អានតួអត្ថបទ
អាស៊ាន-ចិន

អាស៊ាន​ទទូចឲ្យ​ចិន​បើក​កិច្ចចរចា​បញ្ចប់​ភាពតានតឹង​នៅ​សមុទ្រ​ចិន​ខាងត្បូង

មេដឹកនាំ​ប្រទេស​ទាំង ១០ របស់​អាស៊ាន នៅ​ក្នុង​ជំនួបកំពូល នៅ​ព្រុយណេ
មេដឹកនាំ​ប្រទេស​ទាំង ១០ របស់​អាស៊ាន នៅ​ក្នុង​ជំនួបកំពូល នៅ​ព្រុយណេ REUTERS/Bazuki Muhammad
ដោយ៖ សេង ឌីណា
១៨ នាទី

នៅ​ក្នុង​ការបិទបញ្ចប់​កិច្ចប្រជុំកំពូល នៅ​ប្រទេស​ព្រុយណេ នៅ​ថ្ងៃ​ព្រហស្បតិ៍​នេះ ប្រមុខដឹកនាំ​ប្រទេស​ទាំង ១០ ជា​សមាជិក​អាស៊ាន បាន​ទទូច​ចង់​បើក​កិច្ចចរចា​ជាបន្ទាន់​ជាមួយ​ចិន ដើម្បី​រកវិធី​ធ្វើ​យ៉ាងណា កុំ​ឲ្យ​ភាពតានតឹង​នៅ​សមុទ្រ​ចិន​ខាងត្បូង នៅ​ក្នុង​ពេល​បច្ចុប្បន្ន​នេះ រាលដាល​បង្ក​ជា​ការ​ប៉ះទង្គិចគ្នា​ដោយ​អំពើ​ហិង្សា។ នេះ​បើ​តាម​ការអះអាង​របស់​ស៊ុលតង់​ព្រុយណេ ដែល​ជា​ប្រធាន​ផ្លាស់វេន​របស់​អាស៊ាន និង​ជា​ប្រទេស​មួយ ក្នុង​ចំណោម​ប្រទេស​អាស៊ាន ដែល​ជាប់ជម្លោះ​ជាមួយ​ចិន ក្នុង​សមុទ្រ​ចិន​ខាង​ត្បូង។

ផ្សាយពាណិជ្ជកម្ម

នៅ​ក្នុង​សេចក្តីថ្លែងការណ៍ ក្រោយ​បិទជំនួបកំពូល​ថ្ងៃ​ព្រហស្បតិ៍​នេះ អាស៊ាន​បាន​ធ្វើការ​សង្កត់ធ្ងន់​ទៅលើ​សារៈសំខាន់​នៃ​សន្តិភាព ស្ថិរភាព និង​សន្តិសុខ​ផ្លូវសមុទ្រ នៅ​ក្នុង​តំបន់។

ចំណែក​ស៊ុលតង់​ព្រុយណេ ដែល​ជា​ម្ចាស់ផ្ទះ​រៀបចំ​ជំនួបកំពូល បាន​ថ្លែង​ប្រាប់​អ្នក​សារព័ត៌មាន នៅ​ក្រោយ​បិទ​ជំនួបកំពូល​ថា ថ្នាក់ដឹកនាំ​អាស៊ាន​ចង់​ឲ្យ​មាន​ការ​ចរចា​​ជា​បន្ទាន់ ជាមួយ​ចិន ដើម្បី​ឈាន​ទៅ​​បង្កើត​ជា​ក្រមប្រតិបត្តិ​​សមុទ្រ​ចិន​ខាង​ត្បូង​ ក្នុង​គោលដៅ​បញ្ចប់​ភាពតានតឹង នៅ​ក្នុង​ជម្លោះ​នៅ​សមុទ្រ​ចិន​ខាង​ត្បូង ដែល​ជា​តំបន់​ជា​យុទ្ធសាស្រ្ត ដ៏​មាន​សារៈសំខាន់ ទាំង​នៅ​ក្នុង​តំបន់​អាស៊ាន ក៏​ដូចជា នៅ​ក្នុង​តំបន់​អាស៊ីប៉ាស៊ីហ្វិក​ទាំងមូល។

ជំនួបកំពូល​អាស៊ាន ដែល​គ្រោង​ផ្តោត​ជា​សំខាន់​ជាងគេ ទៅលើ​ការ​បង្កើត​សហគមន៍​អាស៊ាន នៅ​ឆ្នាំ​២០១៥ ត្រូវ​បាន​គ្របដណ្តប់​ទៅ​ដោយ​សំណុំរឿង​សមុទ្រ​ចិន​ខាង​ត្បូង ដែល​ជា​សំណុំរឿង​ដ៏​ក្តៅគគុក​មួយ ដោយសារ​តែ​បណ្តា​ប្រទេស​អាស៊ាន ដែល​ជាប់ជម្លោះ​ជាមួយ​ចិន កំពុង​តែ​មាន​ការ​បារម្ភ​ អំពី​យុទ្ធសាស្រ្ត​របស់​ចិន ដែល​កំពុង​តែ​បង្កើន​កម្លាំង វាតទី កាន់តែ​ខ្លាំង នៅ​ក្នុង​តំបន់​ជម្លោះនេះ។

គួរ​បញ្ជាក់ថា នៅ​ក្នុង​ចំណោម​ប្រទេស​ទាំង ១០ ​ជាសមាជិក​​អាស៊ាន មាន​ប្រទេស ៤ ដែល​ជាប់ជម្លោះ ជាមួយ​ចិន ក្នុង​សមុទ្រ​ចិន​ខាង​ត្បូង ក្នុងនោះ ក្រៅ​ពី​ព្រុយណេ ដែល​ជា​ប្រធាន​ផ្លាស់វេន​របស់​អាស៊ាន សម្រាប់​ឆ្នាំ​២០១៣​នេះ នៅ​មាន​ប្រទេស ៣ទៀត គឺ​ម៉ាឡេស៊ី ហ្វីលីពីន និង​វៀតណាម។ ជាទូទៅ ប្រទេស​ទាំង ៤នេះ តែងតែ​ទាមទារ​ឲ្យ​​ដោះស្រាយ​ជម្លោះសមុទ្រ​ចិន​ខាង​ត្បូង តាមរយៈ​កិច្ចចរចា ក្នុង​ក្របខ័ណ្ឌ​អាស៊ាន-ចិន។ ចំណែក​ចិនវិញ ទាមទារ​ចង់​ចរចា​ជាមួយ​ប្រទេស​ជាប់ជម្លោះនីមួយៗ ដាច់ដោយឡែក​ពី​គ្នា។

ជម្លោះ​សមុទ្រ​ចិន​ខាង​ត្បូង​កំពុង​តែ​ក្លាយ​ជា​សំណុំរឿង​ដ៏​ចម្រូងចម្រាស ដែល​កំពុង​តែធ្វើ​ឲ្យ​អាស៊ាន​ត្រូវ​ប្រឈមមុខ​នឹង​ភាព​ប្រេះឆាគ្នា រវាង​ប្រទេស​ជា​សមាជិក។ គេ​នៅចាំបាន​ថា កាល​ពី​ឆ្នាំ​ទៅមិញ​នេះ ភាពចម្រូងចម្រាស ជុំវិញ​រឿង​សមុទ្រ​ចិន​ខាង​ត្បូង​នេះ បាន​ធ្វើ​ឲ្យ​កិច្ចប្រជុំ​រដ្ឋមន្រ្តី​ការបរទេស​​អាស៊ាន នៅ​ភ្នំពេញ ត្រូវ​បិទបញ្ចប់ ដោយ​គ្មាន​សេចក្តីថ្លែងការណ៍​រួម ដែល​ជា​រឿង​មិន​ធ្លាប់មាន ក្នុង​ប្រវត្តិ​របស់​អាស៊ាន។

នៅ​ក្នុង​ជំនួបកំពូល​​នៅ​ព្រុយណេ​ពេលនេះ មេដឹកនាំ​អាស៊ាន​មួយចំនួន​បាន​លើកឡើង​ថា អាស៊ាន​បាន​ខិតខំ​ព្យាយាម​​សម្រុះសម្រួលគ្នា ហើយ​សម្រេចបាន​នូវ​ភាពរួបរួមគ្នា​ឡើងវិញ ជុំវិញ​សំណុំរឿង​សមុទ្រ​ចិន​ខាង​ត្បូង។ ប្រធានាធិបតី​ហ្វីលីពីន​បាន​លើកសរសើរ​ដល់​ព្រុយណេ​ថា​បាន​យកចិត្ត​ទុកដាក់​ចំពោះ​បញ្ហា​នៅ​សមុទ្រ​ចិន​ខាង​ត្បូងនេះ ហើយ​ថា យ៉ាងហោចបំផុត មេដឹកនាំ​អាស៊ាន​ទាំងអស់​បាន​ឯកភាព​គ្នា​ថា ទៅលើ​ភាពចាំបាច់ ក្នុង​ការ​ធ្វើ​យ៉ាងណា កុំ​ឲ្យ​ជម្លោះ​នៅ​សមុទ្រ​ចិន​ខាង​ត្បូង រាលដាល​បង្ក​ជា​អំពើ​ហិង្សា បង្ហូរឈាម​គ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ