អានតួអត្ថបទ
ទស្សនៈព្រឹត្តិការណ៍ពិភពលោក

លោក​ប្រធានាធិបតី​ Obama​ តែងតាំង​ចៅក្រម​ Merrick Garland ​ជា​សមាជិក​ចៅក្រម​ប្រចាំ​តុលាការ​កំពូល​អាមេរិក​

សំឡេង ០៤:២៨
ចៅក្រម​​ Merrick Garland​​ អម​ដោយ​លោក​ប្រធានាធិបតី  Obama​ និង​​អនុ​ប្រធានាធិបតី​ ​Biden ​ថ្ងៃ​ទី​​១៦​មីនា​២០១៦​​នៅ​​​ Washington.​
ចៅក្រម​​ Merrick Garland​​ អម​ដោយ​លោក​ប្រធានាធិបតី Obama​ និង​​អនុ​ប្រធានាធិបតី​ ​Biden ​ថ្ងៃ​ទី​​១៦​មីនា​២០១៦​​នៅ​​​ Washington.​ REUTERS/Jonathan Ernst
ដោយ៖ បូលីន ដាវីដ
៣៩ នាទី

នៅ​សហរដ្ឋ​អាមេរិក​ការ​ប្រឈម​មុខ​ដាក់​គ្នា​ថ្មី​មួយ​ រវាង​គណបក្ស​ប្រជាធបិតេយ្យ​ និង​គណបក្ស​សាធារណរដ្ឋ​កំពុង​ចាប់​ផ្តើម​ហើយ។ នោះ​គឺ​ទាក់​ទង​នឹង​សំណុំ​រឿង​តែងតាំង​​ចៅក្រម​ Merrick Garland ​ជា​សមាជិក​ចៅក្រម​ប្រចាំ​តុលាការ​កំពូល​អាមេរិក។​ លោក​ ​ Barack Obama ដែល​មក​ពី​គណបក្ស​ប្រជាធិបតេយ្យ​បានប្រើ​ប្រាស់​សិទ្ធិ​ប្រធានាធិបតី​ក្នុង​ការ​តែងតាំង​នេះ​។​ ប៉ុន្តែ​ ការ​តែង​តាំង​នេះ​ចាំបាច់​ត្រូវទទួល​ការ​អនុម័ត​ពី​ព្រឹទ្ធសភាអាមេរិក។​សព្វថ្ងៃ​នេះ​ គណបក្ស​សាធារណរដ្ឋ​ ដែល​ដើរ​តួនាទី​ដូចជា​បក្ស​ជំទាស់​ កំពុង​គ្រប់​គ្រង​ព្រឹទ្ធសភា​អាមេរិកហើយ​ពួក​សាធារណរដ្ឋ​គម្រាម​កង្កក​ការ​តែងតាំង​នេះ។ ការ​ខ្វែង​គំនិត​គ្នា​រវាង​គណបក្ស​ទាំងពីរ​ក្នុង​សំណុំ​រឿង​នេះ​កំពុង​តែ​ផ្ទុះ​ឡើង​​ចំ​ពេល​ដែល​ការ​បោះឆ្នោត​ប្រធានាធិបតី​អាមេរិក​នឹង​ត្រូវ​រៀបចំ​នា​ដំណាច់​ឆ្នាំ​នេះ។ 

ផ្សាយពាណិជ្ជកម្ម

កាលពីសប្តាហ៍​មុន​នេះ​ លោក​ប្រធានាធិបតី​ Barack Obama បាន​សំរេច​ចិត្ត​តែង​តាំង​លោក​ Merrick Garland ​ជា​ចៅក្រម​ប្រចាំ​តុលាការ​កំពូល​អាមេរិក។​ ការ​តែង​តាំង​នេះ​ត្រូវ​បាន​ធ្វើ​ឡើង​តែ​មួយ​ខែ​ប៉ុណ្ណោះ​ ក្រោយ​ពី​ចៅក្រម​ Antonin Scala ​ ដែល​ជា​សមាជិក​ចៅក្រម​តុលាកា​រ​កំពូល​បាន​ទទួល​មរណៈភាព​ ក្នុង​អាយុ​ ៧៩​ ឆ្នាំ​ កាលពី​ថ្ងៃ​ទី​១៣ កុម្ភៈ​កន្លង​ទៅ​នេះ។បន្ទាប់​ពី​មរណៈភាព​នេះ​ ​​តំណែង​សមាជិក​ចៅក្រម​មួយបាន​ស្ថិត​នៅ​ទំនេរ​ក្នុង​តុលាការ​កំពូល​អាមេរិក។

​លោក​ អូបាម៉ា​ បាន​ប្រញាប់​ប្រញាល់​ស្វែង​រក​ចៅក្រម​ថ្មី​អោយ​មក​បំពេញ​តំណែង​ទំនេរ​នេះ។​ ក្រោយ​ពី​បាន​សិក្សា​យ៉ាង​ល្អិត​ល្អន់​លើ​បេក្ខភាព​ចៅក្រម​មួយ​ចំនួន​ លោក​ អូបាម៉ា​ បាន​សំរេច​ជ្រើសរើស​ចៅក្រម​ Merrick Garland​ ដើម្បី​បង្គ្រប់​ចំនួន​សមាជិក​តុលាការ​កំពូល​អាមេ​​​រិក។

 

 

ប្រតិកម្ម​ពី​គណបក្ស​សាធារណរដ្ឋ​
​ភ្លាមៗ​ក្រោយ​ការ​ប្រកាស​ព័ត៌មាន​ជុំវិញ​ការ​តែងតាំង​នេះ​ ​លោក​ Mitch McConnell ប្រធាន​ព្រឹទ្ធសភា​អាមេរិក​បាន​ប្រកាស​ព្រមាន​ថា​​ ព្រឹទ្ធសភា​នឹង​មិន​លើក​យក​សំណើ​តែង​តាំង​នេះ​មក​ពិភាក្សា​អនុម័ត​ឡើយ។​ លោក​ Mitch McConnell ដែល​មាន​តួនាទី​ជា​ប្រធាន​ក្រុម​មតិ​ភាគច្រើន​របស់​គណបក្ស​សាធារណរដ្ឋ​ប្រចាំ​ព្រឹទ្ធសភា​ផងដែរ​​បាន​បក​ស្រាយ​ថា​ ការ​តែង​តាំង​ចៅ​ក្រម​ថ្មី​នេះ​​​គួរ​តែ​ទុក​អោយ​ប្រធានាធិបតី​ថ្មី​ជា​អ្នក​សម្រេច។​ វាជា​ការ​មិន​សមរម្យ​ឡើយ​ដែល​លោក​ អូបាម៉ា​ អនុវត្ត​អំណាច​ធម្មនុញ្ញ​ក្នុង​ឋានៈ​ជា​ប្រធានាធិបតី​ ខណៈ​ពេល​ដែល​ឆ្នាំ​ ២០០១៦​នេះ​ គឺ​ជា​ឆ្នាំ​បោះឆ្នោត​ជ្រើស​រើស​ប្រធានាធិបតី​ថ្មី​ និង​ជា​ឆ្នាំ​ចុង​ក្រោយ​នៃ​អាណត្តិ​របស់​គាត់។

ជា​ការ​ឆ្លើយ​តប​ លោក​ អូបាម៉ា​ បាន​ពន្យល់​ថា​ ការ​តែង​តាំង​ចៅក្រម​ក្នុង​តុលាការកំពូល​អាមេរិក​​នា​ឆ្នាំ​ចុង​ក្រោយ​នៃ​អាណត្តិ​ប្រធានា​ធិបតី​មិន​មែន​ជា​រឿង​ថ្មី​ថ្មោង​ឡើយ។​ ក្នុង​រយៈ​ពេល​​ ៥០ ឆ្នាំ​ចុង​ក្រោយ​នេះ​ មាន​ចៅក្រម​ចំនួន​ ១៤ រូបធ្លាប់​ត្រូវ​បាន​តែងតាំង​ប្រចាំ​តុលាការ​កំពូល​អាមេរិក​ នា​ឆ្នាំ​បោះឆ្នោត​ប្រធានាធិបតី​បែប​នេះ។

លោក អូបាម៉ា​ បាន​លើក​ឧទាហរណ៍​​ថា​ ​កាលពី​ឆ្នាំ​១៩៨៨​ លោក​ប្រធានាធិបតី​ Ronald Reagan មកពី​គណបក្ស​សាធារណរដ្ឋ​បាន​តែង​តាំង​ចៅក្រម​ Anthony Kennedy។ ហើយ​ការ​តែងតាំង​នេះ​ត្រូវ​បាន​អនុម័ត​ដោយ​ព្រឹទ្ធសភា​ដែល​គ្រប់​គ្រង​ដោយ​គណបក្ស​រជាធិបតេយ្យ។ ​ហើយ​កាល​នោះក៏​ជា​ឆ្នាំ​មមាញឹក​ដោយ​ការ​បោះឆ្នោត​ប្រធានាធិបតី​ផងដែរ។

ការ​តែង​តាំង​ដែល​មាន​ឥទ្ធិពល​ដល់​ទស្សនៈ​នយោបាយ​បក្ស​

ហេតុអ្វី​បាន​ជា​គណបក្ស​ប្រជាធិបតេយ្យ និង​គណបក្ស​សាធារណរដ្ឋ​ប្រទាញ​ប្រទង់​គ្នា​ក្នុង​សំណុំ​រឿង​នេះ?​ សូម​ជំរាប​ថា​ ជា​ធម្មតា​ តុលាការ​កំពូល​អាមេរិកមាន​សមាជិក​ចៅក្រម​ចំនួន​ ៩ រូប។​ ក្រោយ​ពី​ចៅក្រម​ Antonin Scala ​ បាន​ទទួល​មរណៈភាព​ បច្ចុប្បន្ន​នេះ​ តុលាការ​កំពូល​អាមេរិក​មាន​ចៅក្រម​តែ​ ៨​ រូប​ប៉ុណ្ណោះ។ ក្នុង​នោះមាន​ចៅក្រម ៤ រូប​ត្រូវ​បាន​គេ​ដឹង​ថា​មាន​និន្នាការ​អភិរក្ស​និយម​ ស្រប​គ្នា​នឹង​គោល​នយោបាយ​របស់​គណបក្ស​សាធារណរដ្ឋ​។ ចំណែក​ចៅក្រម​ ៤ រូប​ផ្សេង​ទៀត​ គឺ​ជា​អ្នក​កំណែ​ទម្រង់​និយម​ ដែល​មាន​ទស្សនៈ​ដើរ​ទន្ទឹម​គ្នា​នឹង​គណបក្ស​ប្រជាធិបតេយ្យ។

សម្រាប់​ពួក​សាធារណរដ្ឋ​ ការ​តែងតាំង​ចៅក្រម​ Merrick Garland ជា​ចៅក្រម​ទី​៩​ គឺ​ឧបសគ្គ​ចម្បង​សម្រាប់​ផល​ប្រយោធន៍​​របស់​គណបក្ស​ខ្លួន។ ព្រោះ​ថា​រយៈពេល​ ៣០ ឆ្នាំ​កន្លង​មក​នេះ ​ចៅក្រម​ Antonin Scala ​ ដែល​បាន​ទទួល​មរណៈភាព​គឺ ជា​អ្នក​អភិរក្ស​និយម ​ហើយ​បាន​ធ្វើ​សេចក្តី​សម្រេច​ចិត្ត​មួយ​ចំនួន​ការពារ​ទស្សនៈ​អភិរក្ស​និយម​របស់​ពួកសាធារណរដ្ឋ​ ក្នុង​មាន​ដូចជា​ប្រឆាំង​ការ​ពន្លូត​កូន​ ​ប្រឆាំង​អាពាហ៍​ពិពាហ៍​មនុស្ស​ស្រលាញ់​ភេទ​ដូចគ្នា​ និង​ការពារ​សិទ្ធិ​ប្រើប្រាស់​កាំភ្លើង​របស់​ពលរដ្ឋ​អាមេរិក​ជាដើម។​ គណបក្ស​សាធារណរដ្ឋ​ចង់​បង្កក​ការ​តែងតាំង​ចៅក្រម​ថ្មី​នេះ​ ហើយ​រង់ចាំ​លទ្ធផល​នៃ​ការ​បោះឆ្នោត​ប្រធានាធិបតី​ថ្មី។​ ប្រសិន​បើ​បក្ស​ខ្លួន​ឈ្នះ​ ​ពួក​សាធារណរដ្ឋ​នឹង​អាច​ជ្រើស​រើស​ចៅក្រម​ម្នាក់​ ដែល​មាន​និន្នាការ​ទៅ​រក​គោលការណ៍​អភិរក្ស​និយម។

តើ​ចៅក្រម​ Merrick Garland ជា​នរណា?​

មាន​អាយុ​ ៦៣ ឆ្នាំ​ ​សព្វថ្ងៃ​នេះ​ ​លោក Merrick Garland មាន​តួនាទី​ជា​ប្រធាន​ចៅក្រម​ប្រចាំ​តុលាការ​ឧទ្ធរណ៍​ក្រុង​វ៉ាស៊ីងតោន។​ លោក​ត្រូវ​បាន​គេ​ចាត់​ទុក​ថា​ជា​ចៅក្រម​ម្នាក់​មាន​បទពិសោធន៍​ជ្រៅ​ជ្រះ ​ក្នុង​ការ​បំពេញ​មុខងារ​ក្នុង​ប្រព័ន្ធ​យុត្តិធម៌​អាមេរិក។​ ហើយ​លោក​ក៍​ត្រូវ​បាន​គេ​ស្គាល់​ថា​ ជា​បុគ្គល​មាន​និន្នាការ​ងាក​ទៅ​រក​គំនិត​កំណែរ​ទម្រង់​និយម ដែល​ស្រប​គ្នា​នឹង​ទស្សនៈ​នយោបាយ​របស់​គណបក្ស​ប្រជាធិបតេយ្យ​របស់​លោក​ប្រធានាធិបតី​ បារ៉ាក់ អូបាម៉ា​។

ដើម្បី​សម្រេច​ការ​តែង​តាំង​នេះ​ លោក ​អូបាម៉ា បាន​ផ្ញើរ​សារ​ព្រមាន​គូបដិបក្ខ​នយោបាយ​រួចហើយ។​ យុទ្ធសាស្រ្ត​របស់​លោក​ អូបាម៉ា​ គឺ​យក​សំណុំ​រឿង​តែង​តាំង​ចៅ​ក្រម​នេះ​ទៅ​ពាក់​ព័ន្ធ​ជាមួយ​នឹង​មតិ​សាធារណជន​អាមេរិក​ ក្នុង​យុទ្ធនាការ​បោះឆ្នោត​ប្រធានាធិបតី​ថ្មី។​ លោក​ប្រធានាធិបតី​តែង​ពន្យល់​តាម​កញ្ចក់​ទូរទស្សន៍​ថា​ ការ​តែង​តាំង​នេះ​គឺ​ស្រប​តាម​រដ្ឋធម្មនុញ្ញ​អាមេរិក។​ សម្រាប់​ពលរដ្ឋ​អាមេរិក​ ពាក្យ​រដ្ឋ​ធម្មនុញ្ញ​នេះ​ គឺ​មាន​តម្លៃ​ខ្លាំង​ណាស់។​ បើ​តាម​ការ​ស្ទង់​មតិ​របស់​សារព័ត៌មាន​ Washington Post និង​ស្ថានីយ៍​ទូរទស្សន៍​ ABC News បាន​អោយ​ដឹង​ថា​ ៦៣%​ នៃ​ពលរដ្ឋ​អាមេរិក​ចង់​អោយ​ព្រឹទ្ធសភា​អនុម័ត​ការ​តែង​តាំង​នេះ។​

ម៉្យាងទៀត​ ថ្វីត្បិត​តែ​គណបក្ស​សាធារណរដ្ឋ​មាន​សមាជិក​ច្រើន​លើស​លប់​ក្នុង​ព្រឹទ្ធសភា​ ហើយ​​កំពុង​គ្រប់​គ្រង​ស្ថាប័ន​កំពូល​នេះ​ក៏​ពិតមែន​ ប៉ុន្តែ​លោក​ អូបាម៉ា​ ក៍​ចង់​បង្ក​ភាព​រង្គោះ​រង្គើរ​ដល់​សមាជិក​ព្រឹទ្ធសភា​របស់​មក​ពី​គណបក្ស​សធារណ​រដ្ឋ​​ផងដែរ។

 មូលហេតុ​ គឺ​សមាជិក​ព្រឹទ្ធិសភា​ខ្លះ​នឹង​ត្រូវ​ផុត​អាណត្តិ​នា​ដំណាច់​ឆ្នាំ​នេះ ហើយ​ពួក​គេ​ត្រូវ​រង់ចាំ​លទ្ធផល​នៃ​ការបោះឆ្នោត​ប្រធានាធិបតី​ថ្មី​ដើម្បី​អាច​ដឹង​ថា​ពួក​គេ​អាច​បន្ត​អាណត្តិ​របស់​ខ្លួន។ ​ដូចនេះ​ចង់​មិន​ចង់​ក៏​មាន​សមាជិក​ព្រឹទ្ធសភា​ខ្លះ​អាច​ទាមទារ​អោយ​លើក​យក​ការ​តែង​តាំង​​​នេះ​មក​ដេញ​ដោល​អនុម័ត។

អំពី​តុលាការ​កំពូល​អាមេរិក​

សូម​បញ្ជាក់​ថា​ តុលាការ​កំពូល​អាមេរិក​ជា​ស្ថាប័ន​ជាន់​ខ្ពស់​មួយ​មាន​បេសកកម្ម​ត្រួត​ពិនិត្យ​ឃ្លាំមើល​ធម្មនុញ្ញភាព​នៃ​ច្បាប់​អាមេរិក។​ ហើយ​ស្ថាប័ន​នេះ​ក៏​ដើរ​តួនាទី​សំខាន់​ផង​ដែរ​ ក្នុង​ការ​ចេញ​សេចក្តី​សម្រេច​ទាក់​ទង​នឹង​ប្រធាន​បទ​ជជែក​ដេញ​ដោល​ក្នុង​សង្គម​អាមេរិក។​ ក្រោយ​ពី​ទទួល​បាន​ការ​តែងតាំង​ ចៅក្រម​ទាំង​ ៩ រូប​ដែល​ជា​សមាជិក​តុលាការ​នេះ​មាន​អាណត្តិ​អស់​មួយ​ជីវិត​ក្នុង​ការ​បំពេញ​តួនាទី​របស់​ខ្លួន។ ជាទូទៅ​ ចៅក្រម​ទាំង​នោះ​ គឺ​ជា​អង្គ​​សម្រេច​លើ​សំណុំ​រឿង​ធំៗ​ដែល​មាន​លក្ខណៈ​ស្មុគ​ស្មាញ​ និង​ចម្រូង​ចម្រាស់។​ ប្រធាន​បទ​ដ៏​រសើប​ទាំង​នោះ ​មាន​ដូច​ជា​ច្បាប់​ពន្លូត​កូន​ សិទ្ធិជនជាតិ​ភាគ​តិច​ អាពាហ៍​ពិពាហ៍​អ្នក​ស្រលាញ់​​​ភេទ​ដូចគ្នា​ ការ​រើស​អើង​ពូជសាសន៍​ ទោស​ប្រហារ​ជីវិត​ និង​ការ​ខ្វែង​គំនិត​ក្នុង​និតិ​វិធី​បោះឆ្នោត​ ជាដើម។ ​ហើយ​ច្បាប់​ស្តីពី​បម្រែបម្រួល​អាកាសធាតុ​ ដែល​ស្នើ​ឡើង​ដោយ​លោក​ប្រធានាធិបតី​ អូបាម៉ា​ ក៏​នឹង​ត្រូវ​រង់ចាំ​សេចក្តី​សម្រេច​ពី​តុលាការ​កំពូល​នេះ​ផងដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ