សម្ព័ន្ធអារ៉ាប់ព្រមានយកសំណុំរឿងស៊ីរីទៅក្រុមប្រឹក្សាសន្តិសុខអ.ស.ប.
ចុះផ្សាយនៅថ្ងៃ៖
កាលពីថ្ងៃសៅរ៍ ម្សិលមិញនេះ នាយករដ្ឋមន្រ្តីនៃប្រទេសកាតា បានប្រកាសថា សម្ព័ន្ធអារ៉ាប់នឹងបញ្ជូនសំណុំរឿងស៊ីរី ទៅឲ្យក្រុមប្រឹក្សាសន្តិសុខអ.ស.ប. ប្រសិនបើរដ្ឋាភិបាលស៊ីរី នៅតែចចេសមិនទទួលយកក្រុមអ្នកសង្កេតការណ៍អារ៉ាប់។ ការព្រមាននេះត្រូវបានធ្វើឡើង ក្រោយពីរុស្ស៊ីបានរៀបចំបញ្ជូនសេចក្តីព្រាងសេចក្តីសម្រេចមួយ ទៅឲ្យក្រុមប្រឹក្សាសន្តិសុខ ដើម្បីថ្កោលទោសអំពើហិង្សានៅស៊ីរី។
អស់រយៈពេលប្រមាណជាង ១ខែ មកហើយ ដែលសម្ព័ន្ធអារ៉ាប់រង់ចាំការព្រមព្រៀងរបស់អាជ្ញាធរស៊ីរី ដើម្បីបញ្ជូនអ្នកសង្កេតការណ៍ឯករាជ្យស៊ីរី ព្រមទាំងវិធានការផ្សេងទៀត ដើម្បីបញ្ចប់អំពើហិង្សានៅស៊ីរី។
នៅក្នុងកិច្ចប្រជុំ នៅប្រទេសកាតា កាលពីថ្ងៃសៅរ៍ ម្សិលមិញនេះ គណៈកម្មាធិការមួយរបស់សម្ព័ន្ធអារ៉ាប់បានស្នើថា សម្ព័ន្ធអារ៉ាប់គួរតែបញ្ជូនសំណុំរឿងស៊ីរីទៅឲ្យក្រុមប្រឹក្សាសន្តិសុខវិញ។ ថ្លែងក្រោយកិច្ចប្រជុំនេះ នាយករដ្ឋមន្រ្តីកាតា ដែលជាសមាជិកដ៏មានឥទ្ធិពលក្នុងសម្ព័ន្ធអារ៉ាប់ បានចោទរដ្ឋាភិបាលស៊ីរីថាមានចេតនាពន្យារពេល មិនចង់ទទួលយកអ្នកសង្កេតការណ៍អារ៉ាប់។ លោកក៏បានថ្លែងផងដែរថា សម្ព័ន្ធអារ៉ាប់ហាក់ដូចជាលែងមានសង្ឃឹមថានឹងអាចរកដំណោះស្រាយវិបត្តិស៊ីរីបានទៀតហើយ។
សំណើប្តឹងក្រុមប្រឹក្សាសន្តិសុខនេះ នឹងត្រូវលើកយកមកជជែកគ្នា នៅក្នុងកិច្ចប្រជុំថ្នាក់រដ្ឋមន្រ្តីការបរទេសសម្ព័ន្ធអារ៉ាប់ នៅថ្ងៃពុធ សប្តាហ៍ក្រោយនេះ។
បើតាមនាយករដ្ឋមន្រ្តីកាតា សម្ព័ន្ធអារ៉ាប់ចង់បញ្ជូនសំណុំរឿងស៊ីរី ទៅក្រុមប្រឹក្សាសន្តិសុខឲ្យបានឆាប់។ គោលដៅ គឺចង់ឲ្យក្រុមប្រឹក្សាសន្តិសុខអនុម័តសេចក្តីសម្រេចមួយ ដែលចេញពីគំនិតផ្តួចផ្តើមរបស់សម្ព័ន្ធអារ៉ាប់ ជាជាងចេញពីគំនិតផ្តួចផ្តើមរបស់ប្រទេសផ្សេង។
គួររំឭកថា កាលពីថ្ងៃសុក្រ រុស្ស៊ីបានធ្វើឲ្យគេគ្រប់គ្នាភ្ញាក់ផ្អើល ដោយបានប្រកាសថា រុស្ស៊ីនឹងដាក់ស្នើនូវសេចក្តីព្រាងសេចក្តីសម្រេចមួយ ទៅឲ្យក្រុមប្រឹក្សាសន្តិសុខ ដើម្បីធ្វើការថ្កោលទោសអំពើហិង្សានៅស៊ីរី។ សមាជិកក្រុមប្រឹក្សាសន្តិសុខ គ្រោងនឹងលើកយកសេចក្តីព្រាងនេះមកជជែកគ្នា នៅសប្តាហ៍ក្រោយ។
គួរបញ្ជាក់ថា ស៊ីរី គឺជាសមាជិកសម្ព័ន្ធអារ៉ាប់ ក៏ប៉ុន្តែ សមាជិកភាពរបស់ស៊ីរី ត្រូវបានសម្ព័ន្ធអារ៉ាប់សម្រេចព្យួរជាបណ្តោះអាសន្ន ក្រោយពីរដ្ឋាភិបាលរបស់លោកបាស្ហា អាល់អាសាដ បានប្រើកម្លាំងបង្រ្កាបក្រុមប្រឆាំង បណ្តាលឲ្យជនស៊ីវិលរាប់ពាន់នាក់បាត់បង់ជីវិត។ សម្ព័ន្ធអារ៉ាប់ក៏បានសម្រេចដាក់ទណ្ឌកម្មលើរដ្ឋាភិបាលស៊ីរីផងដែរ ក្រោយពីស៊ីរីមិនព្រមឆ្លើយតបទៅនឹងសំណើបញ្ជូនអ្នកសង្កេតការណ៍អារ៉ាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ