ទស្សនៈព្រឹត្តិការណ៍ពិភពលោក

ចិនចង់ពង្រឹង​សហប្រតិបត្តិការ​ជាមួយបារាំង​

សំឡេង ០៤:២០
លោក​ប្រធានាធិបតី​​បារាំង​ ​Nicolas Sarkozy  និង​,​លោក​ប្រធានាធិបតី​ចិន​​ Hu Jintao​
លោក​ប្រធានាធិបតី​​បារាំង​ ​Nicolas Sarkozy និង​,​លោក​ប្រធានាធិបតី​ចិន​​ Hu Jintao​ ® AFP & Reuters

លោក​ប្រធានាធិបតីចិន​ Hu Jintao ត្រូវ​អញ្ជើញ​មក​ធ្វើ​ទស្សនកិច្ច​នៅ​ប្រទេស​បារាំង​ពីថ្ងៃ​ទី៤​ដល់ថ្ងៃ​ទី៦​វិច្ឆិកា​ខាងមុខនេះ។​ មុននឹង​ចាកចេញ​ពី​ទីក្រុង​ប៉េកាំង​ ​ លោក​Hu jintao​បាន​អំពាវនាវ​ឲ្យ​ប្រទេស​បារាំង​និង​ប្រទេសចិន​រួបរួម​គ្នា​ជា​ដៃគូថ្មី​ ​ ដើម្បី​ធ្វើ​សហប្រតិបត្តិការ​នៅក្នុង​វិស័យ​យុទ្ធសាស្ត្រ​សំខាន់ៗ។ 

ផ្សាយពាណិជ្ជកម្ម

ទំនាក់​ទំនង​ចិន-បារាំង​ជា​ទំនាក់​ទំនង​មួយ​ដែលមាន​ទំហំ​យុទ្ធសាស្ត្រ​ដ៏​សំខាន់។​ ចាប់តាំងពី​ប្រទេស​ទាំងពីរ​មាន​ទំនាក់​ទំនង​ផ្លូវទូត​នឹង​គ្នា​អស់រយៈ​៤៦ឆ្នាំរួចមក​ ​ ប្រទេស​បារាំង​និង​ប្រទេសចិន​តែង​មាន​សហប្រតិបត្តិការ​នឹងគ្នា​យ៉ាងល្អ​ប្រសើរ​នៅ​ក្នុង​វិស័យ​សំខាន់ៗ​ជាច្រើន។

 
នៅក្នុង​បរិបទ​អន្តរជាតិ​ដែល​ពោរពេញ​ទៅដោយ​ការ​ប្តូរប្រែ​ប្រួល​យ៉ាង​ជ្រាលជ្រៅ​ ​ ប្រទេស​បារាំង​និង​ប្រទេស​ចិន​បាន​សម្រប​​ទំនាក់​ទំនង​របស់​ខ្លួន​ឲ្យ​ស្របតាម​ស្ថានការណ៍​អន្តរជាតិ​ថ្មី​ ​ ជាពិសេស​ប្រទេស​ទាំងពីរ​ជា​សមាជិក​​អចិន្ត្រៃយ៍​នៃ​ក្រុម​ប្រឹក្សា​សន្តិសុខ​នៃ​អង្គការ​សហប្រជាជាតិ។

ប្រទេសចិន​បាន​ត្រៀម​លក្ខណៈ​ជា​ស្រេច​នឹង​ធ្វើការ​ចរចា​ជាមួយ​ប្រទេស​បារាំង​ ​ ដើម្បី​ពង្រឹង​ទំនុកចិត្ត​និង​ដើម្បី​ពង្រីក​ការ​ដោះដូរ​ក្នុង​វិស័យ​អេឡេត្រូ-នុយក្លេអ៊ែរ​ ​ វិស័យ​អាកាសចរ​ ​ ហើយនិង​ដើម្បី​អភិវឌ្ឍ​យ៉ាង​សកម្ម​ជាដៃគូថ្មី​ក្នុងវិស័យ​សេដ្ឋកិច្ច​ថាមពល​ ​ បរិស្ថាន​ ​ និង​បច្ចេកវិទ្យា។

នៅក្នុង​វិស័យ​ពាណិជ្ជកម្ម​វិញ​ ​ ទស្សនកិច្ច​របស់​លោក​ប្រធានាធិបតីចិន​ Hu Jintao ​នៅ​ប្រទេស​បារាំង​ពីថ្ងៃ​ទី៤​ដល់ថ្ងៃ​ទី៦​វិច្ឆិកា​ខាង​មុខនេះ​ប្រហែល​ជា​អាច​ជួយ​ឲ្យ​សម្រេច​បាន​នូវ​កិច្ច​ព្រម​ព្រៀង​​មួយ​ដែល​ឈាន​ទៅរក​ការ​បញ្ជាទិញ​យន្តហោះ​Airbus របស់​ក្រុមហ៊ុន​EADS ​ធុន​A320​ចំនួន​ពី​១០០​ទៅ១៥០គ្រឿង។

ចំណែកឯ​ទំនាក់ទំនង​ចិន-អឺរ៉ុប​វិញ​ក៏​ជា​បច្ច័យ​មួយ​ដ៏​សំខាន់​ក្នុង​ការ​ជួយ​ដោះស្រាយ​បញ្ហា​អន្តរជាតិ។​ គួរកត់​សម្គាល់​ថា​ ​ អស់រយៈ​៦ឆ្នាំ​មកហើយ​ដែល​សហភាព​អឺរ៉ុប​បាន​ក្លាយ​ទៅជា​ដៃគូ​ពាណិជ្ជកម្ម​ទីមួយ​របស់​ប្រទេសចិន។​ ហើយ​ប្រទេសចិន​ក៏​បាន​ក្លាយ​ទៅជា​អតិថិជន​ទីពីរ​របស់​សហភាព​អឺរ៉ុប​ផងដែរ។​ ការដោះដូរ​ពាណិជ្ជកម្ម​ចិន-សហភាពអឺរ៉ុប​បាន​កើនឡើង​ដល់​ទៅ​៣៥០ពាន់លាន​ដុល្លារ​អាមេរិក​សម្រាប់​បីត្រីមាស​ចុងក្រោយ​នៃ​ឆ្នាំ២០១០នេះ​ ​ ដោយ​សា​រ​តែ​មាន​កំណើន​ដល់ទៅ​+៣៤,៤%​ក្នុង១ឆ្នាំ។

នៅ​ក្នុង​វិស័យ​វប្បធម៌​វិញ​ ​ ការដោះដូរ​គ្នា​ក៏​មាន​លក្ខណៈ​សម្បូណ៌​បែប។​ ជាពិសេស​ ​ ជាមួយ​នឹង​ការ​តាំងពិពណ៌​សកល​នៅ​ទីក្រុង​សៀងហៃ​ដែល​បាន​ក្លាយទៅជា​បច្ច័យ​ដ៏​វិជ្ជមាន​សម្រាប់​ធ្វើការ​ដោះដូរ​រវាង​ចិន​និង​អឺរ៉ុប។

សម្រាប់​ លោក​ប្រធានាធិបតីចិន​ Hu Jintao ​ក៏​ដូច​ជា​សម្រាប់​លោក​ប្រធានាធិបតី​បារាំង​នីកូឡា​សាកូហ្ស៊ី​ ​ ជំនួប​កំពូល​នៃ​ក្រុម​ប្រទេស​G20​គឺ​ជា​យន្តការ​មួយ​ដ៏​ស័ក្តិសិទ្ធិ​សម្រាប់​ជួយ​ប្រយុទ្ធ​តទល់​នឹង​វិបត្តិ​សេដ្ឋកិច្ច​និង​វិបត្តិ​ហិរញ្ញវត្ថុ​អន្តរជាតិ។

ជំនួប​កំពូល​នៃ​ក្រុម​ប្រទេស​G20​នៅ​ពេល​អនាគត​ដ៏​ខ្លី​ខាងមុខនេះ​នៅ​ទីក្រុង​សេអ៊ូល​ត្រូវ​រក្សា​ឲ្យ​មាន​នូវ​សាមគ្គីធម៌​រវាង​ប្រទេស​ជា​សមាជិក​ដើម្បី​ជួយ​ដោះស្រាយ​វិបត្តិ​ហិរញ្ញវត្ថុ​អន្តរជាតិ​និង​ជួយ​ពង្រឹង​ឲ្យ​មាន​កំណើន​សេដ្ឋកិច្ច​ពិភពលោក។

សំណួរមួយ​បាន​លេចឡើង​ចោទសួរ​ថា​ ​ តើ​ការ​ស្ទុះឡើង​ជា​មហាអំណាច​សេដ្ឋកិច្ច​ពិភពលោក​ដ៏​សែន​ខ្លាំងក្លានៃ​ប្រទេស​ចិន​ ​ គួរ​ធ្វើឲ្យ​ប្រទេស​ឯទៀតៗ​កើតមាន​ក្តីបារម្ភ​ដែរឬទេ?

សម្រាប់​លោក​ប្រធានាធិបតីចិន​Hu Jintao​ ​ ចាប់តាំងពី​សាធារណរដ្ឋ​ប្រជាមានិតចិន​បាន​កកើត​នៅឆ្នាំ១៩៤៩​ ​ ជាពិសេស​ក្រោយ​ពីមាន​”​នយោបាយ​បើកចំហ​”​ទៅ​ក្រៅប្រទេស​កាលពី​៣២ឆ្នាំមុន​ ​ រដ្ឋាភិបាល​នៃ​ប្រទេសចិន​តែង​ប្រយុទ្ធ​តស៊ូ​ជានិច្ច​ដើម្បី​ជួយ​លើក​តម្កើង​ជីវភាព​រស់នៅ​របស់​ប្រជាជន។​ ទាំងនេះ​សម្រេច​បាន​ក៏​ដោយសារតែ​មាន​”​នយោបាយ​អភិវឌ្ឍន៍​សេដ្ឋកិច្ច​”​ដ៏​ត្រឹមត្រូវ​របស់​អ្នក​ដឹកនាំ​ចិន​។​ ហើយ​​ការ​រីកចម្រើន​លូតលាស់​នៃ​ប្រទេសចិន​ក៏​ជា​ចំណែក​មួយ​ដ៏​ថ្លៃថ្លា​សម្រាប់​សង្គម​មនុស្ស​ទាំងមូល​នៅលើលោក​យើងនេះ​ផងដែរ។​ ផ្ទុយ​ទៅ​វិញ​ ​ វាជា​ឱកាស​មួយ​ដ៏​ល្អ​សម្រាប់​ប្រទេស​បារាំង​និង​ប្រទេស​សមាជិក​នៃ​សហភាព​អឺរ៉ុប​ឆ្លៀត​ពង្រឹង​ពង្រីក​សហប្រតិបត្តិការ​សេដ្ឋកិច្ច​ ​ សហប្រតិបត្តិការ​បច្ចេកវិទ្យា​ ​ ហើយនិង​វិស័យ​ឯទៀតៗ​ដើម្បី​ជា​ផលប្រយោជន៍​សម្រាប់​ភាគី​ទាំងពីរ​និង​សម្រាប់​សង្គម​មនុស្ស​ទាំងមូល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI