អានតួអត្ថបទ
សូម៉ាលី-ស.រ.អា.

ទស្សនកិច្ច​ជា​ប្រវត្តិសាស្ត្រ​របស់​រដ្ឋមន្ត្រីការបរទេស​អាមេរិក​នៅ​ប្រទេស​សូម៉ាលី

លោក​ចន ឃែរី នៅ​អាកាសយានដ្ឋាន​ក្រុង​ម៉ូហ្គាឌីស្យូ​ប្រទេស​សូម៉ាលី ថ្ងៃទី ៥ ឧសភា ២០១៥
លោក​ចន ឃែរី នៅ​អាកាសយានដ្ឋាន​ក្រុង​ម៉ូហ្គាឌីស្យូ​ប្រទេស​សូម៉ាលី ថ្ងៃទី ៥ ឧសភា ២០១៥ © Reuters
ដោយ៖ អៀង សុខម៉ិញ
១២ នាទី

លោក ចន ឃែរី បាន​អញ្ជើញ​ទៅ​បំពេញ​ទស្សនកិច្ច​ ដោយ​ឥត​ព្រាង​ទុក​នៅ​ប្រទេស​សូមាលី នា​ថ្ងៃអង្គារ​ទី ៥​ឧសភា​នេះ។ ជា​ទស្សនកិច្ច​ខ្លី តែ​មាន​តម្លៃ​ជា​ប្រវត្តិសាស្ត្រ និង​ជា​ប្រមុខ​ការទូត​អាមេរិក​ដំបូង​គេ​បង្អស់​ដែល​ធ្វើ​ដំណើរ​ទៅ​ជាន់​ដី​សូម៉ាលី បន្ទាប់​ពី​​ការ​ដក​ខ្លួន​យ៉ាង​អាម៉ាស​​ចេញ​ពី​សូម៉ាលី​ នៅ​ឆ្នាំ១៩៩៣មក។

ផ្សាយពាណិជ្ជកម្ម

លោក​ចន ឃែរី បាន​ចូល​បំពេញ​ទស្សនកិច្ច​នៅ​​សូម៉ាលី ​តែ​ប្រមាណ​បី​ម៉ោងកន្លះ​ប៉ុណ្ណោះ។ ចុះ​ជាន់​ដី​សូម៉ាលីជា​និមិត្តរូប និង​ស្ថិត​តែ​ក្នុង​បរិវេណ​សុវត្ថិភាព​នៃ​តំបន់​អាកាសយានដ្ឋាន​ ​ក្រុង​ម៉ូហ្គាឌីស្យូ លោក​ប្រមុខ​ការទូត​អាមេរិក បាន​ជួប​ពិភាក្សា​ជាមួយ​ប្រធានាធិបតី នាយករដ្ឋមន្ត្រី​ អភិបាល​ខេត្ត​សំខាន់​របស់​សូម៉ាលី ព្រមទាំង​តំណាង​សង្គម​ស៊ីវិល​មួយ​ចំនួន​ធំ។

 
ជា​ទស្សនកិច្ច​ដោយ​ឥត​ព្រាង​ទុក តែ​មាន​អត្ថន័យ​ជា​ប្រវត្តិសាស្ត្រ​បំផុត សម្រាប់​នយោបាយ​ការទូត​អាមេរិក​នៅ​សូម៉ាលី។ អាមេរិកធ្លាប់​ជួយ​ឈឺឆ្អាល​សូម៉ាលី​ ដែល​រងគ្រោះ​ទុរ្ភិក្ស និង​សង្គ្រាមស៊ីវិល ដោយ​បញ្ជូន​ទាហាន​ឱ្យ​ចូល​ជួយ​ធ្វើ​អន្តរាគមន៍​នៅ​ឆ្នាំ​១៩៩២។ ប៉ុន្តែ​មិន​បាន​ប៉ុន្មាន​ផង អាមេរិក​ បាន​បង្ខំ​ចិត្ត​ចាក​ចេញ​ពី​សូម៉ាលី​យ៉ាង​អាម៉ាស បន្ទាប់​ពី​កង​យុទ្ធជន​សូម៉ាលី​បាន​បាញ់​សម្លាប់​ទាហាន​អាមេរិក​១៨​នាក់ រួច​អូស​សាកសព​ទាហាន​ទាំង​អស់​នោះ​ តាម​ថ្នល់​ពេញ​រដ្ឋធានី​ម៉ូហ្គាឌីស្យូ។

“ជាង​២០​ឆ្នាំ​កន្លង ជាមួយ​សហគមន៍​អន្តរជាតិ សហរដ្ឋ​អាមេរិក​បាន​វិល​ត្រលប់​មក​សូម៉ាលី​វិញ ដើម្បី​ផ្តល់​ក្តី​សង្ឃឹម​ថ្មី និង​ ​ចែក​រំលែក​ក្តី​ព្រួយ​បារម្ភ”។ នេះ​ជា​​សារ​វីដេអូ​ របស់​លោក​ចន ឃែរី​ ទៅ​កាន់​ពលរដ្ឋ​សូម៉ាលី ជាមួយ​នឹង​ការ​លើក​ទឹក​ចិត្ត​ថា សូម៉ាលី​ក្នុង​សង្គ្រាម​មែន​ តែ​ស្ថានភាព​ប្រទេស​បាន​ប្រសើរ​ឡើង ដោយ​មាន​ស្ថាប័ន​រដ្ឋ មាន​រដ្ឋធម្មនុញ្ញ​បណ្តោះ​អាសន្ន​ ហើយ​កង​កម្លាំង​យោធា​បាន​យក​ជ័យជំនះ និង​រុញច្រាន​ពួកជ្រុលនិយម​អ៊ីស្លាម​Shebab ចេញ​ពីតំបន់​ដែល​មាន​ប្រជាជន​រស់​នៅ​ច្រើន។ វត្តមាន​របស់​លោក​ថ្ងៃ​នេះ ជា​ភស្តុតាង។

ប្រមុខ​ការទូត​អាមេរិក​សង្ឃឹម​ថា​សូម៉ាលី​អាច​នឹង​រៀប​ចំ​ការ​បោះឆ្នោត​សភា​បាន​ត្រឹម​ត្រូវ​នៅឆ្នាំ​២០១៦ ព្រោះ​ពេល​នេះ​សូម៉ាលី​បាន​រឹង​មាំជាង​មុន បើ​ទោះ​បី​ជា​ប្រទេស​កំពុង​ស្ថិតក្នុង​សង្គ្រាម គ្មាន​អំណាច​​កណ្តាល​ត្រឹម​ត្រូវ​តាំង​ពី​ឆ្នាំ​១៩៩១​មក​ក៏​ដោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ