ចិន

មនុស្ស​ស្លាប់​យ៉ាង​តិច​ ៥៧​នាក់​នៅ​ក្នុង​ទឹក​ជំនន់​

ក្រុម​​អ្នក​ជួយ​​សង្គ្រោះ ​ចង​រឹតទប់​​កប៉ាល់​​មួយ​គ្រឿង​​នឹង​​ខ្សែពួរ​យ៉ាង​មាំ​​(រួបស្តាំ)ឲ្យ​​នៅ​នឹង​​មួយ​កន្លែង​​នៅ​តំបន់​​លិច​ទឹក​​នៅ​​Chongqing​​ថ្ងៃ​​ទី​​២០​​កញ្ញា​​២០១១។​
ក្រុម​​អ្នក​ជួយ​​សង្គ្រោះ ​ចង​រឹតទប់​​កប៉ាល់​​មួយ​គ្រឿង​​នឹង​​ខ្សែពួរ​យ៉ាង​មាំ​​(រួបស្តាំ)ឲ្យ​​នៅ​នឹង​​មួយ​កន្លែង​​នៅ​តំបន់​​លិច​ទឹក​​នៅ​​Chongqing​​ថ្ងៃ​​ទី​​២០​​កញ្ញា​​២០១១។​ REUTERS/Stringer

ភ្លៀង​ធា្លក់​​ខ្លាំង​​ឥត​ឈប់ឈរ តាំងពី​មួយ​សប្តាហ៍​​មក​ហើយ​នៅ​តាម​បណ្តា​ខេត្ត​ជា​ច្រើន​នៅ​ប្រទេស​ចិន​ដូច ​ជា​នៅ Sichuan​(ប៉ែក​និរតី) Shaanxi​(ខាងជើង) និង​នៅ Henan​(ប៉ែក​កណ្តាល)​ប្រទេស ជាហេតុ​បណ្តាល​​ឲ្យ​មាន​ទឹក​ជំនន់​ដ៏ធំ។ គ្រោះ​មហន្តរាយ​ទឹក​ជំនន់​បាន​បណ្តាល​ឲ្យ​មនុស្ស​ស្លាប់​យ៉ាង​តិច​ចំនួន ៥៧ នាក់​បាត់​ខ្លួន​ ជា​ច្រើន​សិប​នាក់​ទៀត។ ស្របគ្នានេះដែរ ប្រជាជន​​ចិន​ប្រមាណ​ជាង​១​លាន​នាក់​ត្រូវ​បង្ខំ​ចិត្ត​ជម្លៀស​ខ្លួន​ចេញ​ពី​ ផ្ទះសម្បែង​របស់​ខ្លួន។ នេះ ​បើយោងតាម​ការជូនដំណឹង​របស់​អាជ្ញាធរចិន​នៅថ្ងៃអង្គារ​២០​កញ្ញានេះ។

ផ្សាយពាណិជ្ជកម្ម

នៅ​ក្នុង​សេចក្តី​ជូន​ដំណឹង​មួយ​របស់​ក្រសួង​កិច្ចការ​ស៊ីវិល​ចិន​នៅ​ថ្ងៃ​ចន្ទ​១៩​កញ្ញា​ម្សិលមិញ​បាន​​ឲ្យ​ដឹង​ថា ប្រជាជន​ចិន​ចំនួន ១​លាន​២​សែន​នាក់ បាន​ជម្លៀស​ចេញ​ហើយ​ពី​លំនៅឋាន​របស់​ខ្លួន ​ដោយ​​សរុប​ ប្រជាជន​​ចំនួន ១២​លាន​៣​សែន​នាក់​ត្រូវ​ទទួល​រង​ផល​ប៉ះពាល់​ដោយ​គ្រោះ​មហន្តរាយ​ទឹក​ជំនន់។

ម្យ៉ាងទៀត​ទឹក​ជំនន់​នេះ ក៏​ញុំាង​ឲ្យ​មាន​ផលវិបាក​ដ៏​ធ្ងន់ធ្ងរ​ដែរ ពីព្រោះ​ លំនៅឋាន​ចំនួន ១២​ម៉ឺន​កន្លែង ត្រូវ​អន្តរាយ​​ដោយ​ដួល​រលំ រីឯ​ការ​ខូចខាត​ខាង​ផ្នែក​សេដ្ឋកិច្ច​វិញ បើគិត​ជា​ទឹកប្រាក់ មាន​ចំនួន ប្រមាណ​ជា​១​ម៉ឺន​៧២៧០​លាន​យ័ន ឬ​ស្មើ​នឹង ១៩៨០​លាន​អឺរ៉ូ។

ទន្ទឹមគ្នានេះ ក្រុម​​អ្នក​ជួយ​​សង្គ្រោះ បាន​ធ្វើ​ដំណើរ​ជា​បន្ទាន់​ទៅ​កាន់​ទីកន្លែង​រងគ្រោះ ដើម្បី នាំ​យក ជំរំ​​សំពត់ ភួយ​និង​សម្លៀក​បំពាក់​យក​ទៅ​ចែក​ចាយ​ឲ្យ​ដល់​ជន​រងគ្រោះ​ដោយ​ទឹក​ជំនន់។

ឥឡូវនេះ​កម្រិត​ទឹក​នៅ​ដៃ​ទន្លេ​ខ្លះ​ជាអាទិ៍​នៅ Yangtsé ដែល​ជា​ទន្លេ​ដ៏​វែង​ជាង​គេ​នៅ​ក្នុង​ប្រទេស​ចិន បាន​បន្ត​កើន​ឡើង​​ប្រកប​ដោយ​​គ្រោះ​ថ្នាក់​បំផុត​នៅ​ទី​កន្លែង​ជា​ច្រើន​​ទៀត បើទោះបី​ជា ភ្លៀង​បាន​ឈប់​ធ្លាក់​មួយ​រយៈពេល​ក្តី។

នៅ​ឯ​ខេត្ត​ Sichuan​វិញ ទឹក​ស្ទឹង​Jialing បាន​ឡើង​ហួស​កំពស់​​៧​ម៉ែត្រ​ហើយ​ដែល​ជា​កម្រិត​អាសន្ន​​​អាច​បណ្តាល​ឲ្យ​មាន​ជំនន់ ហើយ ទឹក​ស្ទឹង Jialing នេះ​​អាច​នឹង​កើន​​ឡើង​ដល់​កម្រិត​ខ្ពស់​បំផុត​ដូច​ធ្លាប់​មាន​ម្តង​នៅ​​ឆ្នាំ​១៨៤៧។
 
ជារៀង​រាល់​ឆ្នាំ ប្រទេស​ចិន តែង​តែ​ទទួល​រង​គ្រោះ​​ដោយ​ទឹក​ជំនន់​ដែល​បណ្តាល​មក​ពី​​​ភ្លៀង​ធ្លាក់​ខ្លាំង​ពេក​នៅ​ចុង​រដូវ​ក្តៅ​។ ដូចជា​​​នៅ​​ឆ្នាំ ២០១០​កន្លង​ផុត​ទៅ​នេះ គ្រោះធម្មជាតិនេះ បាន​សម្លាប់​ជីវិត​មនុស្ស​ឬ​ក៏ បណ្តាល​ឲ្យ​បាត់​ខ្លួនជន ​ប្រមាណ​ជាង ៤៣០០​នាក់។ ​គ្រាន់តែ​នៅ​ខែ​សីហា​ឆ្នាំ២០១០ ការ​បាក់ស្រុត​ដី​នៅ​ខេត្ត Gansuដែល​ស្ថិត នៅ​ប៉ែក​ពាយ័ព្យ​នៃ​ប្រទេស​ចិន បាន​សម្លាប់​មនុស្ស​អស់​១៥០០​នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI