ប៉ាគីស្ថាន

ពួក​​​​តាលីបង់​​​ប្រកាស​​​ថា​​​ខ្លួន​​​ជា​​​អ្នក​​​បង្ក​​​ភេរវកម្ម​​​ប្រឆាំង​​​អាមេរិក​​​នៅ​​ថ្ងៃ​​សុក្រ​​នេះ

តាលីបង់​ប្រើ​គ្រឿង​ផ្ទុះ​បំផ្លាញ​រថយន្ត​របស់​ទូត​អាមេរិក​នៅ​ប៉ាគីស្ថាន
តាលីបង់​ប្រើ​គ្រឿង​ផ្ទុះ​បំផ្លាញ​រថយន្ត​របស់​ទូត​អាមេរិក​នៅ​ប៉ាគីស្ថាន ©Reuters

ប៉ាគីស្ថាន ​​​​ចាប់​​ផ្តើម​​​ទទួល​​​រងគ្រោះ​​​អំពើ​​​ហិង្សា​​​ខ្លាំង​​​ឡើង​​​វិញ​​ ចាប់តាំងពី​ពេល​​​បិនឡាដិន​ មេ​បណ្តាញ​ភេរវនិយម​អាល់កៃដា​ស្លាប់​នៅ​ក្នុង​ការ​វាយប្រហារ​​របស់​​កងកុម៉្មង់ដូ​​ពិសេស​ អាមេរិក កាល​ពី​​ថ្ងៃ​ទី​២​ឧសភា​កន្លង​មក។ នៅ​​ថ្ងៃ​​សុក្រ​ទី​២០​ ឧសភានេះ ពួក​តាលីបង់ ទើប​បាន​​ប្រកាស​​​​​​ថា ​​ខ្លួន​​បាន​ធ្វើ​ការ​​បំផ្ទុះ​គ្រាប់បែក​នៅ​ក្នុង​ រថយន្ត​មួយ​គ្រឿង ប្រឆាំង​ទៅ​លើ​ក្បួន​រថយន្ត​​នៃ​ស្ថាន​កុងស៊ុល​​​អាមេរិក​​នៅ​ក្រុង Peshawar ​ដែល​ស្ថិត​នៅ​ប៉ែក​ពាយ័ព្យ​ប្រទេស​ប៉ាគីស្ថាន។

ផ្សាយពាណិជ្ជកម្ម

លោក Alberto Rodriguez​ អ្នកនាំពាក្យ​​នៃ​ស្ថានទូត​អាមេរិកប្រចាំប៉ាគីស្ថាន បាន​ប្រកាស​​ប្រាប់​​​ថា “នៅក្នុង​អំពើភេរវកម្មនេះ ពុំ​មាន​ជនជាតិ​អាមេរិកាំង​ណា​ម្នាក់​ត្រូវ​​រងគ្រោះ​ស្លាប់ ​ឬ​ក៏​​រង​របួស​ធ្ងន់​នោះ​ទេ​។ ផ្ទុយទៅវិញ មាន​អ្នក​ថ្មើរជើង​​ម្នាក់​ត្រូវ​រងគ្រោះ​ស្លាប់ ​និង​ជនប៉ាគីស្ថាន​១០​​នាក់​ផ្សេង​​​​ទៀត​​ត្រូវ​រងរបួស។ ក៏ប៉ុន្តែ​យោងតាម មន្រ្តី​ប៉ូលិស​ប៉ាគីស្ថាន ​​ ភ្នាក់ងារ​សន្តិសុខ​​អាមេរិកាំង​​​​ពីរ​រូប​ ត្រូវ​រងរបួស​ស្រាល​នៅក្នុង​ភេរវកម្មបំផ្ទុះគ្រាប់បែក​​លើកនេះ។​

 មន្ត្រី​ប៉ូលិស ប៉ាគីស្ថាន​ដដែលនេះ បានថ្លែងទៀតថា  ពួក​ភេរវជន​ បាន​ដាក់​បង្កប់​គ្រឿង​ផ្ទុះ​ប្រមាណ​ជា​៥០ គីឡូក្រាម​​នៅ​ក្នុង​​រថយន្ត​មួយ​គ្រឿង ​ចត​នៅ​លើ​ផ្លូវ​ធំ​មួយ ​ដែល​ជា​សង្កា​​ត់​សំបូរ​អ្នកការទូត​លោក​ខាងលិចរស់នៅ​។ រថយន្ត​ស្ថានទូតអាមេរិក​មួយគ្រឿង ​ក្នុង​ចំណោម​ ពីរ​​​គ្រឿង​​​​ដែលត្រូវ​​​បើក​​​សំដៅ​ទៅ​ស្ថានកុងស៊ុល ត្រូវ​បានរង​​ប៉ះពាល់​ដោយ​ការបំ​ផ្ទុះនេះ។

ស្របគ្នានេះ អ្នក​នាំពាក្យ​ម្នាក់​នៃ ពួកឧទ្ទាម តាលីបង់​ នៅក្នុងប្រទេស ​ប៉ាគីស្ថាន បាន​និយាយ​​ប្រាប់​​​​ទីភ្នាក់ងារ​ព័ត៌មាន​ Reuters​ ​តាម​ទូរស័ព្ទ​ថា  ពួក​តាលីបង់​​ ​នឹង​​បន្ត​​​ការ​​វាយប្រហារ​បែប​​នេះ​ត​ទៅ​មុខទៀត  ប្រឆាំង​ទៅ​លើ​ក្រុម​អ្នក​ការទូត ​នៃ​បណ្តា​ប្រទេស​ណា​​​ដែល​ជា​សមាជិក​នៃ​អង្គការ​​អូតង់។

ម្យ៉ាងទៀត បណ្តាញ​ភេរវនិយម អាល់កៃដា និង​ពួកតាលីបង់ប៉ាគីស្ថាន ធ្លាប់​បាន​​សន្យា​រួច​មក​ហើយ​​ថា​ ពួក​គេនឹង​ធ្វើការ​​សងសឹកជាដាច់ខាត​ ជួស​ឲ្យ​ខ្មោច បិនឡាដិន។ ជាភ័ស្តុតាង  កាលពី​​​ថ្ងៃ​​ទី​ ​១៣​ឧសភា​​កន្លង​​ទៅ​នេះ ពួក​តាលីបង់​ប៉ាគីស្ថាន បាន​បង្ក អំពើ​ភេរវកម្ម​អត្តឃាត​ពីរលើក នៅ​មុខ​សាលាយោធា​​ប៉ូលិសប៉ាគីស្ថាន​មួយ ដែលស្ថិតនៅ​ប៉ែកពាយ័ព្យ​ប៉ាគីស្ថាន ជា​ហេតុ​​បណ្តាល​ឲ្យ​មាន​ស្លាប់ជន​ចំនួន ៨០​នាក់ ក្នុងចំណោមនេះ​ភាគច្រើន​ជា​ពួក​យុវជន​ដែលត្រូវបាន​​គេ​ជ្រើសរើស​ដើម្បីហ្វឹកហាត់​សំរាប់​ចូលបំរើនៅក្នុង​ជួរប៉ូលិស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI