ចិន

ការ​ផ្ទុះ​ឆេះ​នៅ​ក្នុង​ធនាគារ​មួយ​នៅ​ខេត្ត​ Gansu

ការ​ផ្ទុះ​គ្រាប់បែក​នៅ​ក្នុង​ធនាគារ​មួយ​នៅ​ខេត្ត​ Gansu
ការ​ផ្ទុះ​គ្រាប់បែក​នៅ​ក្នុង​ធនាគារ​មួយ​នៅ​ខេត្ត​ Gansu REUTERS/Xinhua/Lu Jianfeng

ប៉ែកពាយ័ព្យ​​ប្រទេស​​ចិន បាន​​ទទួល​រងគ្រោះ​ដោយ​ការគប់​គ្រឿង​ដុត​បញ្ឆេះមួយ​​នៅ​ព្រឹក​ថ្ងៃ​​សុក្រ ១៣ ឧសភា​នេះ។យោងតាម​ទីភ្នាក់ងារ​ពត៌មាន​ផ្លូវការ « ចិនថ្មី » ការ​វាយប្រហារ​ នេះ បាន​​សំដៅ​ទៅ​លើ​ធនាគារ​មួយ​។ ​ពុំ​មែន​ជា​សកម្មភាព​ភេរវនិយម​ទេ ប៉ុន្តែ ជា​​កាយវិការ​ដ៏​អស់​​សង្ឃឹម​​របស់​អតីត​បុគ្គលិក​​ធនាគារមួយរូប​​ប៉ុណ្ណោះ។ ឧប្បត្តិហេតុ នេះ​ បាន ​បណ្តាល​ឲ្យ​មាន​អ្នកត្រូវ​របួស​ជាច្រើន​នាក់។

ផ្សាយពាណិជ្ជកម្ម

យោងតាម​​ទីភ្នាក់ងារ​ព័ត៌មាន​ចិន “ប្រជាជន” ជន​សង្ស័យ​មួយ​​រូប​ ​បាន​ដុត​និងចោល​គ្រឿង​​បញ្ឆេះ​ ទៅ​លើ​ធនាគារ​តំបន់​​មួយ​នៅ​ក្រុង wuwei ​​នាពេល​ដែលបុគ្គលិក​ធនាគារ កំពុងតែធ្វើ​​ការ​រួម​ប្រជុំ​ការងារ​មួយ​នៅ​​ព្រឹកមិញ​នេះ ជាហេតុ​បណ្តាល​ឲ្យ​ភ្លើង​ឆាបឆេះ​អគារយ៉ាង​សន្ធោ​សន្ធៅ​។ ឧប្បត្តិហេតុនេះ កើតឡើង នៅ​ស្រុក Tianzu ប៉ែកពាយ័ព្យ​​ប្រទេស​​ចិន ដែល​​ជា​តំបន់​ស្វយ័ត និង​មាន​ប្រជាជន​ទីបេ​រស់នៅយ៉ាងច្រើន។

ប្រភព​ផ្លូវការ​ចិន​​នេះ បាន​ធ្វើ​តុល្យាការ​ជា​លើកដំបូង​ថា ការផ្ទុះឆេះនេះ បានបណ្តាល​ឲ្យ​មាន​​​ស្លាប់​និង​របួស​មនុស្ស​រាប់​​សិប​នាក់ មុននឹង​ជូន​ដំណឹង​ចុងក្រោយ​វិញថា ​គ្មានម​នុ​ស្ស​ស្លាប់​ ទេ គ្រាន់តែអ្នកត្រូវ​របួសចំនួន៣៩​នាក់ប៉ុណ្ណោះក្នុង​នោះក៏​មានអ្នក​របួស​ធ្ងន់​១៩​នាក់​ដែរ។
ទិនានុប្បវត្តិ”ប្រជាជន” ចិនវិញ ដែល​ដកស្រង់​តាម​ទូរទស្សន៍​​តំបន់ បាន​គូសបញ្ជាក់ថា “ទីស្នាក់ការ​​​ធនាគារ​​ ត្រូវ​បាន​ភ្លើង​ឆាបឆេះ​ ​គួរ​ឲ្យស្លុតរន្ធត់​បំផុត និងដែល ប្រហែល​ជាបង្ក​​ឡើងដោយ​​ជន​ដៃ​ដល់ម្នាក់ ធ្លាប់​ជា​អតីត​បុគ្គលិក​​នៃ​ធនាគារនេះ​ដែលត្រូវ​បាន​គេ​បញ្ឈប់​ពីការងារដោយមកពីមានកំហុសធ្ងន់ធ្ងរក្នុងការងារ។ ចំណែក​ទីភ្នាក់ងារ​ព័ត៌មាន​”ចិន​ថ្មី” ​វិញ បាន​រៀបរាប់​ពី​ទិដ្ឋភាព​នៃ គ្រោះថ្នាក់​នេះដែរ​ ​ថា” បុគ្គលិក​​ធនាគារជាច្រើន​រូប ដោយ​ហេតុ​តែ​​​ភ័យ​ស្លន់ស្លោ​ខ្លាំង​ពេក ពុំគិតឃើញអ្វីទាំងអស់ ក្រៅតែពី​នាំ​គ្នាលោត​ហក់​ចុះមកដី​ តាម​មាត់​បង្អួច​ ​នៅ​កន្លែង​ធ្វើការ​របស់​ខ្លួន​​​ដែល​ស្ថិត​នៅ​ជាន់​ទី​៤​នៃ​អគារ​ដើម្បី​គេចឲ្យផុត​​ពី​ចំណី​ភ្លើង។​ រីឯ​ ជន​ជាប់​មន្ទិល​សង្ស័យ​វិញ​ ក៏​ប្រហែល​ជា​រត់​គេច​ខ្លួន​រួច តែ​​ព័ត៌មាន​​​នេះ​ត្រូវ​បាន​បដិសេធ​​ពី​សំណាក់​នរគបាល។

រូបភាព​ផ្សេង​ៗទៀត ដែល​គេបាន​ឃើញតាមរយៈ​website ចិន​នាព្រឹកមិញនេះ ដែរ គឺ ​រូបភាព​​មន្រ្តីធនាគារ​ចិន​​មួយចំនួន​​ក្នុង​សំលៀក​បំពាក់​អាវធំ ​​ ដែល​បាន​​រងគ្រោះ​ រលាក​ខ្លួន​ ​ឬ​ ​អវយវៈ​នោះ  ​​ត្រូវ​បាន​ក្រុម​សង្គ្រោះ ដឹកជម្លៀស​ចេញពីកន្លែងគ្រោះថ្នាក់​​តាមរយៈ​គ្រែស្នែង ។ នៅទីបំផុត  ក្រុមសង្គ្រោះ​ ក៏បានសំរេចក្នុងការពន្លត់ភ្លើងអស់នៅ​រសៀល​ថ្ងៃ​សុក្រនេះ​ដែរ៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI