កូរ៉េ

កូរ៉េខាងជើង​រៀបចំ​ធ្វើសមយុទ្ធ​

ប្រមុខ​ដឹកនាំ​កូរ៉េ​ខាងជើង​ គីម ចុងអ៊ីល
ប្រមុខ​ដឹកនាំ​កូរ៉េ​ខាងជើង​ គីម ចុងអ៊ីល © REUTERS/Andrew Gombert/Pool

ប្រទេស​កូរ៉េ​ខាងជើង​រៀបចំ​ធ្វើ​សមយុទ្ធ​ពិសេស​មួយ​ដែល​អាច​ចាប់ផ្តើម​នៅ​សប្តាហ៍នេះ​នៅ​ក្នុង​តំបន់​ដ៏​រសើប​មួយ​នៅ​សមុទ្រ​លឿង។​ សមយុទ្ធ​នេះ​មាន​ចូលរួម​ដោយ​កងកម្លាំង​ជើងទឹក​ ​ ជើងអាកាស​ ​ និង​កងកម្លាំង​ជើងគោក​ផងទៀត។

ផ្សាយពាណិជ្ជកម្ម

បើ​យោងតាម​ព័ត៌មាន​បាន​មកពី​កូរ៉េ​ខាងត្បូង​នៅ​ថ្ងៃអង្គារ​ទី២៦​កក្កដា​នេះ​ ​ ប្រទេស​កូរ៉េ​ខាងជើង​បាន​រៀបចំ​ប្រមូល​ផ្តុំ​នៅ​លំហ​សមុទ្រ​ជិត​កំពង់ផែ​ណាមប៉ូ​នូវ​នាវា​ចម្បាំង​របស់​គេ​ប្រមាណ​ម្ភៃប្លាយ​គ្រឿង​ ​ ដែល​ក្នុងនោះ​មាន​នាវា​ដឹកជញ្ជូន​ទ័ព​ផង​។​ ទីក្រុង​ព្យុងយ៉ាង​បាន​ដាក់ពង្រាយ​យន្តហោះ​ចម្បាំង​ Mig-21 ​របស់គេ​នៅ​មូលដ្ឋាន​Onchon​។​ នេះ​បើយោង​តាម​ទីភ្នាក់ងារ​កូរ៉េ​ខាងត្បូង​Yonhap។

 
បើយោងតាម​សារព័ត៌មាន​ JoongAng Daily ​ គេក៏បាន​ផ្តល់​ព័ត៌មាន​ដូចគ្នា​អ៊ីចឹងដែរ។​ សមយុទ្ធ​​របស់​កូរ៉េ​ខាងជើង​នេះ​ អាស្រ័យ​ទៅលើ​លក្ខណៈ​អាកាសធាតុ​ ​ ហើយ​ប្រហែលជា​អាច​ប្រព្រឹត្ត​ទៅ​ក្រោយថ្ងៃ​ពុធ​ស្អែក។​ នេះ​បើ​ផ្អែកលើ​ប្រភព​ព័ត៌មាន​ផ្សាយ​ឲ្យដឹង​ដោយ​ទីភ្នាក់ងារ​កូរ៉េ​ខាងត្បូង​Yonhap។

គួរបញ្ជាក់ថា​ ​ ថ្ងៃពុធ​ទី២៧​កក្កដា​ឆ្នាំ២០១១​គឺ​ជា​ថ្ងៃខួប​ទី៥៨ឆ្នាំ​នៃ​ការចុះ​ហត្ថលេខា​ទៅលើ​កិច្ច​ព្រមព្រៀង​យុទ្ធសន្តិភាព​ដែល​បាន​បិទបញ្ចប់​សង្គ្រាម​កូរ៉េ​ (​១៩៥០-១៩៥៣​)​។

សមយុទ្ធ​នៅ​រដូវក្តៅ​គឺជា​ការធម្មតា​ទៅហើយ​សម្រាប់​ប្រទេស​កូរ៉េ​ខាងជើង។​ ក៏ប៉ុន្តែ​ អ្វីដែល​ចម្លែក​គឺ​ការ​ធ្វើ​សមយុទ្ធ​ដោយ​កងកម្លាំង​យោធា​ទាំងជើងទឹក​ ​ ជើងអាកាស​ ​ និង​ជើងគោក​នៅ​ពេល​ជាមួយគ្នា​ ​ ហើយ​នៅ​ចំពេល​ថ្ងៃខួប​នៃ​ការចុះ​ហត្ថលេខា​ទៅលើ​កិច្ច​ព្រមព្រៀង​យុទ្ធសន្តិភាព។

សមយុទ្ធ​របស់​កូរ៉េ​ខាងជើង​នេះ​អាចជា​ចម្លើយ​ឆ្លើយតប​ទៅនឹង​ការពង្រឹង​កម្លាំង​យោធា​របស់​ទីក្រុង​សេអ៊ូល​ដើម្បី​ការពារ​កោះ​ដែលឋិត​នៅ​ព្រំដែន​កូរ៉េ​ទាំងពីរ​នៅ​សមុទ្រ​លឿង​ ​ ដែល​ធ្លាប់​ជា​ឆាក​ប្រយុទ្ធគ្នា​មួយ​ដ៏​សាហាវ​កាលពី​ឆ្នាំទៅ។

គួរកត់​សម្គាល់ថា​ ​ កាលពី​ថ្ងៃចន្ទ​ម្សិលមិញ​ ​ ប្រមុខ​ដឹកនាំ​កូរ៉េ​ខាងជើង​ គីម ចុងអ៊ីល​និង​កូនប្រុស​គីម ចុងអ៊ុន​បាន​ទៅ​ទីបញ្ជាការ​នៃ​កងកម្លាំង​ជើងទឹក​កូរ៉េ​ខាងជើង​នៅ​ទីក្រុង​ព្យុងយ៉ាង។​ ការទៅ​ទីបញ្ជាការ​នៃ​កងកម្លាំង​ជើងទឹក​បែបនេះ​ ​ ជាការ​កើតមាន​ជាលើក​ទីមួយ​ហើយ​ចាប់តាំងពី​ឆ្នាំ២០០២មក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI