អានតួអត្ថបទ
ទួរគី

សន្និសីទ​អន្តរជាតិ​ស្តីពី​អាហ្វហ្កានិស្ថាន​

រដ្ឋមន្ត្រី​ការបរទេស​​ទួរគី​ លោក​ Ahmet Davutoglu​ (ស្តាំ​​)​ក្នុង​សន្និសីទ​សារព័ត៌មាន​រួម​មួយ​​ជាមួយ​​សម​ភាគី​​អាហ្វហ្កានិស្ថាន​​Zalmai​ Rassoul ​​នា​ឱកាស​​សន្និសីទ​​អន្តរជាតិ​​ស្តីពី​​អាហ្វហ្កានិស្ថាន​​នៅ​​Istanbul​​ថ្ងៃ​ទី​២​​វិច្ឆិកា​​២០១១។​​
រដ្ឋមន្ត្រី​ការបរទេស​​ទួរគី​ លោក​ Ahmet Davutoglu​ (ស្តាំ​​)​ក្នុង​សន្និសីទ​សារព័ត៌មាន​រួម​មួយ​​ជាមួយ​​សម​ភាគី​​អាហ្វហ្កានិស្ថាន​​Zalmai​ Rassoul ​​នា​ឱកាស​​សន្និសីទ​​អន្តរជាតិ​​ស្តីពី​​អាហ្វហ្កានិស្ថាន​​នៅ​​Istanbul​​ថ្ងៃ​ទី​២​​វិច្ឆិកា​​២០១១។​​ REUTERS/Murad Sezer
ដោយ៖ វីនស្តុន រតនា
១៤ នាទី

សន្និសីទ​អន្តរជាតិ​ស្តី​ពី​អាហ្វហ្កានិស្ថាន​បើក​នៅ​ថ្ងៃ​ពុធ​២​ វិច្ឆិកា​នេះ​ នៅ​ទី​ក្រុង​Istanbul​។​គឺ​ជា​សន្និសីទ​ស្តី​ពី​សហប្រតិបត្តិការ​និង​ សន្តិសុខ​ក្នុង​ភូមិភាគ​ ដើម្បី​ពិនិត្យ​មើល​ការចាក​ចេញ​នៃ​កងទ័ព​បរទេស​ដែល​នឹង​ត្រូវ​បញ្ចប់​ នៅ​ឆ្នាំ​២០១៤​។​ប្រទេស​និង​អង្គការ​នានា​ ដោយ​សរុប​ ចំនួន​២០​រួម​មាន​ប្រទេស​ជិត​ខាង​នឹង​អាហ្វហ្កានិស្ថាន​ចូល​រួម​ក្នុង​ សន្និសីទ​បើក​នៅ​ទីក្រុង​ដ៏​ធំ​Istanbul​នៃ​ប្រទេស​ទួរគី​។​ក៏​ចូល​រួម​ ក្នុង​សន្និសីទ​នេះ​ដែរ​គឺ​លោក​ប្រមុខ​ការទូត​បារាំង​Alain​ Juppé​និង​អាល្លឺម៉ង់​ Guido​ Westerwelle​ហើយ​និង​អ្នក​តំណាង​សមាជិក​អចិន្ត្រៃយ៍​ដទៃ​ទៀត​នៃ​ក្រុម​ ប្រឹក្សា​សន្តិសុខ​អ.ស.ប.​។

ផ្សាយពាណិជ្ជកម្ម

អ្នក​ចូល​រួម​ក្នុង​សន្និសីទ​ នៅ​ទី​ក្រុង​Istanbul​សង្ឃឹម​តិច​តួច​ទៅ​លើ​ដំណើរ​ជឿន​លឿន​ទៅ​មុខ​ នៅ​ក្នុង​សំណុំ​រឿង​អាហ្វហ្កានិស្តង់​ដ៏​ស្មុគ​ស្មាញ​សាំញ៉ាំ​។​គោល​ដៅ​ប្រកាស​ចេញ​មក​ពុំ​មាន​ទំហំ​ធំ​ដុំ​ប៉ុន្មាន​ទេ​។​អាហ្វហ្កានិស្តង់​សង្កត់​ធ្ងន់​ទៅ​លើ​ការពង្រឹង​សហប្រតិបត្តិការ​ក្នុង​ភូមិភាគ​ ដើម្បី​ធានា​រ៉ាប់​រង​សន្តិសុខ​ ​ ​ ស្ថិរភាព​និង​ភាព​ចម្រុង​ចម្រើន​នៃ​ប្រទេស​ នៅ​ក្នុង​ភូមិភាគ​។

ប៉ាគីស្តង់​ជា​ប្រទេស​ដែល​ដើរ​តួ​នាទី​ជា​គន្លឹះ​មួយ​ នៅ​ក្នុង​អធិករណ៍​អាហ្វហ្កានិស្តង់​ ​ ​ ចង់​រក្សា​ទុក​ដើម​គំនិត​នៅ​នឹង​កន្លែង​។​កងទ័ព​ប៉ាគីស្តង់​ត្រូវ​រដ្ឋាភិបាល​ក្រុង​កាប៊ូល​មន្ទិល​សង្ស័យ​ថា​ គាំទ្រ​ពួក​តាលីបង់​ ដើម្បី​ពង្រឹង​ឥទ្ធិពល​ខ្លួន​ នៅ​ក្នុង​ភូមិភាគ​ ជាអាទិ៍​ នៅ​ក្នុង​ទស្សនវិស័យ​នៃ​ការដក​ប្រកាស​រួច​ហើយ​នៃ​កងកម្លាំង​ទ័ព​បរទេស​ចេញ​ពី​អាហ្វហ្កានិស្តង់​។

ទួរគី​ខំ​ប្រឹង​ធ្វើ​ឱ្យ​ប្រទេស​ទាំង​ពីរ​ខិត​ចូល​ជិត​គ្នា​។​នៅ​ថ្ងៃ​អង្គារ​ម្សិល​មិញ​ ​ មុន​សន្និសីទ​អន្តរជាតិ​ ​ លោក​ប្រធានាធិបតី​អាហ្វហ្កានិស្តង់​ Hamid​ Karzaï​ ​ ​ ប៉ាគីស្តង់​Asif​ Zardari​និង​ទួរគី​Abdullah​ Gül​បាន​ជួប​គ្នា​ ដោយ​ប៉ុន​ប៉ង​ពុះពារ​ជម្នះ​លើ​ការខ្វែង​គំនិត​គ្នា​និង​បើក​សករាជ​ថ្មី​នៃ​សហប្រតិបត្តិការ​។

លោក​ប្រធានាធិបតី​អាហ្វហ្កានិស្តង់​ នៅ​ថ្ងៃ​ពុធ​២​វិច្ឆិកា​នេះ​ប្រហែល​ជា​ត្រូវ​បង្ហើប​ឱ្យ​ដឹង​បញ្ជី​ទី២​រាយ​ឈ្មោះ​មណ្ឌល​ដែល​ការទទួល​ខុស​ត្រូវ​ផ្នែក​សន្តិសុខ​អាច​នឹង​ត្រូវ​ផ្ទេរ​ពី​កណ្តាប់​ដៃ​អង្គការ​អូតង់​ទៅ​ក្នុង​កណ្តាប់​ដៃ​កងទ័ព​អាហ្វហ្កានិស្តង់​វិញ​ នៅ​ក្នុង​ក្រប​ខ័ណ្ឌ​នៃ​ដំណើរការ​ដក​កង​កម្លាំង​ទ័ព​អន្តរជាតិ​ ចាប់​ពី​ពេល​នេះ​រហូត​ដល់​ចប់​ឆ្នាំ​២០១៤​។​ស្រុក​ឬ​ខែត្រ​ ដោយ​សរុប​ចំនួន​១៧​ស្ថិត​នៅ​ក្នុង​បញ្ជី​នេះ​ បន្ទាប់​ពី​ការប្រកាស​កាល​ពី​ខែ​មីនា​មុន​ អំពី​ការចាប់​ផ្តើម​ផ្ទេរ​សន្តិសុខ​នៅ​ក្នុង​អំឡុង​ឆ្នាំ​នេះ​ សំរាប់​ខែត្រ​បី​និង​ទីក្រុង​បួន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ