អានតួអត្ថបទ
កូរ៉េខាងជើង

Amnesty International ផ្សព្វផ្សាយ​រូបភាព​ជំរំ​លត់ដំ​ការងារ​លើ​អ្នកទោស​កូរ៉េខាងជើង

Amnesty International ផ្សព្វផ្សាយ​រូបភាព​ជំរំ​លត់ដំ​ការងារ​លើ​អ្នកទោស​កូរ៉េខាងជើង
Amnesty International ផ្សព្វផ្សាយ​រូបភាព​ជំរំ​លត់ដំ​ការងារ​លើ​អ្នកទោស​កូរ៉េខាងជើង DR
1 នាទី

នៅ​ថ្ងៃ​ព្រហស្បតិ៍ ទី៥ ធ្នូ​នេះ អង្គការ​ការពារសិទ្ធិមនុស្ស​អន្តរជាតិ Amnesty International បាន​ផ្សព្វផ្សាយ​នូវ​រូបភាព​ថ្មី​ផ្តល់​ដោយ​ផ្កាយរណប​ដែល​បង្ហាញ​ពី​វត្តមាន​ជំរំលត់ដំ​អ្នកទោស​នៅ​ក្នុង​ទឹកដី​កូរ៉េខាងជើង។ តែ​របប​ក្រុង​ព្យុងយ៉ាង​បាន​បដិសេធ និង​ចាត់​ទុក​រូបភាព​ផ្សព្វផ្សាយ​ដោយ Amnesty International ថា ជា​រូបភាព​មិន​ពិត។

ផ្សាយពាណិជ្ជកម្ម

 

រដ្ឋអំណាច​កូរ៉េខាងជើង​បាន​បញ្ជាក់​ថា ខ្លួន​គ្មាន​ជំរំលត់ដំការងារ​សម្រាប់​អ្នកទោសនយោបាយ​ទេ។ តែ​បើ​យោង​តាម​ការ​អះអាង​របស់​អង្គការ​ឯករាជ្យ​មួយ​ចំនួន​ឲ្យ​ដឹង​ថា មាន​អ្នកទោស​ពី ១០០ ០០០ ទៅ ២០០ ០០០នាក់​កំពុង​ជាប់​ឃុំឃំាង​នៅ​ក្នុង​លក្ខខណ្ឌ​យ៉ាង​វេទនា​ជា​ទីបំផុត។ រូបភាព​ថ្មី​ចុង​ក្រោយ​ដែល​បង្ហាញ​ជំរំលេខ ១៥ និង​លេខ ១៦ ត្រូវ​បាន​ប្រព័ន្ធ​ផ្កាយរណប​ថត​បាន​ក្នុង​ចន្លោះ​ឆ្នំា ២០១១ និង ២០១៣។ ជំរំ​លេខ ១៦ ដែល​លាតសន្ធឹង​លើ​ផ្ទៃដី​ចំនួន ៥៦០គីឡូម៉ែត្រក្រឡា​សម្រាប់​ដាក់​អ្នកទោស ២០ ០០០នាក់​នោះ បាន​បង្ហាញ​នូវ​វត្តមាន​លំនៅដ្ឋាន​ថ្មីៗ​បន្ថែម​ទៀត។ យោង​តាម Amnesty International វត្តមាន​លំនៅដ្ឋាន​ថ្មីៗ​ទំាង​នោះ​ត្រូវ​បាន​រដ្ឋអំណាច​ធ្វើ​ជា​ជំរំ​លត់ដំ​ការងារ​សម្រាប់​អ្នកទោស ពិសេស ការងារ​ក្នុង​ការ​ធ្វើ​អាជីវកម្ម​រ៉ែធ្យូងថ្ម ឬមួយ​ក៏​ផ្នែក​កសិកម្ម​ជា​ដើម។

និយាយ​ពី​ជំរំ​លេខ ១៥ ដែល​លាតសន្ធឹង​លើ​ផ្ទៃដី​ចំនួន ៣៧០​គីឡូម៉ែត្រក្រឡា និង​មាន​ចម្ងាយ​ប្រមាណ​ជា ១២០គីឡូម៉ែត្រ​ពី​ទីក្រុង​ព្យុងយ៉ាង រូបភាព​ផ្កាយរណប​ថ្មី​បាន​បញ្ជាក់​ថា មាន​អគារ​ជិត ៤០ សម្រាប់​ឲ្យ​រស់នៅ​ត្រូវ​បាន​គេ​រំលំចោល​តំាង​ពី​ឆ្នំា ២០១១។ ដោយឡែក និង​ក្រៅ​ពី​រូបភាពថ្មី​ផ្តល់​ដោយ​ផ្កាយរណប Amnesty International ក៏​បាន​ផ្សព្វផ្សាយ​នូវ​សម្តី​របស់​សាក្សី​មួយ​ចំនួន​ដែល​ជា​អតីត​អ្នក​ទទួល​ខុស​ត្រូវ​នៅ​ក្នុង​ជំរំ​ទំាង​នោះ។ លោក​លី​ដែល​ជា​អតីត​អ្នកទទួល​ខុសត្រូវ​ផ្នែកសន្តិសុខ​ជំរំ​លេខ ១៦ ក្នុង​ទសវត្ស​ឆ្នំា ៨០ និង​បន្ត​រហូត​ដល់​ពាក់​កណ្តាល​ទសវត្ស​ឆ្នំា ៩០​បាន​បញ្ជាក់​ថា មាន​អ្នកទោស​ជា​ច្រើន​ត្រូវ​បាន​គេ​បង្ខំ​ឲ្យ​ជីករណ្តៅ​សម្រាប់​កប់​ខ្លួន​ឯង មុន​នឹង​គេ​វាយ​សម្លាប់​ដោយ​ញញួរ​ចំ​កញ្ចឹង ក។ សាក្សី​ផ្សេង​ទៀត​បាន​អះអាង​ថា មាន​អ្នកទោស​ខ្លះ​ត្រូវ​បាន​គេ​ច្របាច់ ក រួម​សម្លាប់​ចោល​តែ​ម្តង។ ចំណែក​ស្រ្តីៗ​វិញ ត្រូវ​បាន​ក្រុម​បុគ្គលិក​គុក​ចាប់​រំលោភ រួច​សម្លាប់​ចោល​បំបិទ​ភស្តុតាង។

គួរ​ជម្រាប​ជូន​ថា គណកម្មាធិការ​ស៊ើបអង្កេត​របស់​អង្គការសហប្រជាជាតិ​ស្តីពី​ការ​រំលោភ​សិទ្ធិមនុស្ស​នៅ​កូរ៉េខាងជើង​នឹង​បង្ហាញ​របាយការណ៍​ចុងក្រោយ​របស់​ខ្លួន​ទៅ​កាន់​ក្រុមប្រឹក្សា​សិទ្ធិមនុស្ស​របស់​​អង្គការ​សហប្រជាជាតិ​នៅ​ខែ​មីនា ឆ្នំា ២០១៤។ នេះ​ជា​លើក​ទីមួយ​ដែល​​អង្គការសហប្រជាជាតិ​បាន​បង្កើត​ឲ្យ​មាន​គណកម្មាធិការ​មួយ​សម្រាប់​ស៊ើបអង្កេត​ការ​រំលោភ​សិទ្ធិមនុស្ស​នៅ​កូរ៉េខាងជើង។ កូរ៉េខាងជើង​បាន​បដិសេធ​មិន​ទទួល​ស្គាល់​គណកម្មាធិការ​នេះ និង​មិន​យល់ព្រម​បើក​ផ្លូវ​ឲ្យ​ចូល​ស៊ើបអង្កេត​ក្នុង​ទឹកដី​របស់​ខ្លួន​ឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ