រុស្ស៊ី-អាមេរិក

ស.រ.អា.ចង់​ទិញ​ឧទ្ធម្ភាគចក្រ​រុស្ស៊ី​ថែមទៀត យក​ទៅ​បំពាក់​កងទ័ព​អាហ្វហ្កានីស្ថាន

ឧទ្ធម្ភាគចក្រ​រុស្ស៊ី
ឧទ្ធម្ភាគចក្រ​រុស្ស៊ី

ជា​ចម្លើយ ភាគី​រុស្ស៊ី រំពឹងថា គឺ​ទៅទល់ ចុង​ខែ​មិថុនា​នេះ​ទៅហើយ ដែល​នឹង​មាន ចុះ កិច្ចសន្យា​សមស្រប។ លើកនេះ ក្រសួង​ការពារ​ជាតិ​អាមេរិក គ្រោងទិញ​ពី​ក្រុមហ៊ុន​រដ្ឋ​រុស្ស៊ី ខាងលក់​អាវុធ​ទៅក្រៅ RosOboronExport គឺ ឧទ្ធម្ភាគចក្រ​រុស្ស៊ី​ធុនMi-17 ចំនួន​១០​គ្រឿងទៀត បន្ថែម​ទៅលើ ​២១គ្រឿង​ កាល​ពី​មុន។

ផ្សាយពាណិជ្ជកម្ម

 

គឺ ថ្ងៃពុធ​ម្សិលម៉្ងៃ ដែល​ក្រសួង​ការពារ​ជាតិ​អាមេរិក “មន្ទីរ​បញ្ចកោណ” បាន​ជូន​ជា ដំណឹង ទៅ​សភា​ស.រ.អា. អំពី​គម្រោង​ទិញ ឧទ្ធម្ភាគចក្រ​រុស្ស៊ី​ធុន Mi-17 ចំនួន​១០​គ្រឿង​ទៀត សម្រាប់​តម្រូវការ​នៃ ពួក​យោធា​អាហ្វហ្កានីស្ថាន។

ហើយ​ថ្ងៃ​នេះ តំណាង​ផ្លូវការ​នៃ ក្រុមហ៊ុន​រដ្ឋរុស្ស៊ី​ខាង​លក់​អាវុធ​ទៅ​ក្រៅ RosOboronExport លោក Vyacheslav Davidenko បាន​ប្រកាស​ឲ្យ​ដឹងថា ភាគី​រុស្ស៊ី​កំពុង​ពិភាក្សា​ជាមួយ តំណាង របស់“មន្ទីរ​បញ្ចកោណ” អំពី ល័ក្ខខ័ណ្ឌ​នៃ​អនាគត​កិច្ចសន្យា​ដែល គូ​ភាគី​គ្រោង​ចុះ​ឲ្យ​បាន ក្នុង ពេល​ឆាប់ៗ​ខាងមុខ ទៅ​ហើយ។

គួរ​និយាយថា ក្នុង​ឆ្នាំ​នេះ ក្រសួង​ការពារ​ជាតិ​អាមេរិក បាន​ធ្វើ​កុម៉្មង់​ទិញ​ពី​រុស្ស៊ី គឺ ឧទ្ធម្ភាគចក្រ ធុន Mi-17 ២គ្រឿង​ទៅ​ហើយ សម្រាប់​ប្រទេស​អាហ្វហ្កានីស្ថាន ដើម្បី​ប្រើ​វា​ជំនួស អា២គ្រឿង បែប​នេះ ដែល​បាន​ធ្លាក់​ឆេះ​ទៅ។ ដូច្នេះ បូក​ជា​មួយ​១០​គ្រឿង​លើក​នេះ គឺ​ឡើង​ដល់​១២​គ្រឿង ក្នុង​តម្លៃ​សរុប ២១៧​លាន​៧សែន​ដុល្លារ​អាមេរិក។

“មន្ទីរ​បញ្ចកោណ” បាន​ពន្យល់​បំភ្លឺ​អំពី​មូលហេតុ​ដែល​ជំរុញ​ឲ្យ​ទិញ ឧទ្ធម្ភាគចក្រ​រុស្ស៊ី Mi-17 ដ្បិត​ទី​១-វា​ថោក​ជាង​ឆ្ងាយ ពី​ឧទ្ធម្ភាគចក្រ​ប្រភេទ​ដូចគ្នា​នេះ​របស់​ក្រុមហ៊ុន​អាមេរិកាំង ហើយ ទី២- វា​ងាយ​ប្រើ​ជាង សម្រាប់​បង្វឹកបង្ហាត់ ពួក Pilotes អាហ្វហ្កាន ដែល​ទម្លាប់​បើកបរ ឧទ្ធម្ភាគចក្រ​រុស្ស៊ី តាំងពី ជំនាន់​សូវៀត​មក ,ទី៣- វាឆ្លើយ​ស្រប​នឹង​លក្ខណៈ​អាកាសធាតុ និង​ភូម៌សាស្ត្រ​ប្រទេស​អាហ្វហ្កានីស្ថាន តែម្តង។

ជា​ការ​រំលឹក កាល​ពី​ថ្ងៃ២៦​ឧសភាឆ្នាំ២០១១ ក្រសួង​ការពារ​ជាតិ​អាមេរិក បាន​ចុះ​កុងត្រា ដើម្បី ទិញ​ពី​ក្រុមហ៊ុន​រដ្ឋរុស្ស៊ី ខាងលក់​អាវុធ​ទៅក្រៅ RosOboronExport សម្រាប់​បំពេញ​ដល់ តម្រូវការ​កងទ័ព​អាហ្វហ្កានីស្ថាន គឺ​ឧទ្ធម្ភាគចក្រ​រុស្ស៊ីធុន Mi-17 ចំនួន​២១​គ្រឿង ក្នុង​តម្លៃ​សរុប ៣៧៥​លាន​ដុល្លារ ហើយ​ពី ក្នុងនោះ មកទល់​ឥឡូវ ភាគី​រុស្ស៊ី​បានបញ្ជូន ទៅឲ្យ អាហ្វហ្កានីស្ថាន​ផ្ទាល់ គឺ​១៨​គ្រឿង ទៅហើយ ចំណែក​៣​គ្រឿង​ដែល​នៅសល់ នឹង​ត្រូវ​ប្រគល់ ទៅ​ឲ្យ​ទីក្រុង Kaboul គឺ​ទៅ​ទល់ចុង ខែ​មិថុនា​នេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI