អានតួអត្ថបទ
ជប៉ុន

ក្រុមហ៊ុន​អាកាសចរណ៍ផ្សេងៗ​ផ្តើមផ្អាក​ការហោះហើរ​ទៅកាន់ទីក្រុង​តូក្យូ​

ក្រុមហ៊ុន​​​អាកាសចរណ៍​​បារាំង​Air France​​ បានដាក់​លក់​តាំង​ពីម្សិលមិញ​នូវ​​តម្លៃ​​សំបុត្រ​​យន្តហោះ​​ពិសេស​​ដែល​​ធ្វើដំណើរ​​ពីតូក្យូ​​មក​ប៉ារីស​
ក្រុមហ៊ុន​​​អាកាសចរណ៍​​បារាំង​Air France​​ បានដាក់​លក់​តាំង​ពីម្សិលមិញ​នូវ​​តម្លៃ​​សំបុត្រ​​យន្តហោះ​​ពិសេស​​ដែល​​ធ្វើដំណើរ​​ពីតូក្យូ​​មក​ប៉ារីស​ © lrargerich/Flickr
ដោយ៖ តាន់ ហ្សង់-ហ្វ្រង់ស័រ
១៦ នាទី

នៅ​ថ្ងៃអង្គារ​ទី១៥​មីនានេះ​ ក្រុមហ៊ុន​អាកាសចរណ៍​អាស៊ី​និងអឺរ៉ុប​មួយចំនួន​បាន​ប្រកាស​ផ្អាក​ទាំងស្រុង​ ឬបន្ថយ​ចំនួន​ជើងហោះ​ហើរ​របស់គេ​ទៅកាន់​ទីក្រុង​តូក្យូ។ មូលហេតុ​គឺមក​ពី​ព័ត៌មាន​​លេចឮ​ឲ្យដឹងថា​អាចមាន​ការ​រញ្ជួយ​ដីមួយ​ថ្មី​កើតឡើង ​អាចមាន​ពពក​ផ្ទុក​ទៅ​ដោយ​ធាតុ​វិទ្យុសកម្ម​រសាត់​មកដល់​ទីក្រុង​តូក្យូ​និង ​ការថយ​ចុះ​នៃ​ចំនួន​អ្នក​ដំណើរ​មក​កាន់​ប្រទេស​ជប៉ុន។ 

ផ្សាយពាណិជ្ជកម្ម

សេចក្តីរាយការណ៍របស់​ តាន់ ហ្សង់-ហ្វ្រង់ស្វ័រ

ក្រុមហ៊ុន​អាកាសចរណ៍​Air China​របស់​ប្រទេស​ចិន​បាន​សម្រេច​កាត់​បន្ថយ​ការ​ហោះហើរ​របស់​គេពី​ប៉េកាំង​ទៅកាន់​តូក្យូ​ពី៦​ឲ្យ​មក​នៅសល់​តែ៣ជើង​ប៉ុណ្ណោះ​ក្នុងមួយថ្ងៃ​សម្រាប់​ថ្ងៃ​អង្គារ​នេះ ​និង​សម្រាប់​ថ្ងៃពុធស្អែក​។​ ដូចគ្នា​អ៊ីចឹងដែរ​ ការហោះហើរ​ទាំង៣ជើង​ក្នុងមួយ​ថ្ងៃ​ពីសៀងហៃ​ទៅតូក្យូ​ត្រូវបាន​កាត់បន្ថយ​ឲ្យនៅ​សល់តែ​១ជើង​ប៉ុណ្ណោះ។​ ទាំងនេះ​គឺមក​ពី​មាន​ព័ត៌មាន​បញ្ជាក់​ថា ​នៅថ្ងៃពុធ​ស្អែកនេះ​ អាចនឹង​មានការ​រញ្ជួយដី​មួយថ្មី​ទៀត​កើត​ឡើង​នៅតំបន់​ម្តុំ​ទីក្រុង​តូក្យូ។

 
ក្រុមហ៊ុន​អាកាសចរណ៍​តៃវ៉ាន់​Eva Airways ​វិញ​ បានសម្រេច​ផ្អាកការ​ហោះហើរ​ទាំង១៤​ជើង​របស់​ខ្លួន​ទៅកាន់​តូក្យូនិង​ទីក្រុង​មួយចំនួន​នៅប៉ែក​ខាងជើង​នៃ​ប្រទេស​ជប៉ុន​ចាប់ពី​ថ្ងៃនេះ​រហូត​ទៅដល់​ចុងខែ។​ បើយោង​ទៅតាម​អ្នកទទួល​ខុសត្រូវ​នៃក្រុមហ៊ុន​Eva ​ការផ្អាក​ការ​ហោះហើរ​នេះ គឺមកពី​អ្នកដំណើរ​ច្រើនឡើងៗ​បាន​សម្រេច​ចិត្ត​ឈប់ទៅ​ប្រទេសជប៉ុន។

ម្យ៉ាងទៀត​ នៅថ្ងៃ​អង្គារនេះ​ នៅប្រទេស​ម៉ាឡេស៊ី​អាជ្ញាធរ​បានតម្រូវ​ឲ្យត្រួត​ពិនិត្យ​មើល​គ្រប់អ្នក​ដំណើរ​ដែលមក​ពីប្រទេស​ជប៉ុន​ក្រែង​លោ​មាន​នាំ​មក​នូវ​ធាតុ​វិទ្យុសកម្ម។​ នៅហុងកុង​វិញ​ អ្នក​ដំណើរ​មកពី​ប្រទេស​ជប៉ុន​អាច​ទៅពិនិត្យ​មើលសុខភាព​របស់​ពួកគេ​ នៅតាម​មន្ទីរ​ពេទ្យ​សាធារណៈ ​បើសិនជា​ពួកគេ​បារម្ភ​ចំពោះ​កាំរស្មី​នៃ​វិទ្យុសកម្ម។

Lufthansa វិញ​ដែលជា​ក្រុមហ៊ុន​អាកាសចរណ៍​អាល្លឺម៉ង់​ បាន​ប្រកាស​ផ្អាក​គ្រប់ការ​ហោះ​ហើរ​របស់​គេទៅ​កាន់ទីក្រុង​តូក្យូ​ តែ​នៅបន្ត​ជើងហោះហើរ​ទៅកាន់​ទីក្រុង​ផ្សេងៗ​នៅប៉ែក​ខាងត្បូង​នៃ​ប្រទេសជប៉ុន។

រីឯក្រុមហ៊ុន​អាកាសចរណ៍​បារាំង​Air France​ បានដាក់​លក់តាំង​ពីម្សិលមិញ​មកម្ល៉េះ​នូវ​តម្លៃ​សំបុត្រ​យន្តហោះ​ពិសេស​ដែល​ធ្វើដំណើរ​ពីតូក្យូ​មកប៉ារីស​ដោយមិន​ត្រឡប់​ទៅវិញ។​ ទាំងនេះ​គឺដើម្បី​ឆ្លើយតប​ទៅនឹង​សេចក្តី​ត្រូវការ​របស់​អ្នកដំណើរ​ច្រើនឡើងៗ​ នារយៈ​ពេល​ប៉ុន្មានថ្ងៃ​ចុង​ក្រោយនេះ៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ