ចិន-ការពារជាតិ

ទីក្រុង​ប៉េកាំង​​ធ្វើសមយុទ្ធ​នាវា​នៅមហា​សមុទ្រ​ប៉ាស៊ីហ្វិក​នៅចុងខែ​វិច្ឆិកា​

នាវា​​ដឹកយន្តហោះ​​របស់​​កងកម្លាំង​​ជើងទឹក​​ចិននៅ​​កំពង់ផែ​ Dalian​
នាវា​​ដឹកយន្តហោះ​​របស់​​កងកម្លាំង​​ជើងទឹក​​ចិននៅ​​កំពង់ផែ​ Dalian​ © REUTERS/Stringer/Files

កងកម្លាំង​យោធាចិន​បាន​ប្រកាស​ថា​ ​ នឹង​រៀបចំ​ធ្វើ​សមយុទ្ធ​នាវា​នៅ​ប៉ែក​ខាងលិច​នៃ​មហាសាគរ​ប៉ាស៊ីហ្វិក​នៅ​ចុងខែ​វិច្ឆិកា​ឆ្នាំ២០១១។​ ទាំងនេះ​ នៅក្នុង​បរិបទ​ដ៏តានតឹង​កើតមាន​នៅ​លើ​ដែនដី​ដែល​ឈ្លោះ​ដណ្តើមគ្នា​ជាមួយ​ប្រទេស​ជិតខាង។

ផ្សាយពាណិជ្ជកម្ម

“​កងកម្លាំង​ជើងទឹក​ចិន​នឹង​រៀបចំ​ធ្វើ​សមយុទ្ធ​នាវា​នៅ​ប៉ែក​ខាងលិច​នៃ​មហាសាគរ​ប៉ាស៊ីហ្វិក​នៅ​ចុងខែ​វិច្ឆិកា​ឆ្នាំ២០១១​”​ ​ នេះ​ជាការ​ប្រកាស​ឲ្យដឹង​នៅ​ល្ងាច​ថ្ងៃពុធ​ម្សិលមិញ​ដោយ​ក្រសួង​ការពារ​ជាតិចិន។

 
ក្រសួង​ការពារ​ជាតិចិន​បាន​បញ្ជាក់​ទៀតថា​ ​ “​សមយុទ្ធ​នាវា​នៅ​ប៉ែក​ខាងលិច​នៃ​មហាសាគរ​ប៉ាស៊ីហ្វិក​នេះ​ ​ មាន​គ្រោង​នៅក្នុង​ប្រតិទិន​ប្រចាំឆ្នាំ​ ​ ហើយគ្មាន​ធ្វើ​សំដៅ​ទៅលើ​ប្រទេស​ណា​ជាពិសេស​ឡើយ”។

ក៏ប៉ុន្តែ​ “​សមយុទ្ធ​នាវា​នៅ​ប៉ែក​ខាងលិច​នៃ​មហាសាគរ​ប៉ាស៊ីហ្វិក​នេះ​”​ នឹងត្រូវ​ធ្វើ​ចំ​ក្រោយ​ពេល​ទស្សនកិច្ច​របស់​លោក​ប្រធានាធិបតី​អាមេរិក​បារ៉ាក់​អូបាម៉ា​នៅ​តំបន់​អាស៊ី-ប៉ាស៊ីហ្វិក​ ​ ហើយ​ដែល​នៅ​ឱកាស​នោះ​លោក​អូបាម៉ា​បាន​ប្រកាស​ឲ្យដឹងថា​ ​ សហរដ្ឋ​អាមេរិក​នឹង​ពង្រឹង​វត្តមាន​យោធា​របស់​ខ្លួន​នៅ​ប្រទេស​អូស្ត្រាលី។

រីឯ​បញ្ហា​មហិច្ឆតា​របស់​​ទីក្រុង​ប៉េកាំង​នៅ​តំបន់​ដែនសមុទ្រ​ឋិត​នៅ​ប៉ែក​ខាងលិច​នៃ​មហាសាគរ​ប៉ាស៊ីហ្វិក​ក៏បាន​ត្រូវគេ​លើក​យកមក​និយាយ​នាឱកាស​ជំនួប​កំពូល​ប្រចាំឆ្នាំ​របស់​អាស៊ាន​ហើយនិង​នៅក្នុង​ជំនួប​កំពូល​អាស៊ី-បូព៌ា​នៅ​កោះបាលី​នៃ​ប្រទេស​ឥណ្ឌូនេស៊ី​កាលពី​សប្តាហ៍មុន​ដែរ។

សមយុទ្ធ​របស់​ទីក្រុង​ប៉េកាំង​នេះ​បាន​ត្រូវគេ​ចាត់ទុកថា​ ​ ជា​ចម្លើយ​ឆ្លើយតប​ទៅនឹង​សមយុទ្ធ​នាវា​រួមគ្នា​អាមេរិក-ជប៉ុន​ ​ អាមេរិក-ហ្វីលីពីន​ ​ ឬ​អាមេរិក-កូរ៉េខាងត្បូង។

គួរបញ្ជាក់ថា​ ​ ប្រទេស​វៀតណាម​ ​ ហ្វីលីពីន​ ​ និង​កោះតៃវ៉ាន់​តែង​ប៉ះទង្គិច​ជាមួយ​ប្រទេស​ចិន​ពាក់ព័ន្ធ​នឹង​បញ្ហា​អធិបតេយ្យ​នៃ​ទីប្រជុំកោះ​នៅ​សមុទ្រចិន​ខាងត្បូង​ដែល​ល្បីថា​សម្បូណ៌​ទៅដោយ​ប្រេងកាត​ ​ មាន​ជាអាទិ៍​ ​ ទីប្រជុំកោះ​ Spratleys ​ដែល​ទីក្រុង​ប៉េកាំង​តែង​ប្រកាសថា​ជា​កម្មសិទ្ធិ​របស់​ខ្លួន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI