អានតួអត្ថបទ
ថៃ

ភាព​រស់​ឡើងវិញ​នៃ​ទីក្រុង​បាងកក

យុទ្ធនាការ​បោស​សម្អាត​ក្រុង ថ្ងៃ​ទី ២៣ ឧសភា ២០១០
យុទ្ធនាការ​បោស​សម្អាត​ក្រុង ថ្ងៃ​ទី ២៣ ឧសភា ២០១០ © REUTERS/Yannis Behrakis
ដោយ៖ អៀង សុខម៉ិញ
១៨ នាទី

បន្ទាប់​ពី​ត្រូវ​ជម្លៀស​ចេញ​ និង​បិទទ្វារ ក្នុង​ពេល​កង​ទ័ព​ធ្វើ​ការ​វាយ​ប្រហារ​បំបែក​ជំរំ​ពួក​អាវ​ក្រហម នៅ​ថ្ងៃ​ច័ន្ទ​ទី ២៤ ឧសភានេះ ​ វិស័យ​សេដ្ឋកិច្ច និង​វិស័យ​សាធារណៈ រដ្ឋបាល​ផ្សេងៗ​ ព្រម​ទាំង​​សាលា​រៀន ចរាចរណ៍​តាម​ផ្លូវ​ថ្នល់ បាន​ផ្តើម​មាន​​សកម្មភាព​ឡើង​វិញ​ហើយ​នៅ​ទីក្រុង​បាងកក។ ទីផ្សារ​ភាគ​ហ៊ុន​ក៏​បាន​បើក​ទ្វារ​ ជាមួយ​នឹង​​ការ​ស្រុត​ចុះ​​ ០,៧%។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

លែង​មាន​ហើយ កង់​ឡានចាស់ៗ  កាក​សំណល់​ផេះ​ផង់។ យុទ្ធនាការ​បោស​សម្អាត​ក្រុង​ នា​ចុង​សប្តាហ៍​នេះ បាន​ចប់​សព្វ​គ្រប់​ហើយ ! នេះ​ជា​ការ​អះអាង​របស់​នាយក​រដ្ឋមន្ត្រី​ អាភិស៊ីត នៅ​ល្ងាចមិញ។ របាំង​ រនាំង ជំរំ​របស់​ពួក​អាវ​ក្រហម​មួយ​ភាគ​ត្រូវ​ធំ​ត្រូវ​​បាន​ឈូស​ចេញ​ ផ្លូវ​ថ្នល់​ទាំង​ឡាយ​​ មាន​ចរាចរណ៍​​ណែន​ណាន់​តាន់​តាប់​ដូច​​​សព្វ​មួយ​ដង។

 
ទី​ផ្សារ​ភាគហ៊ុន ដែល​ត្រូវ​បិទ​ទ្វារ​តាំង​ពី​ថ្ងៃ​រសៀល​ថ្ងៃ​ពុធ​ទី ១៩ ឧសភា ថ្ងៃ​ដែល​កង​ទ័ព​បាន​បើក​យុទ្ធនាការ​បំបែក​ជំរំ​ពួក​អាវ​ក្រហម​ និង​ដែល​ត្រូវ​​​អគ្គីភ័យ​ឆាប​ឆេះ​អស់​ បាន​បើក​ទ្វារ​វិញ​នៅ​ថ្ងៃ​ច័ន្ទ​នេះ នៅ​ក្នុង​អគារ​ថ្មី​ ជាមួយ​នឹង​ការ​ធ្លាក់​ស្រុត​ចុះ​​ ០,៧%។

ចំណែក​សាលា​រៀន ដែល​បាន​លើក​ពេល​បើក​បវេសនកាល មួយ​សប្តាហ៍​ក្រោយ​សាលា​រៀន​នៅ​តាម​ខេត្ត ក៏​បាន​បើក​ទ្វារ​ទទួល​សិស្សានុសិស្ស​វិញ​​ហើយដែរ ​នៅ​ថ្ងៃ​ច័ន្ទ​នេះ។ ការិយាល័យ​រដ្ឋ ធនាគារ​ ដែល​សុទ្ធ​តែ​បិទ​ទ្វារ កាល​ពី​សប្តាហ៍​មុន បាន​ផ្តើម​សកម្មភាព​របស់​ខ្លួន​វិញ​អស់​ហើយ។ បុគ្គលិក​ក្រុមហ៊ុន និង​សហគ្រាស ដែល​ត្រូវ​បង្ខំ​ចិត្ត​សម្រាក​នៅ​ផ្ទុះ​មួយ​សប្តាហ៍​ហើយ​នោះ បាន​វិល​ត្រឡប់​មក​កាន់​ការិយាល័យ​​​​រៀង​ៗ​ខ្លួន ដើម្បី​បំពេញ​កិច្ច​ការ​ឡើង​វិញ បង្ក​​ឲ្យ​មាន​ការ​ស្ទះ​ចរាចរណ៍ ដូច​មុន​អ៊ីចឹង !

វិបត្តិ​នយោបាយ​ និង​អំពើ​ហិង្សា​នា​រយៈ​ពេល​ប៉ុន្មាន​សប្តាហ៍​នេះ​ បាន​ធ្វើ​ឲ្យ​​សេដ្ឋកិច្ច​ថៃ​មាន​ការ​ខាត​បង់​ប្រមាណ ១,៥​% នៃ​ផលិតផល​សរុបក្នុង​ស្រុក ប្រចាំឆ្នាំ​។ នេះ​ជា​ការ​ខាត​បង់​ដ៏​សម្បើម​ ព្រោះ​វិបត្តិ​​ផ្ទៃក្នុង​បាន​ផ្ទុះ​ឡើង​ ចំពេល​ដែល​សេដ្ឋកិច្ច​ថៃ​កំពុង​ស្គាល់​កំណើន​ ដល់​ទៅ​១២% ក្នុង​ត្រី​ទី​មួយ​នៃឆ្នាំ ២០១០។ ប៉ុន្តែ​សម្រាប់​ក្រុម​អាវ​ក្រហម​ ដែល​ភាគ​ច្រើន​ជា​កសិករ និង​ជា​អ្នក​ជន​បទ វិបត្តិ​បាន​ផ្ទុះ​ឡើង​ ក៏​ព្រោះ​តែ​មេដឹក​នាំ​រដ្ឋាភិបាល​​គ្មាន​សមភាព គិត​គូរ​តែ​ប្រយោជន៍​អ្នក​ក្រុង ​និង​រាជវាំង នេះ​ឯង។

​ភាព​តាន​តឹង​រវាង​ពួក​អាវ​ក្រហម​ប្រឆាំង​រដ្ឋាភិបាល​មិន​រលត់​បាត់​ដោយ​ងាយ​ឡើយ លោក​អាភិស៊ីត ដែល​​ប្រកាន់​យក​នយោបាយ​ផ្សះផ្សា​ជាតិ បាន​​​ប្រកាស​យ៉ាង​ច្បាស់​លាស់​ណាស់ ថា​គឺ​លោក​​ជា​សម្រេច​ពេល​បោះ​ឆ្នោត​មុន​អណត្តិ !​ នេះ​ជា​សារ​​ដ៏​មុត​មាំ​មួយ​ទៅ​កាន់​​ពួក​អាវ​ក្រហម ដែល​​​បាន​គ្រោងជា​ស្រេច​នឹង​​​រៀប​ចំ​សកម្មភាព​​ថ្មី​ នៅ​ខែ​ក្រោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ