អានតួអត្ថបទ
ទស្សនៈព្រឹត្តិការណ៍ពិភពលោក

រដ្ឋាភិបាល​អាមេរិក​ជួប​វិបត្តិ​ថវិកា ដោយសារ​អ្នកនយោបាយ​មួយ​ក្តាប់​តូច

សំឡេង ០៤:១៨
Ted Cruz​សមាជិក​ព្រឹទ្ធសភា​ជួប​សមាជិកTea Partyដែល​​ភាគច្រើន​ គឺជាស្ត្រី​ស្បែកស​ដែល​មាន​អាយុ​ចាប់​ពី​៥០​ឆ្នាំ​ឡើងទៅ
Ted Cruz​សមាជិក​ព្រឹទ្ធសភា​ជួប​សមាជិកTea Partyដែល​​ភាគច្រើន​ គឺជាស្ត្រី​ស្បែកស​ដែល​មាន​អាយុ​ចាប់​ពី​៥០​ឆ្នាំ​ឡើងទៅ ©REUTERS/Jonathan Ernst
ដោយ៖ ឈាង បុប្ផា
២៦ នាទី

អាមេរិក មហាអំណាច​ពិភពលោក​ជួប​វិបត្តិ​ជាប់គាំង​ថវិកា​ពីរ​សប្តាហ៍​មកហើយ។ ពីរសប្តាហ៍ ដែល​មន្រ្តីរដ្ឋការ​រដ្ឋសហព័ន្ធ​ត្រូវ​ផ្អាកពី​ការងារ​ដោយ​បង្ខំ និង​គ្មាន​ប្រាក់ខែ និង​ពីរសប្តាហ៍ មកហើយ ដែល​លោកប្រធានាធិបតី និង​​អ្នកតំណាងរាស្រ្ត​មក​ពី​បក្ស​ប្រឆាំង​នៅ​សភា នៅ​តែ​និយាយ​មិន​ចុះសម្រុង​គ្នា​ដើម្បី​បញ្ជៀស​វិបត្តិ​ថវិកា។ ក្រុមបក្ស​សាធារណរដ្ឋ​នៅ​តែ​ប្រឆាំង ដាក់ភ្លើង​ក្រហម មិន​ឲ្យ​រដ្ឋាភិបាល​ខ្ចី​បំណុល​បន្ថែម ដរាប​ណា រដ្ឋាភិបាល​មិនព្រម​បញ្ឈប់​អនុវត្ត​ច្បាប់​ធានារ៉ាប់រង​សុខភាព ឬ​ហៅថា Obamacare។ ច្បាប់​Obamacare ដែល​ក្រុមអភិរក្ស​និយម​ខ្លាំង​មួយ​ក្តាប់តូច គឺ​ក្រុម​Tea Party ប្តេជ្ញា​គាស់រំលើង​ឲ្យ​បាន។ តើ​អ្វីជាបំណង​ពិតប្រាកដ​របស់​ក្រុមTea Party?

ផ្សាយពាណិជ្ជកម្ម

 

ក្រុមអភិរក្ស​និយមជ្រុល ឬ​ ក្រុម​Tea Party​កំពុង​ចាក់​ឫស​កាន់តែ​ជ្រៅ​នៅក្នុង​គណបក្ស​សាធារណរដ្ឋ។ ក្រុមTea Party កំពុង​ឆ្លៀត​ប្រើ​​ច្បាប់​ដំឡើង​ប្រាក់បំណុល ធ្វើ​ជា​ចំណាប់ខ្មាំង ដើម្បី​ដាក់សម្ពាធ​លើ​រដ្ឋាភិបាល។ ដូច្នេះ ក្រុមTea Party មិនមែន​ត្រឹម​តែ​ចង់​ទាមទារ​ឲ្យ​លោកអូបាម៉ា​លះបង់​ចោល​ច្បាប់​Obamacare ប៉ុណ្ណោះទេ ប៉ុន្តែ ​ទិសដៅ​របស់​ក្រុមនេះ គឺ​ធ្វើ​ឲ្យ​រដ្ឋាភិបាល​សហព័ន្ធ​ចុះខ្សោយ និង​ដួលរលំ​តែម្តង។

បើ​មើល​ទៅ​លើ​ឫសគល់ ប្រវត្តិដើម ក្រុម​Tea Party​កើត​ចេញ​មក​ពី​គំនិត​ប្រមូលផ្តុំ​របស់​អភិរក្សនិយមជ្រុល​មួយ​ក្តាប់តូច​របស់​បក្ស​សាធារណរដ្ឋ ដែល​ទិសដៅ​របស់គេ គឺ​ប្រឆាំង​នឹង​រដ្ឋសហព័ន្ធ និង​ប្រឆាំង​មិន​ឲ្យ​រដ្ឋាភិបាល​យកលុយ​បង់​ពន្ធ​របស់ពួកគេ​ទៅចំណាយ​លើ​សេវា​សង្គម​សាធារណៈ ដូចជា​Obamacare ជាដើម។ ក្រុមTea Party ​បាន​ចាត់ទុក​ការចំណាយ​ច្រើន​របស់​រដ្ឋាភិបាល​ថា ជា​មេរោគ​ដែល​ធ្វើ​ឲ្យ​ពួកគេ​បង់​ពន្ធ​កាន់តែ​ច្រើន​ទៅលើ​ប្រាក់​ចំណូល។

ក្រុមTea Party​លេច​ចេញ​ជា​រូបរាងឡើង នៅ​ឆ្នាំ ២០០៩ គឺ​បន្ទាប់​ពី​ការចាញ់ឆ្នោត​ប្រធានាធិបតី​​របស់​បក្ស​សាធារណរដ្ឋ។ ចលនា​នេះ​កាន់តែ​រឹងមាំ និង​ទទួល​បាន​ការគាំទ្រ​ខ្លាំង​ពី​មហាសេដ្ឋី​អាមេរិកាំង និង​ក្រុមអភិរក្ស​ជ្រុល​នៅ​អាមេរិក។ គេ​ដាក់ឈ្មោះ​ចលនា​ប្រឆាំងនេះ​ថា  Tea Party ដោយ​គេ​ចង់​សំដៅ​ទៅដល់​ការរើបំរាស់​របស់​ប្រជាជន​អាមេរិកាំង​ស្បែកស ដែល​បាន​ធ្វើ​បដិវត្តន៍​ប្រឆាំង​នឹង​ការដំឡើងពន្ធ​ខ្លាំង​លើ​ស្លឹកតែ ឬ Tea កាលពី​ឆ្នាំ ១៧៧៣។

តាមការសិក្សា​ស្រាវជ្រាវ​របស់​នយោបាយវិទូ​Theda Skocpol និង​Venessa Williamson អ្នកដែល​ចូលរួម​ក្នុង​ចលនា​Tea Party គឺ​ជា​ប្រជាជន​អាមេរិកាំង​ស្បែកស មាន​អាយុ​លើស​ពី​៥០​ឆ្នាំ និង​មាន​ទ្រព្យសម្បត្តិ កេរ្តិ៍អាករ​ច្រើន​ជាង​ប្រជាជន​អាមេរិកាំង​ទូទៅ។ ក្រុមអ្នកមាន​ស្បែកស​មាន​គំនិត​ថា ពួកគេ​កំពុង​ចាយប្រាក់​របស់​ពួកគេ​ទៅលើ​យុវជន​អាមេរិកាំង ក្រុម​ប្រជាជន​ចម្រុះ​ពណ៌សំបុរ ដែលមិន​ស្ថិតនៅ ក្នុង​ក្រុមប្រភេទ​មនុស្ស​ដូចពួកគេ។

ដោយសារ​តែ​មាន​ការជួយ​គាំទ្រ​ឧបត្ថម្ភ​ថវិកា​ពី​ក្រុមមហាសេដ្ឋី ចលនា​Tea Party​បាន​បង្កើត​អង្គការ សមាគម​តូចៗ​បាន​ជាង​១ពាន់ នៅ​ទូទាំង​អាមេរិក។ ការទាមទារ​របស់ពួកគេ​ផ្តោត​ទៅលើ​បីចំណុច គឺ លុបបំបាត់​ចោល​ច្បាប់សុខភាព​របស់​លោកអូបាម៉ា ការកាត់បន្ថយ​​ឱនភាព​ថវិកា និង​ចំណាយ​សាធារណៈ។ ចំណុចទាមទារ​ចុងក្រោយ គឺ​ពួកគេ​ចង់​ឲ្យ​រដ្ឋាភិបាល​កាត់បន្ថយ​អន្តរាគមន៍ នៅក្នុង​នយោបាយ​អន្តរជាតិ។

នៅ​ចន្លោះ​ឆ្នាំ ២០០៩ និង​ឆ្នាំ ២០១១ ចលនា Tea Party បាន​ទាក់ទាញ​មនុស្ស​កាន់តែច្រើន ជាពិសេស​ពី​ក្រុមប្រជាជន​អាមេរិកាំង​ជីវភាព​មធ្យម។ ដោយ​បាន​ទទួល​ការគំាទ្រ ពួក​អភិរក្ស​និយម​របស់​ក្រុម​Tea Party​បាន​ឈ្នះឆ្នោត ដណ្តើម​បាន​កៅអី​ជាង​៥០ ក្នុង​អំឡុង​បោះឆ្នោត​សភា ពាក់កណ្តាល​អាណត្តិ នាឆ្នាំ ២០១០។ ក្រុម​អភិរក្ស​និយម​របស់​Tea Party​កំពុង​ចាក់ឫស​យ៉ាងជ្រៅ និង​មាន​កាន់តែ​ច្រើន នៅក្នុង​គណបក្ស​សាធារណរដ្ឋ ដែល​ជា​បក្ស​ប្រឆាំង។ សមាជិក​បក្ស​សាធារណរដ្ឋ​ផ្សេងទៀត ដែល​មិនសូវ​អភិរក្ស​ខ្លាំង ត្រូវ​បាន​ក្រុម​Tea Party​ប្រើ​ឥទ្ធិពល គាបសង្កត់ ដើម្បី​ឲ្យ​ពួកគេ​បោះឆ្នោត​ប្រឆាំង​មិនឲ្យ​ចេញ​ច្បាប់​ថវិកា​សម្រាប់​រដ្ឋាភិបាល។ ក្នុង​អតីតកាល ក្រុមបក្ស​សាធារណរដ្ឋ​មាន​នយោបាយ​មិនសូវ​រឹងតឹង​ខ្លាំង និង​តែងតែ​អធ្យាស្រ័យ ធ្វើ​សម្បទាន ដើម្បី​ជៀសវាង​កុំ​ឲ្យ​រដ្ឋាភិបាល​ជួប​វិបត្តិ។ ប៉ុន្តែ ពួកគេ​ទាំងនេះ ពេលនេះ កំពុង​ត្រូវ​ក្រុមអភិរក្ស​និយមជ្រុល​Tea Party​ដាក់សម្ពាធ គំរាម​ពីការបាត់បង់​សំឡេង​គំាទ្រ ពី​ម្ចាស់ឆ្នោត និង​ម្ចាស់ជំនួយ ប្រសិន​បើ​ពួកគេ​បោះឆ្នោត​គាំទ្រ​ច្បាប់​សុខភាព​របស់លោកអូបាម៉ា​លើកនេះ។

បក្ស​សាធារណរដ្ឋ​ពេលនេះ​កំពុង​ធ្លាក់​ក្នុង​អន្ទាក់​របស់​ក្រុម​មនុស្ស​មួយ​ក្តាប់តូច​ដែល​តាម​ពិត គ្មាន​ឆន្ទៈ​ធ្វើ​នយោបាយ។ ក្រុមនេះ មិន​ខ្វល់​ពី​នយោបាយ ឬ​ផលប៉ះពាល់​នៃ​សកម្មភាព​របស់គេ​ទេ។ ក្រុម​Tea Party​មិនមែន​ទាមទារ​ត្រឹម​ឲ្យ​គេ​លុបបំបាត់​ចោល​ច្បាប់​Obamacare ប៉ុន្តែ គេ​ប៉ង​ទាមទារ​យក​ឈ្នះ​ឲ្យ​ខាងតែបាន គឺ​មិន​ឲ្យ​អាមេរិក​ដឹកនាំ​ដោយ​មនុស្ស​ស្បែកខ្មៅ ដូចជា​លោកអូបាម៉ា ឬ​បើ​ដឹកនាំ​គឺ​ត្រូវ​ជួប​រាប់រយ​ឧបសគ្គ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ