អាស៊ី-សេដ្ឋកិច្ច​

កំណើន​សេដ្ឋកិច្ច​អាស៊ី​ដ៏ខ្លាំងក្លា​នៅចំពោះមុខ​សេដ្ឋកិច្ច​ទ្រុឌទ្រោម​នៃតំបន់​អឺរ៉ូ​

ទីក្រុង​សៀងហៃ​ដ៏ជឿនលឿន​របស់​ប្រទេសចិន
ទីក្រុង​សៀងហៃ​ដ៏ជឿនលឿន​របស់​ប្រទេសចិន DR/Wikipedia

តំបន់​អាស៊ី-ប៉ាស៊ីហ្វិក​ដែល​ធ្លាប់​តែ​បាន​ត្រូវ​អូសទាញ​ដោយ​សេដ្ឋកិច្ច​នៃ​តំបន់​ដទៃទៀត​ ​ ឥឡូវនេះ​បាន​ប្រែក្លាយ​ទៅជា​តំបន់​មួយ​ដែល​មាន​កម្លាំង​សេដ្ឋកិច្ច​ដ៏​សែន​ខ្លាំងក្លា។​ សេដ្ឋកិច្ច​អាស៊ី-ប៉ាស៊ីហ្វិក​បាន​ក្លាយ​ទៅជា​ក្បាល​ម៉ាស៊ីន​ជួយ​អូសទាញ​សេដ្ឋកិច្ច​ពិភពលោក​ ​ ហើយ​ប្រាក់​បម្រុង​ទុក​ដ៏​ច្រើន​លើសលុប​របស់​តំបន់​អាស៊ី​ក៏​បាន​ទាក់ទាញ​យ៉ាងខ្លាំង​សហរដ្ឋ​អាមេរិក​និង​តំបន់​អឺរ៉ូ​ផង​ទៀត។

ផ្សាយពាណិជ្ជកម្ម

នៅចុងឆ្នាំ២០១១​ ​ កំណើន​សេដ្ឋកិច្ច​របស់​សហរដ្ឋ​អាមេរិក​ឃើញមាន​កម្រើក​កើនឡើង​យ៉ាង​តិចទាប។​ ចំណែកឯ​អឺរ៉ុបឯណេះ​ ​ កំពុងជួប​នឹង​វិបត្តិ​សេដ្ឋកិច្ច​និង​វិបត្តិ​ហិរញ្ញវត្ថុ​យ៉ាងសែន​ធ្ងន់ធ្ងរ​ពុំដែល​កើតមាន​នារយៈ​ពេល​ប៉ុន្មាន​ទសវត្សរ៍​ចុងក្រោយនេះ។​ រីឯ​ប្រទេស​ប្រេស៊ីល​ដែល​ជា​មហា​អំណាច​សេដ្ឋកិច្ច​នៅ​អាមេរិក​ខាងត្បូង​ក៏​មាន​កំណើន​សេដ្ឋកិច្ច​សឹងតែ​សូន្យ​ ​ លើកលែងតែ​តំបន់​អាស៊ី​តែមួយគត់​ដែលមាន​កំណើន​សេដ្ឋកិច្ច​ខ្លាំងក្លា។

ការស្ទុះកើន​ឡើង​ខ្លាំង​ក្នុង​វិស័យ​សេដ្ឋកិច្ច​ក៏​បាន​ភ្ជាប់​មក​ជាមួយ​នូវ​ឥទ្ធិពល​ខ្លាំងក្លា​ក្នុង​វិស័យ​ការទូត​ផងដែរ។

ហេតុ​ដូច្នេះហើយ​បាន​ជា​គេ​ឃើញ​លោក​ប្រធានាធិបតី​អាមេរិក​បារ៉ាក់​អូបាម៉ា​ ​ នាឱកាស​ជំនួប​កំពូល​ហ្វ័រូម​សេដ្ឋកិច្ច​អាស៊ី-ប៉ាស៊ីហ្វិក​នៅ​កោះ​ហាវៃ​នៅ​ពេល​កន្លងទៅនេះ​បាន​គូស​បញ្ជាក់​ប្រាប់​ពី​ការ​ប្តូរ​ប្រែ​ទិសដៅ​យុទ្ធសាស្ត្រ​នៃ​នយោបាយ​អាមេរិកាំង​បែរ​ទៅរក​តំបន់​អាស៊ី-ប៉ាស៊ីហ្វិក។​ លោក​អូបាម៉ា​មានទាំង​គម្រោង​បង្កើត​ឲ្យ​មាន​ជា​ “ដៃគូ​អន្តរប៉ាស៊ីហ្វិក”​ឬ​ “Transpacific Partnership” ​ដែល​នឹង​ធ្វើឲ្យ​តំបន់​ប៉ាស៊ីហ្វិក​ក្លាយ​ទៅជា​តំបន់​ដោះដូរ​សេដ្ឋកិច្ច​សេរី​ធំ​ជាងគេ​ក្នុង​លោក​ទៀតផង។

អត្រា​នៃ​កំណើន​សេដ្ឋកិច្ច​អាស៊ី​មាន​ខ្ពស់ជាង​អត្រា​កំណើន​សេដ្ឋកិច្ច​របស់​ប្រទេស​អឺរ៉ុប​និង​សហរដ្ឋ​អាមេរិក​ច្រើនណាស់។​ មកទល់ពេលនេះ​ ​ វិបត្តិ​សេដ្ឋកិច្ច​និង​វិបត្តិ​ហិរញ្ញវត្ថុ​នៅ​អឺរ៉ុប​នៅ​ពុំ​ទាន់​បាន​ធ្វើ​ឲ្យ​ប៉ះពាល់​ខ្លាំង​ដល់​សេដ្ឋកិច្ច​នៃ​ប្រទេស​អាស៊ី​នៅឡើយ។​ ក៏​ប៉ុន្តែ​សម្រាប់​អ្នកវិភាគ​ជាច្រើន​គេ​ប្រមាណ​ថា​ ​ សេដ្ឋកិច្ច​អាស៊ី​អាចនឹង​ស្គាល់​ការ​ខូចខាត​ខ្លាំង​នៅ​ឆ្នាំ២០១២​ខាងមុខ​ ​ បើប្រសិនជា​សេដ្ឋកិច្ច​អឺរ៉ុប​ធ្លាក់​ទៅក្នុង​ដំណើរ​សេដ្ឋកិច្ច​ដើរ​ថយក្រោយ។​ ទាំងនេះ​ ដោយហេតុតែ​សេដ្ឋកិច្ច​អាស៊ី​ជា​សេដ្ឋកិច្ច​ពឹងផ្អែក​លើ​ការ​នាំចេញ​ទៅលក់​ក្រៅប្រទេស។

ប្រទេសចិន​និង​ប្រទេស​ឥណ្ឌា​ដែលជា​មហាអំណាច​សេដ្ឋកិច្ច​ដ៏​សំខាន់​នៅ​អាស៊ី​បាន​ចាប់​ជួប​នឹង​បញ្ហា​សន្ទុះ​កំណើន​សេដ្ឋកិច្ច​ធ្លាក់​ស្រុតចុះ​ដ៏​គួរឲ្យ​កត់​សម្គាល់​ ​ ដោហេតុថា​ នៅត្រីមាស​ទីបី​ឆ្នាំ២០១១​នេះ​ ​ គេ​ឃើញ​ការនាំ​ចេញ​ ​ ការទិញដូរ​ហូបចុក​ផ្ទៃក្នុង​ ​ហើយនិង​ផលិតផល​បាន​ស្គាល់​ការ​ធ្លាក់​ស្រុតចុះ។

ចំណែកឯ​ហុងកុង​ ​ សិង្ហបុរី​ ​ កូរ៉េ​ខាងត្បូង​និងតៃវ៉ាន់​ក៏​ពុំ​ខុស​គ្នា​ប៉ុន្មានឡើយ​នៅចុងឆ្នាំ២០១១​នេះ​ ​ គេឃើញ​អត្រា​នៃ​កំណើន​សេដ្ឋកិច្ច​ជួបនឹង​ការធ្លាក់​ស្រុតចុះ។

រីឯ​ប្រាក់​បម្រុងទុក​ដ៏​ច្រើន​លើសលុប​របស់​ប្រទេស​ចិន​ដែលមាន​ដល់ទៅ​៣ ២០០ពាន់លាន​ដុល្លារ​នៅ​ចុងខែ​កញ្ញានេះ​បានទាក់ទាញ​​យ៉ាង​ខ្លាំង​ប្រទេស​អឺរ៉ុប​ ​ ដោយ​ពួកគេ​សង្ឃឹមថា​ ​ ប្រាក់​បម្រុងទុក​ដ៏​ច្រើន​លើសលុប​របស់​ចិន​ អាច​មក​បោះទុន​ក្នុង​មូលនិធិ​អឺរ៉ុប​សម្រាប់​រក្សា​ស្ថិរភាព​ហិរញ្ញវត្ថុ​ FESF របស់​អឺរ៉ុប៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI