អាហ្រ្វិកខាងត្បូង

សុខភាព​របស់លោក​Nelson Mandela កាន់​តែ​ធ្លាក់​ចុះ​ដុនដាប

នៅមុខ​មន្ទីរពេទ្យ ដែល​អតីតប្រធានាធិបតី​ចូល​ព្យាបាល ប្រជាជន​អាហ្វ្រិក​ខាងត្បូង​បន់ស្រន់​ឲ្យ​លោក​Mandela ជា​ពី​ជម្ងឺ
នៅមុខ​មន្ទីរពេទ្យ ដែល​អតីតប្រធានាធិបតី​ចូល​ព្យាបាល ប្រជាជន​អាហ្វ្រិក​ខាងត្បូង​បន់ស្រន់​ឲ្យ​លោក​Mandela ជា​ពី​ជម្ងឺ ©Reuters

នៅ​អាហ្វ្រិក​ខាងត្បូង ដំណឹង​ស្តី​ពីសុខភាព​របស់​លោក​Nelson Mandela បាន​ធ្លាក់ចុះ​ជា​បន្តបន្ទាប់។ កាលពី​ល្ងាច​ថ្ងៃ​ពុធ​ទី ២៧ ខែ​មិថុនា ឆ្នាំ ២០១៣  អ្នកស្និទ្ធ​នឹង​គ្រួសារ​របស់​លោក​Mandela ​បាន​ប្រាប់​អ្នកសារព័ត៌មានថា លោក​ Nelson Mandela ដែល​មាន​ជម្ងឺ​រលាកសួត​ធ្ងន់ធ្ងរ ត្រូវ​គេ​ដាក់​ឲ្យ​ដកដង្ហើម ដោយ​មាន​ជំនួយ​ពី​ម៉ាស៊ីន​បញ្ចូល​ខ្យល់​អុកស៊ីសែន នៅ​មន្ទីរពេទ្យ។ 

ផ្សាយពាណិជ្ជកម្ម

ជាផ្លូវការ​លោក​Nelson Mandela នៅ​មាន​ជីវិត ប៉ុន្តែ គ្រាន់តែ​បាត់បង់​ស្មារតី ហើយ​ការដកដង្ហើម​របស់គាត់​គឺ​ធ្វើ​ឡើង​ដោយ​មាន​ជំនួយ​ពី​ម៉ាស៊ីន​អុកស៊ីសែន។ ក្នុង​រយៈពេល ២​ថ្ងៃ​ចុងក្រោយនេះ សុខភាព​របស់​វីរបុរស​អាហ្រ្វិកខាងត្បូង​មិន​បាន​ល្អប្រសើរ​ឡើង​ឡើយ គឺ​មាន​តែ​ធ្លាក់ចុះ​ដុនដាប។

 

កាលពី​យប់​ថ្ងៃ​ពុធ បន្ទាប់ពី​បាន​ចូល​ទៅ​សួរ​សុខទុក្ខ​លោក​ Nelson Mandela លោក​ប្រធានាធិបតី​អាហ្វ្រិក​ខាងត្បូង Jacop Zuma បាន​សម្រេច​លុបចោល​ទស្សនកិច្ច របស់​លោក នៅ​ប្រទេស​Mozambique ដែល​ត្រូវ​ធ្វើ នៅថ្ងៃ​ព្រហស្បតិ៍។ នេះ​បើតាម​សេចក្តី​ប្រកាស​ព័ត៌មាន​របស់​វិមាន​ប្រធានាធិបតី អាហ្វ្រិកខាងត្បូង។

ដំណឹង​នេះ​បាន​ធ្វើ​ឲ្យ​ប្រជាជន​អាហ្វ្រិក​ខាងត្បូង​រឹតតែ​បារម្ភ និង​កើតទុក្ខ ព្រោះថា មើលទៅ ដង្ហើម​ចុងក្រោយ​របស់​ Nelson Mandela ដែល​ជា បិតា​ឯករាជ្យ ដ៏​គួរ​ឲ្យ​គោរព​របស់​ប្រជាជន​អាហ្វ្រិកខាងត្បូង ទំនង​ជា​មិន​អាច​នៅ​វែង​តទៅទៀត​ទេ។

នៅថ្ងៃនេះ បរិយាកាស​ស្ងប់ស្ងាត់ កំពុង​គ្របដណ្តប់​ពេញផ្ទៃ​ប្រទេស។ នៅ​មុខ​មន្ទីរពេទ្យ ដែល​លោក​ Nelson Mandela កំពុង​ទទួល​ការព្យាបាល ប្រជាជន​អាហ្វ្រិក​ខាងត្បូង ក្នុងទឹកមុខ​ក្រៀមក្រំ បាន​នាំគ្នា ទៅ​ច្រៀង បន់ស្រន់ សុំ​ឲ្យ​លោក​ឆាប់​ជា​សះស្បើយ។ ចំណែក​ប្រជាជន​អាហ្វ្រិកខាងត្បូង​មួយ​ចំនួន​ទៀត ​ត្រៀម​រួចហើយ ដើម្បី​កាន់មរណៈទុក្ខ​លោក Mandela៕


 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI