អានតួអត្ថបទ
ចិន-អាហ្រ្វិក

ចិន​បង្កើន​ការវិនិយោគ​ក្នុង​ទឹកដី​អាហ្រ្វិក

ប្រធានាធិបតី​ចិនលោក​Hu Jintao (ទី​ពី​ខាងស្តាំ)​និង​លោក​ប្រធានាធិបតី​ប្រទេស​ហ្គាណា John Atta Mills (ទីពីរខាងឆ្វេង)ក្នុង​ពិធី​ចុះ​ហត្ថលេខា​សហប្រតិបត្តិការ​រវាង​ប្រទេស​ទាំងពី នៅ​ខែ កញ្ញា ឆ្នាំ ២០១០
ប្រធានាធិបតី​ចិនលោក​Hu Jintao (ទី​ពី​ខាងស្តាំ)​និង​លោក​ប្រធានាធិបតី​ប្រទេស​ហ្គាណា John Atta Mills (ទីពីរខាងឆ្វេង)ក្នុង​ពិធី​ចុះ​ហត្ថលេខា​សហប្រតិបត្តិការ​រវាង​ប្រទេស​ទាំងពី នៅ​ខែ កញ្ញា ឆ្នាំ ២០១០ ©Reuters
ដោយ៖ ឈាង បុប្ផា
១៩ នាទី

ដោយ​នៅ​តែ​មិន​ខ្វល់​ពី​បញ្ហា​រំលោភ​សិទ្ធិមនុស្ស អំពើ​ពុករលួយ ក្នុង​ទ្វីបអាហ្រ្វិក ចិនបាន​ប្រកាស​នៅ​ព្រហស្បតិ៍​នេះ អំពី​គម្រោង​បង្កើន​បន្ថែម​ការវិនិយោគ​របស់​ខ្លួន ក្នុង​ប្រទេស​នៅ​ទ្វីប​​អាហ្រ្វិក។ ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ចំនួន​វិនិយោគ​របស់​ចិន​ នៅ​អាហ្រ្វិក​បាន​កើន​ឡើង​យ៉ាងលឿន ជា​ពិសេស​ក្នុង​វិស័យ​នាំចេញ​វត្ថុធាតុ​ដើម​រ៉ែ​ពី​ប្រទេស​មួយ​ចំនួន​របស់​ទ្វីប​អាហ្រ្វិក។

ផ្សាយពាណិជ្ជកម្ម

សេចក្តី​រាយការណ៍​របស់​ឈាង បុប្ផា

ទំនាក់ទំនង​ចិន អាហ្វ្រិកចាប់ផ្តើម​​មាន​តាំង​ពី​​អតីត​កាល​មក​ម៉្លេះ។ នៅ​ក្នុង​ទសវត្សរ៍​ទី ៥០ នៅក្រោម​ការគ្រប់គ្រង​របស់​ប្រមុខដឹកនាំ​ ម៉ៅ សេងទុង ចិន​បាន​ចាប់អារម្មណ៍​ទៅ​លើ​ទ្វីប​អាហ្រ្វិក​ដើម្បី​ពង្រីក​នយោបាយ​​បរទេស​ និង​ផ្សព្វផ្សាយ​មនោគម​វិជ្ជារបស់​ខ្លួន។ ប៉ុន្តែ ៦០​ឆ្នាំក្រោយ ចិន​ចាប់ផ្តើម​មាន​វត្តមាន នៅ​អាហ្វ្រិក​ដោយសារ​ប្រយោជន៍​សេដ្ឋកិច្ច​វិញ​ម្តង។

 
មក​ដល់​បច្ចុប្បន្ន​នេះ ការវិនិយោគ​របស់​ចិន នៅ​អាហ្រ្វិក​មាន​តម្លៃជាង ៩ ពាន់​លាន​ដុល្លារ​។ នៅ​ថ្ងៃ​នេះ​ទៀត ប្រធាន​នាយកដ្ឋាន​អាហ្រ្វិក និង​អាស៊ី​ខាងលិច របស់​ក្រសួង​ពាណិជ្ជកម្ម​ចិន​បាន​បញ្ជាក់​ថា ចិន​នឹង​បន្ត បង្កើន​ការវិនិយោគ​របស់​ខ្លួន​នៅ​ទ្វីប​អាហ្រ្វិក។ អ្នកទទួល​ខុសត្រូវ​ចិន​ខាងលើ​បាន​បន្ថែម​ថា ក្នុង​គម្រោង​លើក​នេះ វិស័យ​ជា​អាទិភាព​សម្រាប់​បោះទុន​វិនិយោគ គឺ ធនធាន​រ៉ែ ហេដ្ឋារចនាសម្ព័ន្ធ អាកាសយានដ្ឋាន និង​ការគ្រប់គ្រង​ហិរញ្ញវត្ថុ។
 

កម្មករ​ចិន និង​កម្មករ​អាហ្រ្វិក​ធ្វើការក្នុង​សំណង់​ដែល​ស្ថាបនា​ក្នុង​គម្រោង​វិនិយោគ​របស់​ចិន នៅអាហ្រ្វិក
កម្មករ​ចិន និង​កម្មករ​អាហ្រ្វិក​ធ្វើការក្នុង​សំណង់​ដែល​ស្ថាបនា​ក្នុង​គម្រោង​វិនិយោគ​របស់​ចិន នៅអាហ្រ្វិក ©រក្សាសិទ្ធិ

វា​មិន​មែន​ចៃដន្យ​ទេ​ដែល​ចិន​ចាប់ផ្តើម​ផ្តោត​ការវិនិយោគ​របស់​ខ្លួន ដោយ​បង្កើន​ការវិនិយោគ​ពី ២២០​លានដុល្លារ នៅ​ឆ្នាំ ២០០០ មក​ជាង​១ពាន់ ៤​រយ​លាន​ដុល្លារ ក្នុង​ឆ្នាំ ២០០៩។ នៅ​អាហ្រ្វិក ចិន​បាន​សម្លឹង​ឃើញ​សក្តានុពល​ផ្នែក​វត្ថុធាតុ​ដើម​រ៉ែសម្រាប់​ការអភិវឌ្ឍន៍​សេដ្ឋកិច្ច​ និង​ទីផ្សារ​សម្រាប់​ផលិតផល​របស់ខ្លួន។

នៅ ក្នុង​ទំនាក់ទំនងដៃគូ​​ពាណិជ្ជកម្ម ចិនស្ថិតនៅ ចំណាត់ថ្នាក់​លេខ ៣ ក្រោយ​អាមេរិក និង​ទ្វីប​អឺរ៉ុប ប៉ុន្តែ​ជាមួយ​នឹង​ការបង្កើន​ចំនួន​វិនិយោគ​របស់​ខ្លួន ចិន​នឹង​ក្លាយ​ជា​ដៃគូ​ទីមួយ​ជាមួយ​នឹង​ប្រទេស​នៅ​អាហ្វ្រិក ក្នុង​ពេល​ឆាប់ខាងមុខ។ ដៃគូ​ពាណិជ្ជកម្ម​សំខាន់ៗ​របស់​ចិនគឺ ប្រទេស​អង់ហ្គោឡា អាហ្រ្វិកខាងត្បូង ស៊ូដង់ និង​នីហ្សេរីយ៉ា។

កន្លង​មក​ ​ប្រទេស​លោក​ខាងលិច​ ជា​ពិសេស​អឺរ៉ុប បាន​រិះគន់​ ចិន​ដែល​នៅ​បន្ត​រកស៊ី​ជាមួយ​នឹង​ប្រទេស​អាហ្រ្វិក​ខាង​លើ បើ​ទោះបី​ដឹង​ថា ប្រទេស​ទាំងនេះ​កំពុង​ប្រើ​អំណាច​ផ្តាច់ការ ហិង្សា និង​​​ពុករលួយ​ស៊ី​ជម្រៅ​ក៏​ហើយក្តី​។ លើស​ពី​នោះ គេ​នៅ​បាន​ចោទថា ចិន​កំពុង​​​រកស៊ី​បែប​មិន​សុចរិត​ជាមួយអាហ្រ្វិក នៅ​ពេល​ចិន​គិត​តែ​ពី​ប្រយោជន៍​របស់​ខ្លួន និង​មិន​គិត​អភិវឌ្ឍ​សម្រាប់ប្រយោជន៍​របស់​​ប្រជាជន​អាហ្រ្វិក ដែល​ជា​ម្ចាស់ស្រុក៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ