អាមេរិក-ដើមបូព៌ា

សុន្ទរកថា​របស់​លោកអូបាម៉ា​ស្តីពី​ភូមិភាគដើមបូព៌ា​

លោកប្រធានាធិបតី​​អាមេរិកអូបាម៉ា​ពិភាក្សា​ជាមួយ​ព្រះចៅ Abdullah នៅសេតវិមាន​នៅថ្ងៃទី១៧ឧសភា​ឆ្នាំ២០១១
លោកប្រធានាធិបតី​​អាមេរិកអូបាម៉ា​ពិភាក្សា​ជាមួយ​ព្រះចៅ Abdullah នៅសេតវិមាន​នៅថ្ងៃទី១៧ឧសភា​ឆ្នាំ២០១១ © REUTERS/Larry Downing

ប៉ុន្មានម៉ោង​ទៀត​ខាងមុខនេះ​ លោកប្រធានាធិបតី​​អាមេរិក នឹងថ្លែង​សុន្ទរកថា​មួយ​ស្តីពី ​ស្ថានភាព​នៅដើមបូព៌ា។​ ប្រាំខែ​ក្រោយពី​ការផ្តើម​ឡើង​នៃ​បដិវត្តន៍​នៅក្នុង​ពិភពអារ៉ាប់​ លោកអូបាម៉ា​នឹង​លាត​ត្រដាង​ឲ្យឃើញ​នូវជំហរ​របស់​សហរដ្ឋ​អាមេរិក​នៅ​ចំពោះមុខ​បរិបទ​ភូមិសាស្រ្ត​នយោបាយ​ថ្មីនៃ​ភូមិភាគ​ដើមបូព៌ា។ ​តើហេតុអ្វី​បានជា​សុន្ទរកថា​របស់​លោកអូបាម៉ា​នៅថ្ងៃពុធ​ទី១៨ឧសភា​នេះ ជា​ព្រឹត្តិការណ៍​មួយ​សំខាន់ ?​ 

ផ្សាយពាណិជ្ជកម្ម

 

នៅចំពោះមុខ​បដិវត្តន៍​ដែល​ប្រព្រឹត្ត​​ទៅ​បន្តបន្ទាប់​គ្នា​នៅក្នុង​បណ្តា​ប្រទេស​នៃ​ពិភពអារ៉ាប់​ សហរដ្ឋ​អាមេរិក​គ្មាន​ជំហរ​និង​យុទ្ធសាស្រ្ត​ច្បាស់​ទេ​មកទល់​ពេលនេះ។​ ក្នុងករណី​ប្រទេស​លីប៊ី​ទីក្រុង​វ៉ាស៊ីនតោន​គ្រាន់តែ​បាន​ទាមទារ​ឲ្យKadhafi​ចាកចេញ​ពីតំណែង។​ ទាក់ទង​នឹង​ប្រទេស​ស៊ីរីវិញ​ សេតវិមាន​បាន​ទទូច​ឲ្យBachar​ al-Assad ​បន្ទន់​ជំហរ​និងចេះ​ស្តាប់​សម្លេង​និង​សេចក្តី​ត្រូវការ​របស់​ប្រជារាស្រ្ត។ ​ស្តីពី​ប្រទេសបារ៉ែន​វិញ​ ទីក្រុង​វ៉ាស៊ីនតោន​គ្រាន់តែ​បាន​អំពាវនាវ​ឲ្យព្រះចៅ​Hamad ben Issa Al-Khalifa ​គោរព​“សិទ្ធិ​សកល”​របស់​ពលរដ្ឋ។

ទាំងនេះ​បានន័យ​ថា ​មកទល់​ពេលនេះ ជំហរ​របស់​លោក អូបាម៉ា​មិនមែន​មានតែ​មួយ​ទេ និង​ថាវា​តែងតែ​បត់បែន​ទៅតាម​ស្ថានភាព​ធ្ងន់​ឬ​ស្រាល​នៃ​បដិវត្តន៍​នីមួយៗ​ដែល​ប៉ះពាល់​ខ្លាំងឬ​តិច​ទៅលើ​ផលប្រយោជន៍​អាមេរិក​នៅក្នុ​ងតំបន់។

ម្ល៉ោះហើយ​បានជា​ក្រុម​អ្នកសង្កេតការណ៍​រង់ចាំ​ស្តាប់​សុន្ទរកថា​របស់​ប្រធានាធិបតី​អាមេរិក​នៅប៉ុន្មាន​ម៉ោង​ទៀត​ខាងមុខនេះ។​ តាមមើល​ទៅ​ លោកអូបាម៉ា​នឹង​ច្បាស់ជា​លាត​ត្រដាង​ឲ្យឃើញ​នូវ​យុទ្រសាស្រ្ត​ថ្មីមួយ​របស់​លោក​នៅចំពោះ​មុខការ​ប្រែប្រួល​យ៉ាង​លឿន​រហ័ស​នៃ​ស្ថានភាព​យោបាយ​នៅក្នុង​ភូមិភាគ​ដើមបូព៌ា។

តើអាមេរិក​អាចនឹង​ជួយ​បណ្តា​ប្រទេស​នៅក្នុង​តំបន់​តាម​មធ្យោបាយ​ណា?​ តើ​អាមេរិក​អាច​ពង្រឹង​គ្រឹះ​ប្រជាធិបតេយ្យ​នៅក្នុង​តំបន់​តាមរបៀប​ណា?​ តើការ​ស្លាប់​របស់​Ben Laden​មានន័យ​យ៉ាងណា​សម្រាប់​ពិភពអារ៉ាប់ ?​ ទាំងនេះ​ សុទ្ធសឹង​ជាសំណួរ​ដែល​លោកអូបាម៉ា​ត្រូវ​ឆ្លើយ​តាម​រយៈសុន្ទរកថា​របស់​លោក​នៅថ្ងៃនេះ​ពីព្រោះ​ចង់ឬ​មិនចង់​ការប្រែប្រួល​ស៊ី​ជម្រៅ​នៅក្នុង​ភូមិភាគ​ដើមបូព៌ា​ជា​ឱកាស​មួយ​សម្រាប់​ឲ្យ​អាមេរិក​សើរើ​មើលឡើង​វិញ​ទិស​ដៅ​នយោបាយ​របស់​ខ្លួន​នៅក្នុង​តំបន់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI