ស៊ីរី- ស.រ.អា.

ស៊ីរី​កន្លង​បន្ទាត់​ក្រហម​ អាមេរិក​ផ្តល់​ជំនួយ​យោធា​ដល់​ពួក​ឧទ្ទាម

អ្នក​នាំពាក្យ​សេតវិមាន​លោក Ben Rhodes រូបថត​ថ្ងៃទី ១៤ មេសា ២០១២
អ្នក​នាំពាក្យ​សេតវិមាន​លោក Ben Rhodes រូបថត​ថ្ងៃទី ១៤ មេសា ២០១២ AFP PHOTO/Mandel NGAN

ក្រសួង​ស៊ើប​ការណ៍​សម្ងាត់​អាមេរិក មាន​ភស្តុតាង​​គ្រប់គ្រាន់​បញ្ជាក់​ថា រដ្ឋាភិបាល​ស៊ីរី បាន​ប្រើ​អាវុធ​គីមី​។ នេះ​​ជា​សេចក្តី​ប្រកាស​​របស់​អ្នក​នាំ​ពាក្យ​សេតវិមាន នៅល្ងាច​ថ្ងៃ​ព្រហស្បតិ៍​ទី ១៣​មិថុនា។ ​របប​ក្រុង​ដាម៉ាស​ប្រើ​អាវុធ​គីមី ដែល​ទំនង​ជា​សម្លាប់​ជីវិត​មនុស្ស​ប្រមាណ​ពី ១០០​ទៅ​១៥០​នាក់ ​ជា​ការ​រំលោភ​បំរាម​របស់​អាមេរិក ដូច្នេះ​ជំហរ​របស់​វ៉ាស៊ីនតោន​ក៏​ប្តូរ​ទៅ​តាមនោះ​ដែរ គឺ​អាមេរិក ​នឹង​បង្កើន​ជំនួយ​យោធា​ ដល់​ក្រុម​ឧទ្ទាម។

ផ្សាយពាណិជ្ជកម្ម

រដ្ឋាភិបាល​ស៊ីរី របស់​លោក បាស្ហារ អាល់អាសាទ បាន​ឆ្លង​គំនូស​ក្រហម​ហាមឃាត់​ ដោយ​ហ៊ាន​ប្រើ​អាវុធ​គីមី​ ក្នុង​សង្គ្រាម​ជាមួយ​ពួក​ឧទ្ទាម​​ប៉ះបោរ។ ជា​ការ​ប្រើប្រាស់​ក្នុង​បរិមាណ​តិច​តួច​ទេ ប៉ុន្តែ​ជាច្រើន​លើក​ច្រើន​សា។ នេះ​ជា​ការ​គូស​បញ្ជាក់​របស់​អ្នកនាំ​ពាក្យ​សេតវិមាន​ នៅ​ក្នុង​សន្និសីទ​កាសែត នាទីក្រុង​វ៉ាស៊ីនតោន​ ល្ងាច​មិញ។

 
អាមេរិក​មិន​ខ្ជាក់​សំដី​ទេ ! ជាមួយ​នឹង​ការ​ជូន​ដំណឹង​​រក​​ឃើញ​ភស្តុតាងនៃ​ការ​ប្រើ​អាវុធ​គីមី​​នៅស៊ីរី​ អាមេរិក​បាន​ប្រកាសភ្លាម​​បង្កើន​ជំនួយ​យោធា​ ដល់​ពួក​ឧទ្ទាម​ ប៉ុន្តែ​ពុំ​ទាន់​មាន​ការ​សម្រេច​ ​បង្កើត​តំបន់​ហោះ​ហើរ​ហាមឃាត់ ឬ ប្រភេទ​នៃ​ជំនួយ​យោធា​ឱ្យ​បាន​ច្បាស់​លាស់​នៅ​ឡើយទេ។​ សមាជិក​សភា​អាមេរិក​នៃ​គណបក្ស​សាធារណរដ្ឋ​ ជា​ច្រើន​បានថែម​ទាំង​ទាមទារ​ឱ្យ​រដ្ឋាភិបាល​អាមេរិក​ ផ្តល់​អន្តរាគមន៍​យោធា​ ក្នុង​ទ្រង់ទ្រាយ​ធំ​​។ រីឯ​អ្នក​ការទូត​​មួយ​ចំនួនធំ​វិញ​ បាន​ស្នើ​សុំ​ឱ្យ​មាន​ការ​វាយប្រហារ​តាម​ផ្លូវ​អាកាស​ យ៉ាង​ហោច​ណាស់​ទៅ​លើ​មូលដ្ឋាន​​យោធាទ័ពអាកាស​របស់​លោក បាស្ហារ​ អាល់អាសាទ។

ប៉ុន្តែ​​​​រុស្ស៊ី សម្ព័ន្ធ​មិត្ត​​របស់​ដាម៉ាស បាន​ច្រាន​ចោល​ការ​ចោទ​ប្រកាន់​របស់​អាមេរិកនេះ​ ​ ដោយ​យល់​ថាជា​​ភស្តុតាង​ភូត​កុហក។ ប្រឈម​មុខ​នឹងស្ថានការណ៍​បែប​នេះ អូតង់​បាន​ស្នើ​សុំ​ទៅ​កាន់​អាជ្ញាធរ​ស៊ីរី ឱ្យ​បើក​ផ្លូវ​ដល់​​ក្រុម​ប្រឹក្សា​សន្តិសុខ​អង្គការ​សហប្រជាជាតិ ដើម្បី​ធ្វើ​អង្កេត​​ផ្ទាល់​លើ​សមរភូមិ ជុំ​វិញ​ការ​ប្រើប្រាស់​អាវុធ​គីមី​នេះ។

សូម​បញ្ជាក់​ថា​អាមេរិកមាន​ការ​សង្ស័យ​ចំពោះ​បំរើបំរាស់​អាវុធ​គីមី​ស៊ីរី យូរ​ពេលមក ហើយ តែ​ទើប​​​ប្រកាស​ទទួល​ស្គាល់​ជា​លើក​មួយ នៅថ្ងៃ​ម្សិលមិញ​ ៩​ថ្ងៃ​ក្រោយ​ការ​អះអាង​របស់​បារាំង​ និង​អង់គ្លេស៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI