ចិន-ជប៉ុន

ជប៉ុន​បន្ថែម​យន្តហោះ​ប្រដេញ​នៅ​ក្បែរ​កោះ​មាន​ជម្លោះ​ជាមួយ​ចិន

យន្តហោះ​​ល្បាត​​របស់​​ជប៉ុន កំពុង​ហោះ​​ក្រវ៉េែល​​ក្បែរ​​កោះ Senkaku.
យន្តហោះ​​ល្បាត​​របស់​​ជប៉ុន កំពុង​ហោះ​​ក្រវ៉េែល​​ក្បែរ​​កោះ Senkaku. AFP PHOTO / JAPAN POOL via JIJI PRESS JAPAN OUT

ក្រសួង​ការពារ​ជាតិ​ជប៉ុន​ បាន​ប្រកាស​ឲ្យ​ដឹង​ថា​ខ្លួន ​ បាន​ដាក់​បន្ថែម​ចំនួន​យន្តហោះ​ប្រដេញ​ មួយ​ទ្វេរ​ជាពីរ​ នៅ​មូលដ្ឋាន​កោះ​អូគីណាវ៉ា ​ក្បែរ​ប្រជុំ​កោះ​សេនកាគូ ​ដែល​ជា​កោះ​កំពុង​ជាប់​ជម្លោះ​​ជាមួយ​នឹង​ចិន។ ការ​ដាក់​បន្ថែម​យន្តហោះ​ប្រដេញ​របៀប​នេះ ​ ត្រូវ​បាន​គេ​មើល​ឃើញ​ថា ​ជប៉ុន​កំពុង​ឆ្លើយតប​ទៅ​ចិន​ ដែល​កន្លង​មក​តែងតែ​បញ្ជូន​នាវា ​ព្រម​ទាំង​យន្តហោះ​ល្បាត ​ចូល​មក​តំបន់​ប្រជុំកោះ​សេនកាគូ។

ផ្សាយពាណិជ្ជកម្ម

ក្រសួង​ការពារជាតិ​ជប៉ុន​ បាន​សម្រេច​ដាក់​បន្ថែម​យន្តហោះ​ប្រដេញ​ប្រភេទ​ F-15 ​១​គុណ​ជា​២​ ឲ្យ​ឈរ​ជើង​នៅ​មូលដ្ឋាន​ទ័ព​អាកាស​លើ​កោះ​អូគីណាវ៉ា។ កោះ​អូគីណាវ៉ា ​គឺ​ជា​ប្រជុំ​កោះ​ស្ថិត​នៅ​ខាង​ត្បូង​បង្អស់ ​នៃ​ទឹកដី​ជប៉ុន ​ ហើយ​ដែល​ស្ថិត​នៅ​មិន​ឆ្ងាយ​ប៉ុន្មាន​ពី​ ប្រជុំ​កោះ​សេនកាគូ ​ ដែល​ជា​កោះ​មាន​ជម្លោះ​ដណ្តើម​គ្នា​ជាមួយ​នឹង​ចិន។ ចំនួន​យន្តហោះ​ប្រដេញ ​របស់​ជប៉ុន​នា​ពេល​នេះ ​ នឹង​ឡើង​ទៅ​ដល់​៤០​គ្រឿង​ ដែល​នឹង​ត្រូវ​ឈរជើង​នៅ​មូលដ្ឋាន​ក្រុង​ណាហា ​លើ​កោះ​អូគីណាវ៉ា។

 
ថ្លែង​ក្នុង​ឱកាស​បើក​ប្រតិបត្តិការ​នៅ​មូលដ្ឋាន​ទ័ព​ក្រុង​ណាហា ​លោក​អនុរដ្ឋមន្ត្រី​ក្រសួង​ការពារជាតិ​ជប៉ុន​ បាន​ថ្លែង​ថា ​មូលដ្ឋាន​ណាហា ​លើ​កោះ​អូគីណាវ៉ា ​គឺ​ជា​សមរភូមិ​ជួរមុខ​ ក្នុង​ការ​ការពារ​អធិបតេយ្យ​ជាតិ​ របស់​ជប៉ុន។ ពាក្យ​មួយ​ឃ្លា​នេះ ​ ត្រូវ​គេ​យល់​យ៉ាង​ច្បាស់​ គឺ​លោក​ចង់​សំដៅទៅ​ដល់​ចិន​ ដែល​ជា​មហាយក្ស​តែងតែ​គ្រហឹម​ពី​ចំងាយ។

ប្រជុំ​កោះ​សេនកាគូ ​បើទោះ​បី​គ្រាន់​តែ​ជា​ផ្ទាំងថ្ម ​គ្មាន​មនុស្ស​រស់នៅ ​ តែ​កោះនេះ​គឺ​ជា​កម្មវត្ថុ​នៃ​ជម្លោះ​ក្តៅគគុក ​រវាង​ជប៉ុន​ និង​ចិន។ ឈ្មោះ​សេនកាគូ ​ជា​ភាសា​ជប៉ុន​ ចំណែក​ចិន​តវ៉ា​ថា ​កោះ​នេះ​ឈ្មោះ​តៅយូ ​ជាភាសា​ចិន​ ហើយ​ជា​របស់​ខ្លួន។ ចិន​ធ្លាប់​បាន​បញ្ជូន​នាវា​ល្បាត ​ព្រម​ទាំង​យន្តហោះ ​មក​ក្រវែល​ជា​រឿយៗ​ នៅ​ជុំវិញ​ប្រជុំ​កោះ​នេះ។
 

សូមរំលឹក​ថា ​ នៅ​ឆ្នាំ​២០១២ ​ជា​ឆ្នាំ​ដែល​ជប៉ុន​និង​ចិន ​មើល​មុខ​គ្នា​លែង​ត្រង់​ ដោយសារ​តែ​ជម្លោះ​ដណ្តើម​ដែនកោះ​ក្នុង​សមុទ្រ ​បូកផ្សំ​នឹង​ជម្លោះ​ប្រវត្តិសាស្ត្រ​ថែម​ទៀត។ នៅឆ្នាំ​២០១៤ ​ ប្រទេស​មហា​អំណាច​អាស៊ី​ទាំង​ពីរ​ បាន​ព្យាយាម​ស្រុះស្រួល​គ្នា ​ដោយ​មាន​ការ​រៀប​ចំ​ជា​ជំនួបកំពូល​រវាង​លោក ​ស៊ី ជីនពីង ​និងលោក​ស៊ិន ហ្សូអាបេ។ កន្លង​មក​បញ្ហា​កោះសេនកាគូ ​ត្រូវ​បាន​ជប៉ុន​ចាត់​ទុក​ថា​ ​វា​គ្រាន់​តែ​ជា​ការ​មិន​ចុះ​សម្រុង​គ្នា ​តែ​មិនមែន​ជា​ជម្លោះ​ប្រឈម​មុខ​ដាក់​គ្នាជា​ផ្លូវការ​ទេ។ជប៉ុន​តែងតែ​បដិសេធ​ថា​ រវាង​ខ្លួន​និង​ចិន​ គឺ​គ្មាន​ជម្លោះ​អធិបតេយ្យ​នឹង​គ្នា​ទេ ​​ហើយ​ព្យាយាម​បន្ធូរបន្ថយ​ស្ថានការណ៍ ​ តាម​រយៈ​ការ​ចរចា​សម្រុះ​សម្រួល​គ្នា។

យ៉ាងណាក៏​ដោយ ​ជម្លោះ​រឺ​ គ្រាន់តែ​ជា​ការ​មិន​ចុះសម្រុង​គ្នា ​ តែ​ការពិត​គឺ​ប្រទេស​ទាំងពីរ​កំពុង​ដណ្តើម​គ្នា ​កាន់កាប់​កោះ​នេះ។ ហើយ​ការ​ដាក់​បន្ថែម​យន្តហោះ​ប្រដេញ​របស់​ជប៉ុន​ បង្ហាញ​ឲ្យ​កាន់តែ​ច្បាស់​ថា​ ជប៉ុន​ត្រៀម​ខ្លួន​ប្រើ​កម្លាំង ​បើ​សិន​ជា​មាន​គេ​រំលោភ​ដែនដី​ ដែល​ខ្លួន​ចាត់​ទុក​ជា​ស្ថិត​ក្នុង​ដែន​អធិបតេយ្យ​របស់​ខ្លួន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI