ភេរវនិយម

បិន ឡាដិនស្លាប់៖ ​ពិភពលោក​អបអរ​តែបារម្ភ​ខ្លាចក្រែង​មាន​ភេរវកម្ម​សងសឹក​

រដ្ឋអំណាច​​​អង់គ្លេស​ចាត់​វិធានការ​​សន្តិសុខ​​យ៉ាង​មុតមាំ​​​ដើម្បី​​ប្រយុទ្ធ​​ប្រឆាំង​​នឹង​ទង្វើ​​ភេរវកម្ម​
រដ្ឋអំណាច​​​អង់គ្លេស​ចាត់​វិធានការ​​សន្តិសុខ​​យ៉ាង​មុតមាំ​​​ដើម្បី​​ប្រយុទ្ធ​​ប្រឆាំង​​នឹង​ទង្វើ​​ភេរវកម្ម​ © REUTERS/Andrew Winning

ដំណឹង​មរណភាព​របស់​បិន​ ឡាដិន​ដែល​បាន​ត្រូវ​កងកម្លាំង​យោធា​អាមេរិក​បាញ់ស្លាប់​ ​ បាន​ត្រូវ​ប្រទេស​យ៉ាង​ច្រើន​លើសលុប​ក្នុងលោក​ទទួល​អបអរ​សាទរ។​ ក៏​ប៉ុន្តែ​នេះ​ពុំ​មែន​បាន​សេចក្តីថា​ ​ ជា​អវសានភាព​នៃ​ចលនា​ភេរវនិយម​អាល់កៃដា​ឡើយ។​ ពិភពលោក​ទាំងមូល​នៅ​តែ​បារម្ភ​ខ្លាច​មាន​ភេរវកម្ម​សងសឹក។

ផ្សាយពាណិជ្ជកម្ម

“​នៅទីបំផុត​យុត្តិធម៌​ជាអ្នក​ឈ្នះ”​ នេះ​ជាពាក្យ​សំដី​របស់​លោក​ប្រធានាធិបតី​អាមេរិក​បារ៉ាក់​អូបាម៉ា​នៅ​ក្នុង​សេចក្តី​ថ្លែង​ប្រកាស​ប្រាប់​ពី​មរណភាព​របស់​មេដឹកនាំ​ចលនា​ភេរវនិយម​អាល់កៃដា​អ៊ូសាម៉ា​ បិន​ ឡាដិន​ដែល​បាន​ត្រូវ​កងកម្លាំង​យោធា​អាមេរិក​បាញ់ស្លាប់។​ បិន​ ឡាដិន​ជាអ្នក​ទទួល​ខុស​ត្រូវ​ក្នុង​ការ​សម្លាប់​រង្គាល​ប្រជាជន​ស្លូតត្រង់​រាប់​ពាន់នាក់​នៅ​លើ​ពិភពលោក។​ ថ្វីដ្បិតតែ​បិន​ ឡាដិន​ស្លាប់មែន​ ក៏​ប៉ុន្តែ​ចលនា​ភេរវនិយម​អាល់កៃដា​នៅតែ​បន្ត​ធ្វើការ​គំរាម​ដល់​សហរដ្ឋ​អាមេរិក​និង​ពិភពលោក​ទាំងមូល​ ​ ដូច្នេះ​យើងត្រូវ​តែ​នាំគ្នា​ប្រុង​ប្រយ័ត្ន​ជានិច្ច។​ នេះ​ជាពាក្យ​សំដី​បញ្ជាក់​របស់​លោក​អូបាម៉ា។

 
ចំណែកឯ​នាយក​នៃ​ក្រុម​យកការសម្ងាត់​អាមេរិកាំង​CIA​ លោក​Leon Panetta បាន​ថ្លែង​ថា​ “​យើងបាន​វាយសំពង​យ៉ាង​ដំណំទៅលើ​បច្ចាមិត្ត​ក៏​ពិតមែន​ ប៉ុន្តែ​យើង​ត្រូវ​ប្រុង​ប្រយ័ត្ន​ចំពោះ​អំពើ​ភេរវកម្ម​សងសឹក​របស់​ពួក​អាល់កៃដា”។​ ស្ថានទូត​និង​កុងស៊ុល​អាមេរិក​នៅ​ប្រទេស​ប៉ាគីស្ថាន​បាន​ត្រូវ​បិទ​ទ្វារ​បណ្តោះ​អាសន្ន​ពុំ​ទទួល​សាធារណជន​មួយរយៈពេល​សិន។

រីឯ​ប្រមុខការទូត​នៃ​សហភាព​អឺរ៉ុប​លោក​ស្រី​Catherine Ashton​បាន​ថ្លែង​បញ្ជាក់​បន្ថែម​ថា​ “​គេ​ត្រូវ​តែ​នាំគ្នា​ប្រុង​ប្រយ័ត្ន​ប្រយុទ្ធ​ទប់ទល់​នឹង​ពួក​អាល់កៃដា​ដែល​ប្រុងប្រៀប​ធ្វើ​ភេរវកម្ម​សងសឹក​​មរណភាព​របស់​បិន​ ឡាដិន។

ប្រមុខ​ការទូត​អង់គ្លេស​លោក​William Hague ឯណោះវិញ​បាន​ថ្លែង​ប្រកាសថា​ "ទីក្រុង​ឡុងដ្រឹ៍​បាន​បញ្ជា​ឲ្យ​ស្ថានទូត​អង់គ្លេស​ទាំងអស់​នៅលើលោក​ចាត់​វិធានការ​សន្តិសុខ​យ៉ាង​មុតមាំ​ជា​បន្ទាន់​ដើម្បី​ប្រយុទ្ធ​ប្រឆាំង​នឹង​ទង្វើ​ភេរវកម្ម”។

អង្គការ​សហប្រតិបត្តិការ​នគរបាល​អន្តរជាតិ​Interpol​ឯណេះ​បាន​គូស​បញ្ជាក់​ប្រាប់​ពី​ “​ហានិភ័យ​ដ៏ខ្ពស់​នៃ​ទង្វើ​ភេរវកម្ម”​ដែល​អាច​កើតមាន​នៅ​លើ​ពិភពលោក។

ប្រទេស​ចិន​ដែល​ជា​ប្រទេស​ចុងក្រោយ​គេ​ក្នុងការ​បញ្ចេញ​ប្រតិកម្ម​នៅ​ចំពោះមុខ​ការបាញ់​សម្លាប់​​បិន​ ឡាដិន​បាន​ថ្លែងថា​ “​មរណភាព​របស់​បិន​ ឡាដិន​គឺ​ពិតជា​ដំណាក់ការ​មួយ​ថ្មី​នៃ​ការ​ប្រយុទ្ធ​ប្រឆាំង​នឹង​ភេរវនិយម​ហើយ​ទីក្រុង​ប៉េកាំង​បាន​អំពាវនាវ​ឲ្យ​មាន​ការ​ពង្រឹង​សហប្រតិបត្តិការ​ពិភពលោក”​។

ប្រទេស​អេហ្ស៊ីប​ដែលជា​ប្រទេស​ដើម​កំណើត​របស់​Ayman al-Zawahiri ដែល​ជា​ដៃស្តាំ​របស់​បិន​ ឡាដិន​បាន​ចាត់​វិធានការ​ពង្រឹង​សន្តិសុខ​នៅ​ព្រលាន​យន្តហោះ​នៃ​ទីក្រុង​គែរ​ជាបន្ទាន់។​ ជាពិសេស​ពាក់ព័ន្ធ​នឹង​ដំណើរ​យន្តហោះ​នៃ​ក្រុមហ៊ុន​អាកាសចរ​ណ៍Egyptair​ដែល​ត្រូវ​ហោះហើរ​ទៅកាន់​ទីក្រុង​អាមេរិកាំង​មាន​ដូចជា​ទីក្រុង​ញីវយ៉ក​ជាដើម។

ខុសពីគេ​ ប្រមុខ​រដ្ឋាភិបាល​ប៉ាលេស្ទីន​ហាម៉ាស​លោក​ហានីយេហ៍​បាន​ថ្កោល​ទោស​ទៅ​លើ​​ការ​វាយលុក​និង​ការ​បាញ់​សម្លាប់​មេដឹកនាំ​ចលនា​អាល់កៃដា​បិន​ ឡាដិន​ដោយ​សហរដ្ឋ​អាមេរិក។

ចំណែកឯ​មេដឹកនាំ​ចលនា​អ៊ីស្លាម​ជ្រុលនិយម​ឈ្មោះ​Omar Bakri ដែលបាន​ត្រូវ​ប្រទេស​អង់គ្លេស​បណ្តេញ​ចេញ​ក្រោយ​ពីមាន​ទង្វើ​ភេរវកម្ម​នៅ​ទីក្រុង​ឡុងដ្រឹ៍​នៅ​ឆ្នាំ២០០៥​បាន​ថ្លែង​ប្រកាស​ថា​ “​ប្រទេស​នៃ​ពិភព​អារ៉ាប់​បាន​បាត់បង់​មេដឹកនាំ​ដ៏​ឆ្នើម​របស់​គេ​មួយរូប។​ ដូច្នេះ​គេ​ត្រូវ​តែ​ដឹងថា​ នឹង​មាន​បេសកកម្ម​សងសឹក​នៅ​អឺរ៉ុប​ជា​ពុំខាន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI