ភូមា

ភូមា​ត្រូវតែ​មាន​គណបក្ស​ដែល​មាន​ជំហរ​ប្រឆាំង​ពិតប្រាកដ

អ្នក អ៊ុង សានស៊ូជី និយាយទៅកាន់អ្នកកាសែត នៅទីក្រុង រ៉ង់ហ្គូន កាលពីថ្ងៃទី ២៧ ឧសភា ២០១៣
អ្នក អ៊ុង សានស៊ូជី និយាយទៅកាន់អ្នកកាសែត នៅទីក្រុង រ៉ង់ហ្គូន កាលពីថ្ងៃទី ២៧ ឧសភា ២០១៣ ©reuters

អ្នកស្និទ្ធ លោកស្រី អ៊ុង សានស៊ូជី (Aung San Suu Ky) ម្នាក់ បាន​បង្ហាញ​ពី​ជំហរ​របស់​ខ្លួន​ដោយ​ចង់​ឲ្យ​មាន គណបក្ស​ប្រឆាំង នៅ​ភូមា​មាន​ឆន្ទៈ​ប្រឆាំង​ច្បាស់លាស់។ គាត់​បាន​អះអាង​ដូច្នេះ​ដោយ​សារ​តែ​គណបក្ស​សម្ព័ន្ធ​ដើម្បី​ប្រជាធិបតេយ្យ​បច្ចុប្បន្ន​ហាក់​ដូច​ជា​មាន​ ទំនោរ​កាត់​បន្ថយ​ការ​ប្រឆាំង​ទៅ​នឹង​រដ្ឋាភិបាល​បច្ចុប្បន្ន។

ផ្សាយពាណិជ្ជកម្ម

លោក​ វិន ទីន (Win Tin) បានរិះ​គន់​ពី​ជំហរ របស់​ លោក ស្រី អ៊ុង សានស៊ូជី ដែល​កំពុង​កាត់​បន្ថយ​​ការ​ប្រឆាំង​ចំពោះ​រដ្ឋាភិបាល​បច្ចុប្បន្ន។ លោក​យល់​ថា ដើម្បី​ឲ្យ​ប្រទេស​ភូមា​មាន​កំណែ​​ទម្រង់ ជា​ប្រទេស​ប្រជាធិបតេយ្យ​ពិតប្រាកដ​ គឺទាល់តែ​គណបក្ស សម្ព័ន្ធ​ជាតិ​ដើម្បី​ប្រជាធិបតេយ្យ ​ប្រកាន់​គោលការណ៍​ប្រឆាំង​ឲ្យ​បាន​រឹងមាំ។ នេះបើតាម​ការ​ផ្តល់​សម្ភាសន៍​របស់​លោក ដល់​ភ្នាក់ងារ​ព៍ត៌មាន​បារាំង AFP។

 
លោក វិន ទីន ជា ដៃគូ​ស្ថាបនិក គណបក្ស​សម្ព័ន្ធ​ជាតិ​ដើម្បី​ប្រជាធិបតេយ្យ (LND) ជា​មួយ​លោកស្រី អ៊ុង សានស៊ូជី ដែល​បាន​បង្កើត​ឡើង នៅ​ឆ្នាំ​១៩៨៨។ ជា​អតីត​អ្នក​ការសែត​មួយរូប ​លោក​បាន​ទទួល​ពាន់រង្វាន់​ពិភពលោក ស្តី​អំពី សេរីភាព​សារព័ត៌​មាន។ ក្នុង​ការ​តស៊ូ​ដើម្បី​សិទ្ធិ​សេរីភាព​នេះ​ លោក​ត្រូវ​បាន​ជាប់​ពន្ធនាគារ ជាង​១៩ឆ្នាំ ក្រោម​រដ្ឋាភិបាល​យោធារ លោក ថាន់ សេន។

លោក​រម្លឹក​ឡើង​ថា នៅ​ប៉ុន្មាន​ខែ​កន្លង​មក ក្រោម​ក្រសែ​ភ្នែក​អន្តរជាតិ អតីត​ជ័យ​លាភី​រង្វាន់​ណូបែល​សន្តិភាព​ឆ្នាំ​១៩៩៣ ត្រូវ​បាន​រង​ការ​រិះគន់​ ទាក់ទង​នឹង ភាព​ស្ងប់ស្ងាត់ ក្នុង​ការ​បង្រ្គាប ដោយ​ហិង្សា​ទៅ​លើ​ជាតិ​អ៊ីស្លាម ពី​សំណាក់​រដ្ឋាភិបាល​ភូមា។ ជា​អ្នក​ប្រជាធិបតេយ្យ​មួយ​រូប​លោក​យល់​ថា​ចំណុច​នេះ​គួរតែ​ប្រឆាំង​ដើម្បី​បំបាត់​ការ​រើសអើង​ពូជសាសន៍។

ទន្ទឹម​នឹង​ការ​រិះគន់​លោក បាន​ចាត់ទុក​អ្នកស្រី អ៊ុង សានស៊ូជី ជា​មនុស្ស​តែ​ម្នាក់​គត់​ដែល មាន​សម្ថតភាព​ខ្ពស់​អាច​ដឹកនាំ​ភូមា ឲ្យ​ក្លាយ​ជា​ប្រទេស​ប្រជាធិបតេយ្យ​ពិតប្រាកដ​បាន។  ដោយ​លោក មិន​ចង់​ឲ្យ​គណបក្ស​ប្រឆាំង​ ​ភ្លេច​ពី​ឆន្ទៈ​របស់​ខ្លួន​ទេ។ លោក​តែងតែ​ស្រមៃ​ថា ​ភូមា​នឹង​ក្លាយ​ជា​ប្រទេស​ប្រជាធិបតេយ្យ​មួយ​ពេញលេញ។ តែ​លោក​មិនដឹង​ថា​ ថ្ងៃ​នោះ​នឹង​មក​ដល់​ពេលណាឡើយ។ ដោយ​មើល​តាម​ស្ថានភាព បច្ចុប្បន្ន លោកស្រី​អ៊ុង​សានស៊ូជី​មាន​វ័យ​ចំណាស់​ទៅ​ហើយ។

គួររម្លឹក​ផង​ដែរ នៅ​កាល​ពី​សប្តាហ៍​មុន លោកស្រី អ៊ុង សានស៊ូជី បាន​ប្រកាស ឈរឈ្មោះ​ជា បេក្ខជន​ប្រធានាធិបតេ្យ សម្រាប់​ការ​បោះឆ្នោត ឆ្នាំ​២០១៥​ខាង​មុខ។ តែ​អ្វី​ដែល​មិន​អាច​នោះ​គឺ នៅ​ក្នុង​ច្បាប់​រដ្ឋធមនុញ្ញ​របស់​ភូមា មិន​អនុញ្ញាត្ត ឲ្យ​បុគ្គល​ណា​ដែល​មាន ជាប់​សាច់​ឈាម ជា​មួយ​នឹង​ជនបរទេស មាន​តំណែង​ដឹកនាំ​រដ្ឋាភិបាលឡើយ។ ព្រោះអី​ លោកស្រី​ធ្លាប់ មាន​ស្វាមី​ជនជាតិ អង់គ្លេស ហើយកូន​ទាំង​ពីរនាក់ មានក៏មាន​សញ្ជាតិ​អង់គ្លេស​ផងដែរ។

លទ្ធភាព​មួយ​ ដែល​អាច​ឲ្យ​លោក​ស្រី​ឈរឈ្មោះ​បាន គឺ​ត្រូវ​តែ​បញ្ចុះបញ្ចូល​ឲ្យ​បាន​សំលេង ៧៥%​នៅ​ក្នុង​សភា​ដើម្បី​ផ្លាល់ប្តូរ​ច្បាប់​ខាងលើ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI