ជប៉ុន

ជប៉ុន​ទើប​បញ្ចេញ​ខែ្សអាត់សម្លេងដើម​របស់​អធិរាជ​ហ៊ីរ៉ូហ៊ីតូ​ដែល​ថ្លែង​សុំ​ចាញ់​សង្រ្គាមលោក​លើកទី២

ខែ្សអាត់សម្លេងដើម​របស់​អធិរាជ​ហ៊ីរ៉ូហ៊ីតូ​ដែល​ថ្លែង​សុំ​ចាញ់​សង្រ្គាមលោក​លើកទី២
ខែ្សអាត់សម្លេងដើម​របស់​អធិរាជ​ហ៊ីរ៉ូហ៊ីតូ​ដែល​ថ្លែង​សុំ​ចាញ់​សង្រ្គាមលោក​លើកទី២ Reuters

នៅ​ក្នុង​ប្រទេស​ជប៉ុន ខ្សែអាត់សម្លេងដើម​របស់​ព្រះចៅ​អធិរាជ​ហ៊ីរ៉ូហ៊ីតូ​កាល​ពី ៧០ឆ្នំា​មុន​ទើប​ត្រូវ​បាន​បញ្ចេញ​ជា​សាធារណៈ​នា​ចុង​សប្តាហ៍​កន្លង​ទៅ។ នៅ​ក្នុង​ខ្សែអាត់សម្លេង​ដែល​មាន​រយៈពេល ៤នាទី និង​៣០វិនាទី គេ​បាន​ឮ​សង្កថា​របស់​ព្រះចៅ​ហ៊ីរ៉ូហ៊ីតូ​ដែល​បាន​ថ្លែង​ប្រាប់​ប្រជារាស្រ្ត​ជប៉ុន​ពី​ការ​ដែល​ជប៉ុន​សុំ​ចុះ​ចាញ់​សង្រ្គាមលោក​លើកទី២។ ការ​បញ្ចេញ​ខែ្សអាត់សម្លេង​ដើម​របស់​ព្រះចៅ​អធិរាជ​ហ៊ីរ៉ូហ៊ីតូ​ពេល​នេះ​បាន​ធ្វើ ចំ​ពេល​ដែល​ជប៉ុន​ត្រៀម​ប្រារព្ធ​ខួប​គម្រប់ ៧០ឆ្នំា​នៃ​ការ​ចាញ់​សង្រ្គាមលោក​លើកទី២។

ផ្សាយពាណិជ្ជកម្ម

នេះ​ជា​លើកទី១ ដែល​ប្រទេស​ជប៉ុន​ខ្លួន​ឯង​បាន​បញ្ចេញ​ជា​សាធារណៈ​នូវ​ខែ្សអាត់សម្លេង​ដើម​របស់​ព្រះចៅ​អធិរាជ​ហ៊ីរ៉ូហ៊ីតូ​ដែល​បាន​ថ្លែង​ប្រាប់​ប្រជារាស្រ្ត​ពី​ការ​ដែល​ជប៉ុន​សុខចិត្ត​ទម្លាក់​អាវុធ​សុំ​ចុះ​ចាញ់​សង្រ្គាមលោក​លើកទី២។ ព្រះចៅ​អធិរាជ​ហ៊ីរ៉ូហ៊ីតូ​ដែល​បាន​ចូលទីវង្គត​កាល​ពី​ថ្ងៃ​ទី៧ មករា ឆ្នំា ១៩៨៩។ សង្កថា​របស់​ព្រះចៅ​ហ៊ីរ៉ូហ៊ីតូ​ប្រហែល​ជា​បាន​ថត​ក្នុង​ថ្ងៃទី១៤ សីហា ឆ្នំា ១៩៤៥ រួច​បាន​ចាក់​ផ្សាយ​តាម​វិទ្យុ​នៅ​ថ្ងៃទី១៥ សីហា ឆ្នំា ១៩៤៥ វេលា​ម៉ោង ១២ថ្ងៃ​ត្រង់។ រហូត​មក​ដល់​សព្វថ្ងៃ គេ​ក៏​អាច​រក​បាន​នូវ​សង្កថា​សុំចាញ់​សង្រ្គាមលោក​លើកទី២ របស់​ព្រះចៅ​ហ៊ីរ៉ូហ៊ីតូ​ថ្លែង​កាល​ពី ៧០ឆ្នំា​មុន​ដែរ តែ​ជា​ខ្សែអាត់សម្លេង​ចម្លង​តៗ​គ្នា​មាន​គុណភាព​មិន​ល្អ​ដែល​កងទ័ព​អាមេរិក​បាន​ផ្សព្វផ្សាយ​កាល​ពី​ឆ្នំា ១៩៤៦។

យោង​តាម​ទីភ្នាក់ងារ​នៃ​រាជាអធិរាជ​ដែល​ជា​អ្នក​បញ្ចេញ​ខ្សែអាត់សម្លេង​ឲ្យ​ដឹង​ថា ទោះ​បី​ជា​មាន​សម្លេង​ខ្យល់​បន្តិចបន្តួច​នៅ​ក្នុង​ខ្សែអាត់សម្លេង​នោះ​ក៏​ដោយ ក៏​ចាប់​ពី​ពេល​នេះ​ត​ទៅ ប្រជារាស្រ្ត​ជប៉ុន​អាច​ស្តាប់​ឮ​ជា​លើកទី១ និង​ស្តាប់​បាន​ច្បាស់​នូវ​សម្លេង​របស់​ព្រះចៅ​អធិរាជ​ហ៊ីរ៉ូហ៊ីតូ​ដែល​បាន​ថ្លែង​សុខចិត្ត​ទម្លាក់​អាវុធ​ចុះចាញ់​សង្រ្គាមលោក​លើកទី២ ដោយ​គ្មាន​លក្ខខណ្ឌ។ តែ​អ្វី​ដែល​គួរ​ឲ្យ​កត់​សម្គាល់​នោះ​គឺ​ថា នៅ​ក្នុង​សង្កថា​រយៈពេល ៤នាទី និង​៣០វិនាទី​នោះ ព្រះចៅ​អធិរាជ​ហ៊ីរ៉ូហ៊ីតូ​ច្រើន​ប្រើ​ភាសា​ជប៉ុន​ជំនាន់ដើម​ដែល​មនុស្ស​ជំនាន់​ថ្មី​ពិបាក​ស្តាប់​យល់។

ក្រៅ​ពី​ការ​បញ្ចេញ​ខែ្សអាត់សម្លេង​ដើម​របស់​អធិរាជ​ហ៊ីរ៉ូហ៊ីតូ​ដែល​ថ្លែង​សុំ​ចាញ់​សង្រ្គាមលោក​លើកទី២ ទីភ្នាក់ងារ​នៃ​រាជាអធិរាជ​ក៏​បាន​ផ្សព្វផ្សាយ​រូបថត និង​វីដេអូ​ដែល​បង្ហាញ​ទីកន្លែងជ្រកកោណ​គេច​ពី​ការ​ទម្លាក់​គ្រាប់បែក​របស់​សត្រូវ។ គឺ​នៅ​ទីនោះ​ហើយ​ដែល​ព្រះចៅ​អធិរាជ​ហ៊ីរ៉ូហ៊ីតូ​បាន​ធ្វើ​សន្និសីទកាសែត រួច​សម្រេចចិត្ត​ទម្លាក់​អាវុធ​ចុះចាញ់ ពោល​ប៉ុន្មាន​ថ្ងៃ​ក្រោយ​ពី​ទ័ពអាមេរិកំាង​បាន​ទម្លាក់​គ្រាប់បែក​បរិមាណូ​លើ​ទីក្រុង​ហ៊ីរ៉ូស្ហ៊ីម៉ា និង​ណាហ្កាសាគី។

ជម្រើស​នៃ​ការ​បញ្ចេញ​ឯកសារ និង​វត្ថុតាង​ប្រវត្តិសាស្រ្ត​ជា​សាធារណៈ​ពេល​នេះ​ត្រូវ​បាន​ទីភ្នាក់ងារ​រាជាអធិរាជ​យល់​ឃើញ​ថា គឺ​ដើម្បី​ជួយ​ផ្តល់​ការ​យល់ដឹង​បន្ថែម​ដល់​មជ្ឈដ្ឋាន​ទូទៅ ពិសេស​ចំ​ពេល​ដែល​ជប៉ុន​ត្រៀម​ប្រារព្ធ​ខួប​គម្រប់ ៧០ឆ្នំា​នៃ​ការ​ចាញ់​សង្រ្គាមលោក​លើកទី២៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI