ជប៉ុន

នាយករដ្ឋមន្ត្រីជប៉ុន​អញ្ជើញ​ទៅ​ប្រទេសចិន​ដើម្បី​ពិភាក្សា​បញ្ហា​កូរ៉េ​ខាងជើង​

លោក Yoshihiko Noda នាយករដ្ឋមន្ត្រីជប៉ុន​និង​​លោក​នាយក​រដ្ឋមន្ត្រី​​ចិន​​ Wen Jiabao​ នៅថ្ងៃទី​២៥​ធ្នូឆ្នាំ២០១១​
លោក Yoshihiko Noda នាយករដ្ឋមន្ត្រីជប៉ុន​និង​​លោក​នាយក​រដ្ឋមន្ត្រី​​ចិន​​ Wen Jiabao​ នៅថ្ងៃទី​២៥​ធ្នូឆ្នាំ២០១១​ © RFI

លោក​ Yoshihiko Noda​ នាយករដ្ឋមន្ត្រី​ជប៉ុន​អញ្ជើញ​ទៅ​បំពេញ​ទស្សនកិច្ច​នៅ​ទីក្រុង​ប៉េកាំង​នៅថ្ងៃ​អាទិត្យ​នេះ​ ​ដើម្បី​ពិភាក្សា​ពី​បញ្ហា​សន្តិសុខ​តំបន់​ក្រោយពី​មរណភាព​របស់​ប្រមុខ​ដឹកនាំ​របប​ផ្តាច់ការ​កុម្មុយនិស្ត​កូរ៉េខាងជើង​គីម​ ជុង-អ៊ីល។

ផ្សាយពាណិជ្ជកម្ម

លោក​ Yoshihiko Noda​ នាយករដ្ឋមន្ត្រី​ជប៉ុន​នឹង​មាន​ជំនួប​ពិភាក្សា​ជាមួយ​លោក​ប្រធានាធិបតី​ចិន​ ហ៊ូ​ ជិនតាវ​ ហើយនិង​លោក​នាយករដ្ឋមន្ត្រី​ចិន​ Wen Jiabao​ នាឱកាស​ទស្សនកិច្ច​ជាផ្លូវការ​​ជាលើក​ទីមួយ​នៅ​ប្រទេសចិន​ចាប់តាំង​ពីលោក​បាន​ឡើងមក​កាន់អំណាច​នៅ​ខែកញ្ញា​កន្លងទៅ។​ ទំនាក់​ទំនង​រវាង​មហាអំណាច​តំបន់​ទាំងពីរ​បាន​ជួប​នឹង​បញ្ហា​ដោយហេតុ​តែ​មាន​ភាព​ចម្រូង​ចម្រាស​នៅក្នុង​វិស័យ​សេដ្ឋកិច្ច​និង​ការឈ្លោះ​ដណ្តើម​ដែនសមុទ្រ។

 
ក៏ប៉ុន្តែ​ មរណភាព​របស់​ប្រមុខ​ដឹកនាំ​របប​ផ្តាច់ការ​កុម្មុយនិស្ត​កូរ៉េខាងជើង​គីម​ ជុង-អ៊ីល​ បាន​ធ្វើ​ឲ្យ​មាន​ការ​ប្តូរប្រែ​ប្រតិទិន​ក្នុង​កិច្ចចរចា​ ​ ដោយ​គេបារម្ភ​ពី​បញ្ហា​អាវុធ​នុយក្លេអ៊ែរ​របស់​ទីក្រុង​ព្យុងយ៉ាង។

លោក​ Yoshihiko Noda​ នាយករដ្ឋមន្ត្រី​ជប៉ុន​បាន​ថ្លែង​ទៅកាន់​អ្នកសារព័ត៌មាន​នៅ​ទីក្រុង​តូក្យូ​មុន​នឹង​ធ្វើដំណើរ​ចេញ​ទៅ​ទីក្រុង​ប៉េកាំងថា​ ​ “​ខ្ញុំចង់​ពិភាក្សា​ឲ្យ​បាន​ស៊ី​ជម្រៅ​ទៅលើ​បញ្ហា​យុទ្ធសាស្ត្រ​និង​ទំនាក់​ទំនង​ចិន-ជប៉ុន។​ ហើយខ្ញុំ​ចង់​ឲ្យ​មាន​ការជាក់​ច្បាស់​ថា​ ​ ប្រទេស​ជប៉ុន​និង​ប្រទេសចិន​នឹង​សហការ​គ្នា​ដើម្បី​​កុំឲ្យ​សន្តិភាព​និង​ស្ថិរភាព​នៅ​ឧបទ្វីប​កូរ៉េ​ជួបនឹង​ផល​វិបាក​អវិជ្ជមាន”។

គួរបញ្ជាក់ថា​ ​ កូនសោ​នៃ​ការដោះ​ស្រាយ​បញ្ហា​កូរ៉េ​ខាងជើង​ឋិត​នៅក្នុង​ដៃ​របស់​ទីក្រុង​ប៉េកាំង​ ​ ហើយ​ដែល​នៅ​ពេល​ទន្ទឹមគ្នា​នេះ​ទីក្រុង​តូក្យូ​មាន​ទំនាក់​ទំនង​តិចតួច​ណាស់​ជាមួយ​ទីក្រុង​ព្យុងយ៉ាង​ ​ ហើយកាន់តែ​តិចទៅទៀត​ជាមួយ​កូនប្រុស​របស់​ គីម​ ជុងអ៊ីល​។

សូមរំលឹកថា​ ​ កិច្ចចរចា​៦ភាគី​ស្ដីពី​បញ្ហា​នុយក្លេអ៊ែរ​កូរ៉េ​ខាងជើង​ដែល​ក្នុងនោះ​មាន​ ​ ប្រទេស​កូរ៉េ​ទាំងពីរ​ ​ ប្រទេសចិន​ ​ រុស្ស៊ី​ ​ ជប៉ុន​ ​ និង​សហរដ្ឋ​អាមេរិក​ ​ បាន​ត្រូវ​ឈប់ផ្អាក​តាំងពី​ខែធ្នូ​ឆ្នាំ២០០៨​ម៉្លេះ។​ ហើយ​ប្រទេសចិន​និង​ប្រទេស​ជប៉ុន​ក៏​សង្ឃឹម​ផងដែរថា​ ​ នឹង​ពិភាក្សា​ពី​បញ្ហា​ជម្លោះ​ដែនសមុទ្រ​រវាង​ប្រទេស​ទាំងពីរ​ដែលឋិត​នៅ​ក្នុង​សមុទ្រ​ចិន​ខាងកើត​ ​ ដែលជា​តំបន់​សម្បូណ៌​ទៅដោយ​ប្រេងកាត​និង​ឧស្ម័ន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI