ដោយសារ​ជនអន្តោប្រវេសន៍ លោកដូណាល់ ត្រាំ​ប្រកាស​ផ្តាច់ជំនួយ​ដល់​ប្រទេស​បី របស់​អាមេរិកកណ្តាល

ក្បួន​ជនអន្តោប្រវេសន៍​មក​ពី អាមេរិកកណ្តាល នៅ​ព្រំដែន​ប្រទេស​ក្វាតេម៉ាឡា​ជាមួយ​​ម៉ិចស៊ិក ធ្វើដំណើរ​សំដៅ​ទឹកដី​អាមេរិក នៅថ្ងៃទី ២១​តុលា ២០១៨
ក្បួន​ជនអន្តោប្រវេសន៍​មក​ពី អាមេរិកកណ្តាល នៅ​ព្រំដែន​ប្រទេស​ក្វាតេម៉ាឡា​ជាមួយ​​ម៉ិចស៊ិក ធ្វើដំណើរ​សំដៅ​ទឹកដី​អាមេរិក នៅថ្ងៃទី ២១​តុលា ២០១៨ ©REUTERS/Ueslei Marcelino

លោក​ដូណាល់ ត្រាំ នៅថ្ងៃ​ចន្ទ​ទី ២២ តុលា បាន​ប្រកាស​កាត់ផ្តាច់​ជំនួយ​ដល់​ប្រទេស​ហុងឌូរ៉ាស អេលសាល់វ៉ាឌ័រ ហើយ​និង​ក្វាតេម៉ាឡា។ ប្រធានាធិបតី​អាមេរិកាំង បាន​រិះគន់ បន្ទោស​ប្រទេស​ទាំងបី នៅ​អាមេរិកកណ្តាល​ថា គ្មាន​សមត្ថភាព ទប់ស្កាត់​ជនអន្តោប្រវេសន៍ រាប់ពាន់​នាក់ ដែល​កំពុង​ធ្វើដំណើរ​ជា​ក្បួន​ក្នុង​ទឹកដី ម៉ិចស៊ិក សំដៅ ឆ្លងដែន​ខុសច្បាប់ ចូល​ក្នុង​ប្រទេស​អាមេរិក។ 

ផ្សាយពាណិជ្ជកម្ម

នៅពេល​ដែល​ជនអន្តោប្រវេសន៍​ហុងឌូរ៉ាស​កំពុង​លើក​គ្នា ធ្វើ​ដំណើរ​ជា​ក្បួន ​សំដៅ ទឹកដីអាមេរិក លោកដូណាល់ ត្រាំ តាមរយៈ​សារTwitter របស់​លោក បាន​ប្រកាស​កាត់ផ្តាច់​ជំនួយ ភ្លាមៗ សម្រាប់​ប្រទេស​បី នៅ​អាមេរិក​កណ្តាល ដូចជា ហុងឌូរ៉ាស ក្វាតេម៉ាឡា ហើយ​និង​អេល សាល់វ៉ាឌ័រ។ ប្រធានាធិបតី អាមេរិក​បាន​ចោទ​ប្រកាន់​រដ្ឋាភិបាល​ប្រទេស​ទាំងបី​ថា បាន​ទទួល​ប្រាក់ជំនួយ​ជា​ប្រចាំ​ពីអាមេរិក ប៉ុន្តែ គ្មាន​សមត្ថភាព ទប់ស្កាត់​កុំ​ឲ្យ​ប្រជាជន ចាកចេញ​ពី​ប្រទេស ដើម្បី លួច​ឆ្លងដែន​ខុសច្បាប់​ចូល​ទឹកដី អាមេរិក។ តាមទីភ្នាក់ងារ​អភិវឌ្ឍ​អាមេរិក នៅ​ឆ្នាំ ២០១៧ អាមេរិក​ផ្តល់​ជំនួយ ២៤៨​លាន​ដុល្លារ ដល់​ប្រទេស​ក្វាតេម៉ាឡា

តាម​អង្គការ​សហប្រជាជាតិ ជនអន្តោប្រវេសន៍ ជាង ៧ពាន់​នាក់ មក​ពី អាមេរិកកណ្តាល កំពុង​ធ្វើដំណើរ​ឆ្លងកាត់ ប្រទេស​ម៉ិចស៊ិក នៅថ្ងៃ ចន្ទ សំដៅ ព្រំដែន​ម៉ិចស៊ិក អាមេរិក ដែល​ស្ថិតនៅ​ចម្ងាយ​ជាង ៣ពាន់​គីឡូម៉ែត្រ​ទៀត។ ទៅតាម​ការប្រកាស​អំពាវនាវ​នៅ​លើ​បណ្តាញ សង្គម កាលពី​ថ្ងៃទី ១៣​តុលា ប្រជាជន​ហុងឌូរ៉ាស រាប់ពាន់​នាក់ បាន​លើកគ្នា ធ្វើដំណើរ​ជា​ក្បួន ក្នុង​ក្តីសង្ឃឹម​ស្វែង​រកជីវិត​ថ្មី ក្នុង​ទឹកដី​អាមេរិក។

អង្គការ​សហប្រជាជាតិ​បាន​វាយតម្លៃថា ក្នុង​មួយឆ្នាំៗ មាន​មនុស្ស ៥សែន​នាក់​បាន​ឆ្លងដែន​ខុសច្បាប់ ចូល​ប្រទេស ម៉ិកស៊ិក ដើម្បីសំដៅ ទឹកដី​អាមេរិក។ នៅ​ថ្ងៃ​ព្រហស្បតិ៍ បន្ទាប់​ពី​ប្រធានាធិបតី​អាមេរិក គំរាម​ប្រើ​កម្លាំងទ័ព ដើម្បី​ប្រយុទ្ធប្រឆាំង​នឹង​ការហូរចូល​ជនអន្តោប្រវេសន៍​ខុសច្បាប់ ពី​ទឹកដី ម៉ិចស៊ិក រដ្ឋាភិបាល​ម៉ិចស៊ិក​បាន​ពង្រាយ​ទ័ព ដើម្បី រារាំង​ក្បួនជនអន្តោប្រវេសន៍​នៅ​ព្រំដនគោក ជាមួយ​ប្រទេស​ក្វាតេម៉ាឡា។ ប៉ុន្តែ យ៉ាងណាក៏ដោយ ​ជនអន្តោប្រវេសន៍ រាប់ពាន់​នាក់​ផ្សេងទៀត នៅតែ​អាច​ឆ្លងចូល​ម៉ិចស៊ិក តាមរយៈ​ផ្លូវទឹក ដែល​ស្ថិតនៅ​តាម​ព្រំដែន​ក្វាតេម៉ាឡា និងម៉ិចស៊ិក។

សម្រាប់​អង្គការ​ការពារ​សិទ្ធិមនុស្ស Human Rights Watch ការកាត់បន្ថយ​ជំនួយ អាមេរិក នឹង​មិនជួយ​ដោះស្រាយ​បញ្ហា​នោះតែ ប៉ុន្តែ ផ្ទុយទៅវិញ វា​នឹង​ធ្វើ​ឲ្យ​វិបត្តិ​ជនអន្តោប្រវេសន៍​កាន់តែ​ធ្លាក់​ដុនដាប។ ប្រជាជន​ហុងឌូរ៉ាស ភាគច្រើន បាន​រត់​ចេញ​ពី​ប្រទេស ដើម្បី គេចខ្លួន​ចេញពី​ការតាមសម្លាប់ អំពើហិង្សា ហើយ​និង​ភាពក្រីក្រ។

តាម​អង្គការ និង​ស្ថាប័ន​រដ្ឋ​របស់​ប្រទេស​ហុងឌូរ៉ាស ជំនួយ​របស់​អាមេរិក សម្រាប់​ការអភិវឌ្ឍន៍ ក្នុង​គោលដៅ ទប់ស្កាត់​កុំ​ឲ្យ​ប្រជាជន​ធ្វើចំណាកស្រុក និង​ធ្វើ​អន្តោប្រវេសន៍ ឆ្លងដែន​ខុសច្បាប់​ទៅ​អាមេរិក បាន​ធ្លាក់​ចុះ​ជាបន្តបន្ទាប់ នៅ​រយៈពេល​៣​ឆ្នាំ​ចុងក្រោយនេះ។ នៅ​ឆ្នាំ ២០១៧ ជំនួយ​របស់​អាមេរិក​សម្រាប់​ប្រទេស​ហុងឌូរ៉ាស​បានថយចុះ ពី​៧៥០​លាន មក នៅ​ត្រឹម ៦៥៥​លានដុល្លារ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI