អានតួអត្ថបទ
សហរដ្ឋអាមេរិក

ប៉ូលិស​រកឃើញ​ឡាន​បង្កៃគ្រាប់បែក​នៅ​ញូយ៉ក

ប៉ូលិស​បាន​បិទ​ច្រកចេញចូល​កន្លែង ដែល​គេរក​ឃើញ​ឡាន​ផ្ទុក​គ្រឿងផ្ទុះ
ប៉ូលិស​បាន​បិទ​ច្រកចេញចូល​កន្លែង ដែល​គេរក​ឃើញ​ឡាន​ផ្ទុក​គ្រឿងផ្ទុះ ©Reuters
ដោយ៖ សេង ឌីណា
១៤ នាទី

ប៉ូលិស​បាន​រក​ឃើញ​ឡាន​មួយគ្រឿង​ផ្ទុក​ពេញ​ទៅដោយ​គ្រឿងផ្ទុះ នៅ​ចំ​កណ្តាល​ក្រុង​ញូយ៉ក។ អភិបាល​ក្រុង និង​ប៉ូលិស​ក្រុង​​ញូយ៉ក​ បាន​អះអាង​ថា ឡាននេះ​ពិតជា​ត្រូវបាន​គេ​រៀបចំ​​បម្រុង​នឹង​ដាក់​បំផ្ទុះ​ពិតមែន។ ប៉ុន្តែ ក្រុមជំនាញ​ខាង​គ្រឿងផ្ទុះ​បាន​ដោះ​យក​គ្រាប់​ចេញ​ពី​ឡាន​នោះ​រួចហើយ។

ផ្សាយពាណិជ្ជកម្ម

សេចក្តីរាយការណ៍​របស់ សេង ឌីណា

ក្រុងញូយ៉ក​ទើប​នឹង​ចៀសផុត​ពី​ការវាយប្រហារភេរវកម្ម​ដ៏ធំមួយ កាល​ពីយប់​ថ្ងៃ​សៅរ៍ ទី១ ឧសភា ២០១០។ ឡាន​ផ្ទុក​គ្រឿងផ្ទុះ​មួយ​ត្រូវបាន​គេ​រក​ឃើញ ដោយ​មាន​នាឡិកា​កំណត់​ពេលផ្ទុះ​ភ្ជាប់​ជាមួយ​ផង។ 

ឡានផ្ទុក​គ្រឿងផ្ទុះ ត្រូវបានគេរកឃើញ នៅចំកណ្តាលទីប្រជុំជន ក្រុងញូយ៉ក ត្រង់​កន្លែង​ដែល​អ៊ូអរ​បំផុត ជាពិសេស ​សម្បូរ​ទៅដោយ​ទេសចរ និង​អ្នក​ទៅដើរ​កំសាន្ត នៅរាត្រី​ថ្ងៃ​សៅរ៍។

ប៉ូលិស​បាន​ជម្លៀស​ប្រជាជន​ចេញ​ពី​កន្លែងកើតហេតុ មុននឹង​​ក្រុមអ្នកជំនាញខាង​គ្រឿងផ្ទុះ​ចូល​ទៅ​​ដោះគ្រាប់ចេញ​ពី​ឡាន។

យោងតាម​អភិបាល​ក្រុង​ និង​ប៉ូលិស​ក្រុងញូយ៉ក ឡាន​នោះ ពិតជាត្រូវ​គេ​ដាក់បង្កៃ ប៉ុនប៉ង​បំផ្ទុះមែន ក៏ប៉ុន្តែ អ្នកណា​ជាអ្នកធ្វើ ហើយធ្វើ​ក្នុង​គោលដៅអ្វី គេ​នៅមិនទាន់ដឹង​ច្បាស់​នៅឡើយទេ។ គេ​គ្រាន់តែ​ដឹង​ថា គ្រឿងផ្ទុះ ដែល​បង្កៃ​ក្នុងឡាន​នោះ គឺ​ជា​គ្រឿងផ្ទុះ​ធ្វើ​អាយ​តែប៉ុណ្ណោះ។

ប៉ូលិស​បាន​ឲ្យ​ដឹង​ថា តាមការពិត នាឡិកាកំណត់​ពេល​បាន​ដើរ​ដល់​ម៉ោង​ត្រូវកំណត់​ឲ្យ​ផ្ទុះ​ទៅហើយ ក៏ប៉ុន្តែ​ សំណាងល្អ ឈ្នួន​បំផ្ទុះ​មិន​ដំណើរការ​ល្អ ទើប​ឡាន​នេះ​មិន​ផ្ទុះ។

យោងតាម​អ្នកជំនាញ​ខាង​ភេរវកម្ម ការ​ប៉ុនប៉ង​វាយប្រហារ​ នៅ​ញូយ៉ក កាល​ពី​ថ្ងៃ​សៅរ៍នេះ គឺ​ជា​អំពើភេរវកម្ម​ដ៏ធំមួយ ក៏ប៉ុន្តែ ពេលនេះ វា​នៅឆាប់​ពេក ដែល​គេ​អាច​កំណត់​បាន​ថា តើ​វាជាអំពើ​របស់​បុគ្គល ឬ​ក៏​របស់​ក្រុមណាមួយ។ វាអាចជា​អំពើ​របស់​អង្គការ​ភេរវកម្ម​អន្តរជាតិ ដូចជា អាល់កៃដា។ វាក៏អាច​ជា​អំពើ​របស់​បុគ្គល ឬ​ក្រុមណាមួយ នៅ​ក្នុង​សហរដ្ឋអាមេរិក ហើយ​ដែល​មិនមាន​ជាប់ពាក់ព័ន្ធ​អ្វី​ទាំងអស់​នឹង​ក្រុម​អ៊ីស្លាម​ជ្រុលនិយម។

គួរ​បញ្ជាក់ថា ចាប់​តាំង​ពី​ភេរវកម្ម ១១ កញ្ញា ២០០១​មក ប៉ូលិស​ក្រុងញូយ៉ក ស្ថិតក្នុង​ភាព​ប្រុងប្រយ័ត្ន​ជាប់​ជានិច្ច ដើម្បី​បង្ការ​ការវាយប្រហារ​ថ្មីណាមួយទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ