អាមេរិក-គុយបា

កិច្ចសន្ទនា​រវាង​អាមេរិក និង​គុយបា​កំពុង​ចម្រើន​ទៅ​មុខ តែ​ក៏​នៅ​មាន​ឧបសគ្គ​ជា​ច្រើន

លោកស្រី​អនុរដ្ឋមន្រ្តីការបរទេស​អាមេរិក Roberta Jacobson ទទួល​បន្ទុក​សំណុំរឿង​អាមេរិកឡាទីន
លោកស្រី​អនុរដ្ឋមន្រ្តីការបរទេស​អាមេរិក Roberta Jacobson ទទួល​បន្ទុក​សំណុំរឿង​អាមេរិកឡាទីន AFP PHOTO/ BRENDAN SMIALOWSKI

សហរដ្ឋអាមេរិក​បាន​ប្រកាស​ឲ្យ​ដឹង​ពី​គម្រោង​បើក​ស្ថានទូត​របស់​ខ្លួន​ឡើង​វិញ​នៅ​ក្នុង​ប្រទេស​គុយបា​នៅ​ខែ​មេសា​ខាង​មុខ។ ដំណឹង​នេះ​ត្រូវ​បាន​បង្ហើប​ឲ្យ​ដឹង​នៅ​ក្នុង​កិច្ចចរចា​ដំណាក់កាល​ទី២​រវាង​ក្រុម​អ្នកតំណាង​អាមេរិក និង​ក្រុមអ្នកតំណាង​គុយបា​ក្នុង​ទីក្រុង​វ៉ាស៊ីតោន​កាល​ពី​ថ្ងៃ​សុក្រ ទី២៧ កុម្ភៈ។ ភាគី​ទំាង​ពីរ​បាន​សាទរ​ដោយ​បាន​ចាត់​ទុក​កិច្ចចរចា​នោះ​ថា មាន​លក្ខណៈ​ស្ថាបនា តែ​បាន​យល់​ស្រប​គ្នា​ថា នៅ​មាន​ឧបសគ្គ​ជា​ច្រើន​ទៀត​ដែល​ត្រូវ​ដោះស្រាយ មុន​នឹង​អាច​មាន​ទំនាក់ទំនង​ជា​ប្រក្រតី ១០០% ឡើង​វិញ​រវាង​គ្នា។

ផ្សាយពាណិជ្ជកម្ម

កិច្ចចរចា​រវាង​អាមេរិក គុយបា​នៅ​ក្នុង​ទីក្រុង​វ៉ាស៊ីនតោន​នា​ថ្ងៃ​សុក្រ ទី២៧ កុម្ភៈ គឺ​ជា​កិច្ចចរចា​ដំណាក់កាល​ទី២ បន្ទាប់​ពី​កិច្ចចរចា​ដំណាក់កាលទី១ នៅ​ក្នុង​ទីក្រុង​ឡាហាវ៉ាន ប្រទេស​គុយបា​កាល​ពី​ដំណាច់​ខែ​មករា​កន្លង​ទៅ។ នៅ​ក្នុង​កិច្ចចរចា​ដំណាក់កាលទី២ ត្រូវ​បាន​លោកស្រី​អនុរដ្ឋមន្រ្តី​ការបរទេស​អាមេរិក Roberta Jacobson ទទួល​បន្ទុក​សំណុំរឿង​អាមេរិកឡាទីន​អះអាង​ថា មាន​ការ​ចម្រើន​ទៅ​មុខ​គួរ​ឲ្យ​កត់សម្គាល់ ព្រម​ទំាង​ចាត់​ទុក​ជា​កិច្ចចរចា​មួយ​ដែល​មាន​លក្ខណៈ​ស្ថាបនា និង​មាន​សេចក្តីក្លាហាន។ រីឯ​លោកស្រី Josefina Vidal នាយកា​ការិយាល័យ​ទទួល​បន្ទុក​សំណុំរឿង​អាមេរិក-គុយបា​នៅ​ក្រសួងការបទេស​អាមេរិក​ក៏​បាន​ប្រើ​ពាក្យ​ដូច​គ្នា​ដែរ ព្រម​ទំាង​បន្ថែម​ថា ភាគី​នីមួយៗ​មាន​អាទិភាព​រៀងៗ​ខ្លួន។

សម្រាប់​អាមេរិក អាទិភាព​របស់​ទីក្រុង​វ៉ាស៊ីនតោន​គឺ​ចង់​បើក​ស្ថានទូត​របស់​ខ្លួន​នៅ​គុយបា​ឲ្យ​ចំ​ពេល​រៀបចំ​ជំនួបកំពូល​លើកទី៧ នៃ​បណ្តា​ប្រមុខរដ្ឋ​ទំាង ៣៤ ប្រទេស​ក្នុង​ទ្វីបអាមេរិក​ដែល​គ្រោង​ធ្វើ​នៅ​ក្នុង​ខែ​មេសា​នៅ​ប្រទេស​ប៉ាណាម៉ា។ នៅ​ក្នុង​ជំនួបកំពូល​លើកទី៧​ឆ្នំា​នេះ លោក​ប្រមុខរដ្ឋ​គុយបា Raul Castro នឹង​ត្រូវ​ចូល​រួម​ជា​លើក​ទី១ និង​ដែល​គេ​មើល​ឃើញ​ថា ជា​ឱកាស​ដ៏​ល្អ​មួយ​នៃ​ជំនួប​រវាង​លោក​ប្រធានាធិបតី​គុយបា Raul Castro និង​លោក​ប្រធានាធិបតី​អាមេរិ​បារ៉ាក់ អូបាម៉ា។ ចំណែក​អាទិភាព​របស់​គុយបា​វិញ គឺ​ចង់​ឲ្យ​អាមេរិក​លុប​ឈ្មោះ​គុយបា​ចេញ​ពី​ប្រទេស​ដែល​គំាទ្រ​ភេរវនិយម។ សម្រាប់​ទីក្រុង​ឡាហាវ៉ាន គ្មាន​ហេតុផល​ណា​មួយ​ដែល​វ៉ាស៊ីនតោន​បន្ត​ទុក​ឈ្មោះ​គុយបា​ជា​ប្រទេស​គំាទ្រ​ភេរវនិយម​តំាង​ពី​ឆ្នំា ១៩៨២ នោះ​ទេ។

តែ​លោក​ប្រមុខ​ការទូត​អាមេរិក​ចន ឃ៊ែរី​បាន​ឆ្លើយ​ពន្យល់​ថា ការ​ដក​ឈ្មោះ​គុយបា​ចេញ​ពី​ប្រទេស​គំាទ្រ​ភេរវនិយម​មិន​មាន​ជាប់​ពាក់​ព័ន្ធ​នឹង​កិច្ចចរចា​បច្ចុប្បន្ន​នេះ​ទេ និង​ថា រឿង​នោះ​ត្រូវ​តែ​មាន​ការ​បោះឆ្នោត​យល់ព្រម​ពី​សភា​អាមេរិកំាង។ យ៉ាង​ណា​ក៏​ដោយ លោកស្រី Josefina Vidal បាន​យល់​ឃើញ​ថា ទោះបី​ជា​រឿងដក ឬ​មិនដក​គុយបា​ចេញ​ពី​ប្រទេស​គំាទ្រ​ភេរវនិយម​មិនមែន​ជា​លក្ខខ័ណ្ឌ​ក្នុង​ការ​បើក​ស្ថាទូត​អាមេរិក​ឡើង​វិញ​នៅ​គុយបា​ក៏​ដោយ ក៏​នេះ អាច​ជា​ឧបសគ្គ​មួយ​ដែល​នំា​ឲ្យ​មាន​ការ​លំបាក​ក្នុង​ការ​ស្វែង​រក​ទំនាក់ទំនង​ប្រក្រតី ១០០% ឡើង​វិញ​រវាង​អាមេរិក និង​គុយបា​ដែរ។ នេះ​ដោយ​មិន​បាន​រាប់បញ្ចូល​នូវ​សំណុំរឿង​រសើប​មួយ​ចំនួន​ទៀត ដូច​យ៉ាង​ការ​លើក​ទ័ណ្ឌកម្ម​សេដ្ឋកិច្ច​ចេញ​ពី​គុយបា​ដែល​អាមេរិក​បាន​ដាក់​តំាង​ពី​ជាង​កន្លះ​សតវត្ស​កន្លង​មក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI