អានតួអត្ថបទ
អាមេរិក-អ៊ីរ៉ង់-យេម៉ែន

លោកចន ឃ៊ែរី៖បញ្ហា​យេម៉ែន​នឹង​មិន​បង្ក​ឧបសគ្គ​ដល់​សំណុំរឿង​នុយក្លេអ៊ែរ​អ៊ីរ៉ង់​ទេ

លោកចន ឃ៊ែរី៖បញ្ហា​យេម៉ែន​នឹង​មិន​បង្ក​ឧបសគ្គ​ដល់​សំណុំរឿង​នុយក្លេអ៊ែរ​អ៊ីរ៉ង់​ទេ
លោកចន ឃ៊ែរី៖បញ្ហា​យេម៉ែន​នឹង​មិន​បង្ក​ឧបសគ្គ​ដល់​សំណុំរឿង​នុយក្លេអ៊ែរ​អ៊ីរ៉ង់​ទេ REUTERS/Brendan Smialowski
១៥ នាទី

សហរដ្ឋអាមេរិក​បាន​បញ្ជាក់​ជា​ផ្លូវការ​ពី​ការ​ផ្តល់​ជំនួយបច្ចេកទេស​ដល់​ប្រទេស​អារ៉ាប៊ីសាអូឌីត​នៅ​ក្នុង​យុទ្ធនាការ​វាយប្រហារ​ផ្លូវអាកាស​ប្រឆំាង​ក្រុម​ឧទ្ទាម​ហ៊ូទី្ស​ក្នង​ប្រទេស​យេម៉ែន។ លោក​ប្រមុខ​ការទូត​អាមេរិ​ចន ឃ៊ែរី​ដែល​កំពុង​ស្ថិត​ក្នុង​ទីក្រុង​ឡូសាន ប្រទេស​ស្វ៊ីស​ដើម្បី​បន្ត​កិច្ចចរចា​រឿង​នុយក្លេអ៊ែរ​អ៊ីរ៉ង់​ក៏​បាន​លើក​យក​បញ្ហា​យេម៉ែន​ទៅ​និយាយ​ជា​មួយ​សមភាគី​អ៊ីរ៉ង់​ដែរ។ ក្រសួង​ការបរទេស​អាមេរិក​បាន​បញ្ជាក់​ថា សំណុំរឿង​យេម៉ែន និង​ការ​ទម្លាក់​គ្រាប់បែក​ប្រឆំាង​ពួក​ហ៊ូទី្ស​និកាយ​ឈីអ៊ីត​គំាទ្រ​ដោយ​ប្រទេស​អ៊ីរ៉ង់​នឹង​មិន​ធ្វើ​ឲ្យ​ប៉ះពាល់​ដល់​ដំណើរការ​ចរចា​នុយក្លេអ៊ែរ​អ៊ីរ៉ង់​ទេ។

ផ្សាយពាណិជ្ជកម្ម

គឺ​នៅ​ថ្ងៃ​សុក្រ ទី២៧ មីនា​នេះ​ឯង​ដែល​កិច្ចចរចា ៥ភាគី​បូក១ ស្តីពី​រឿង​នុយក្លេអ៊ែរ​អ៊ីរ៉ង់​បាន​ចាប់​ផ្តើម​ជា​ថ្មី​នៅ​ក្នុង​ទីក្រុង​ឡូសាន ប្រទេស​ស្វ៊ីស។ តែ​សំណួរ​ដែល​បាន និង​កំពុង​ចោទ​ឡើង​ពេល​នេះ​គឺ​ថា តើ​ការ​ចូលរួម​របស់​អាមេរិក​ជាមួយ​សម្ព័ន្ធមិត្ត​អារ៉ាប៊ីសាអូឌីត​ដើម្បី​ប្រឆំាង​នឹង​ពួក​ឧទ្ទាម​ហ៊ូទី្ស​និកាយ​ឈីអ៊ីត​ក្នុង​ប្រទេស​យេម៉ែន​ពេល​នេះ​មិន​ចូល​ទៅ​បំពុល​បរិយាកាស​នៃ​ការ​ចរចា​ស្តីពី​សំណុំរឿង​នុយក្លេអ៊ែរ​អ៊ីរ៉ង់​ទេ ឬ​យ៉ាង​ណា?។ លោក​ប្រមុខ​ការទូត​អាមេរិក​ចន ឃ៊ែរី​ពិត​ជា​បាន​លើក​យក​បញ្ហា​យេម៉ែន​ទៅ​និយាយ​យ៉ាង​ខ្លី​ជាមួយ​សមភាគី​អ៊ីរ៉ង់។ តែ​អ្នកនំាពាក្យ​ក្រសួង​ការបរទេស​អាមេរិក​បាន​ថ្លែង​ច្បាស់ៗ​ថា ស្ថានការណ៍​នៅ​យេម៉ែន​នឹង​មិន​ជះ​ឥទ្ធិពល​អាក្រក់​អ្វី​ដល់​កិច្ចចរចា​នុយក្លេអ៊ែរ​អ៊ីរ៉ង់​នៅ​ពេល​នេះ​ទេ និង​គូសបញ្ជាក់​ថា រឿង​យេម៉ែន​មិនមែន​ជា​រឿង​គួរ​ឲ្យ​ចាប់​អារម្មណ៍​ឡើយ។

ក្រសួង​ការបរទេស​អាមេរិក​បាន​បកស្រាយ​បន្ថែម​ថា គ្មាន​ចំណង​ទាក់ទង​គ្នា​រវាង​សំណុំរឿង​យេម៉ែន និង​នុយក្លេរអ៊ែរ​អ៊ីរ៉ង់​ទេ។ តែ​បញ្ហា​នៅ​ត្រង់​ថា បច្ចុប្បន្នភាព​នៅ​យេម៉ែន​ពេល​នេះ​ត្រូវ​បាន​ភាគី​អ៊ីរ៉ង់​លើក​យក​ទៅ​ជជែក​នៅ​ក្នុង​កិច្ចចរចា​រវាង​អ៊ីរ៉ង់ និង​អាមរិក​ក្នុង​ទីក្រុង​ឡូសាន ព្រោះ​សម្រាប់​ទីក្រុង​តេហេរ៉ង់ ពួកឧទ្ទាម​ហ៊ូទី្ស​និកាយ​ឈីអ៊ីត​ដែល​កំពុង​ទទួល​រង​ការ​វាយប្រហារ​ផ្លូវអាកាស​ពី​អារ៉ាប៊ីសាអូឌីត គឺ​ជា​កូនជឹង​របស់​ខ្លួន។ នៅ​ក្នុង​ទីក្រុង​វ៉ាស៊ីនតោន​ឯណោះ រដ្ឋបាល​អាមេរិកំាង​បាន​ប្រាប់​ឲ្យ​ដឹង​លំអិត​បន្ថែម​ពី​ជំនួយបច្ចេកទេស​របស់​ខ្លួន​ចំពោះ​ប្រទេស​អារ៉ាប៊ីសាអូឌីត និង​ក្រុមប្រទេស​នៃ​ក្រុមប្រឹក្សា​សហប្រតិបត្តិការ​ឈូង​សមុទ្រ។

ជំនួយ​បច្ចេកទេស​ទំាង​នោះ​រួម​មាន ព័ត៌មានសម្ងាត់ និង​ផ្ទំាងស៊ីប​នានា​នៅ​ក្នុង​ដែនដី​យេម៉ែន ព្រម​ទំាង​ជំនួយ​ផ្នែក​ព័ស្តុភា។ ទន្ទឹម​គ្នា​នេះ ក្រសួង​ការពារជាតិ​អាមេរិក​ក៏​បាន​សន្យា​ផ្តល់​ឲ្យ​ក្រុមសម្ព័ន្ធមិត្ត​អារ៉ាប៊ីសាអូឌីត​នូវ​យន្តហោះបំពាក់​រ៉ាដា និង​យន្តហោះ​សម្រាប់​ចាក់សំាង​នៅ​លើ​ផ្ទៃអាកាស​ផង​ដែរ។ ខណៈ​នេះ ក្រុមការងារ​អាមរិក និង​សម្ព័ន្ធមិត្ត​កំពុង​ធ្វើការ​លើ​បញ្ហា​នេះ​នៅ​ក្រសួង​ការពារជាតិ​អាមេរិក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ