស្តូត ​ ធ្លាប់​បាន​និយាយ​ថា ​មនុស្ស​លោក​គ្រប់រូប​ គឺ​ជា​សត្វ​ដែល​ធ្វើ​នយោបាយ ​ ដូច្នេះ ​ព្រះអង្គ​សប្បាយ​ចិត្ត​ណាស់ ​ព្រោះ​មាន​ន័យ​ថា​ព្រះអង្គ​ក៏​ជា​មនុស្ស​លោក​ម្នាក់​ដែរ។

យ៉ាងណា​ក៏ដោយ ​នេះ​ជា​រឿង​កំរ​ណាស់ ​ ដែល​ប្រមុខ​សង្ឃ​សាសនា​​គ្រឹស្ត ​ថ្លែង​ដោយ​ចំៗ ​រិះគន់​ទៅ​លើ​បេក្ខភាព​ឈរឈ្មោះ​បោះឆ្នោត។ ក៏​ប៉ុន្តែ​បើ​គេ​ក្រលេក​មើល​ទៅ​លើ​សកម្មភាព​របស់​សម្តេច​ប៉ាប ​ហ្វ្រង់ស័រ​កន្លង​មក​ គេ​គ្មាន​អ្វី​ភ្ញាក់​ផ្អើល​ទេ ​ដោយសារ​តែ​សម្តេច​ប៉ាប​ ធ្លាប់​បាន​ថ្លែង​សន្ទរកថា​ម្តង​ហើយ​ម្តង​ទៀត ​ដោយ​ថ្លែងពី​ទុក្ខ​​លំបាក​របស់​ជន​ភៀស​ខ្លួន​ ជន​អន្តោប្រវេសន៍​ ដែល​ត្រូវ​បង្ខំ​ចិត្ត​ចាកចោល​ផ្ទះ​សម្បែង ​ភូមិស្រុក ​ ដោយសារតែ​​កត្តា​ជីវភាព ​ និង​គម្លាត​រវាង​អ្នក​មាន​និង​អ្នកក្រ។

យ៉ាងណាមិញ​ ប្រសាសន៍​សម្តេច​ប៉ាប ​ដែល​ថា​លោក ​ដូណាល់ ទ្រុមភ៍ ​មិនមែន​ជា​អ្នក​កាន់​សាសនា​គ្រឹស្ត ​គឺ​ពិត​ជា​អាច​ប៉ះពាល់ ​ដល់​ប្រជាប្រិយភាព​របស់​បេក្ខជន​ឈរឈ្មោះ​រូបនេះ ​ ដោយសារ​សម្លេង​ឆ្នោត​របស់​អ្នក​កាន់​សាសនា​គ្រឹស្តិ​នៅ​សហរដ្ឋ​អាមេរិក ​គឺ​មាន​ភាគ​ច្រើន​លើសលប់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI